Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ishak la seppo tor buta. E settong are Esau, pottrana se sareyang, edikane, dhabuna, "Na’!" Saodda Esau, "Ponapa, Pa’?"

² Dhabuna Ishak, "Ba’na tao sengko’ la towa, ta’ etemmo bila se mateya.

³ Daddi kassa’ kala’ pana ban gandhibana, pas mangkat ka alas, nyare keban.

⁴ Ollena pas ola panyaman, kantha jan-dujananna sengko’ rowa. Mon la massa’ giba dha’ enna’. Mon bi’ sengko’ la mare ekakan, bi’ sengko’ ba’na pas eberkadana, pongpong sengko’ gi’ ta’ mate."

⁵ Teppa’na Ishak abu-dhabu ka Esau, Ribka meyarsa’agi. Daddi e bakto Esau mangkat aburuwa keban ka alas,

⁶ Ribka adhabu ka Yakub, "Gi’ buru sengko’ ngedhing eppa’na adhabu kantha reya ka Esau,

⁷ ‘Kassa’ entar aburu, dagingnga ola panyaman, bagi ka sengko’. Mon bi’ sengko’ la mare ekakan, bi’ sengko’ ba’na eberkadana e ajunanna PANGERAN sabellunna sengko’ mate.’

⁸ Sateya Na’, edhingngagi tang caca reya, ban toro’ pagu-onggu.

⁹ Kassa’ ba’na entar ka kennengnganna ebinna eppa’na, ngala’ budhu’na embi’ se lempo dhadhuwa’. Bi’ sengko’ eola’agiya jan-dujananna eppa’na.

¹⁰ Mon la mare pas giba ka eppa’na, soro dha’ar. Saellana jareya tanto ba’na bi’ eppa’na eberkadi sabellunna seda."

¹¹ Yakub mator ka ebuna, "Kadi ponapa, ja’ reng badanna Esau abulu, kaula bunten.

¹² Olle daddi eppa’ agagap ka kaula, tanto sareng eppa’ kaula esanggu co-ngoco; dhaggi’ kaula la’-mala’ ebasto, banne eberkadi."

¹³ Dhabuna ebuna, "Dina sengko’ se nanggunga babaston jareya Na’. Lakone bai apa tang oca’. Kassa’ ngala’ budhu’na embi’ jareya."

¹⁴ Daddi Yakub pas ngala’ budhu’na embi’ dhadhuwa’, eatorragi ka ebuna; Bi’ ebuna laju eola, jan-dujananna Ishak.

¹⁵ Saellana jareya Ribka mondhut kalambina Esau se paleng bagus se esaba’ e bengkona, laju eangguyyagi ka Yakub.

¹⁶ Kole’na embi’ gella’ ebetbeddagi ka lengngenna Yakub ban ka bagiyanna le’erra se ta’ abulu.

¹⁷ La’-ola’anna se nyaman jareya ebagi ka Yakub, epapolong ban roti gabayanna dibi’.

¹⁸ Yakub entar ka eppa’na, laju ngoca’, "Pa’." Saodda Ishak, "Apa, sapa ba’na reya?"

¹⁹ Saodda Yakub, "Kaula Esau, Pa’, pottra sareyangnga sampeyan. Pessennanna sampeyan ampon lastare. Ngereng alenggi, paneka’ dha’ar daging ollena kaula se ababurun, ampon eola. Ngereng dha’ar, pas berkadi kaula."

²⁰ Dhabuna Ishak, "Me’ ce’ lekkassa ba’na olle keban buruwan?" Saodda Yakub, "PANGERAN, Allahna sampeyan se abanto kaula."

²¹ Dhabuna Ishak, "Mara dha’ enna’an, Na’, me’ olle sengko’ ngenneng agagap ba’na. Sengko’ terro taowa apa ba’na reya Esau ongguwan apa enja’."

²² Yakub nyander ka seddi’na eppa’na. Bi’ eppa’na pas egagap. "Sowarana akantha Yakub, tape lengngenna Esau," dhabuna Ishak.

²³ Ishak ta’ ngagali ja’ jareya Yakub sabab lengngenna abulu akantha lengngenna Esau. Ishak para’ aberkadana Yakub,

²⁴ tape pas mangmang, daddi atanya pole, "Ba’na reya Esau ongguwan, ya?" Saodda Yakub, "Enggi."

²⁵ Dhabuna Ishak, "Kemma daging la’-ola’anna ba’na, bi’ sengko’ ekakana. Mon la mare, bi’ sengko’ ba’na eberkadana." Yakub ngatorragi daging jareya ka Ishak, epabareng ban anggur se egabay aeng dha’arra.

²⁶ Eppa’na pas adhabu, "Dha’ enna’an, Na’. Mara seyom sengko’."

²⁷ E bakto Yakub nyeyom eppa’na, eppa’na ngedhing bauna kalambina Esau, daddi Yakub laju eberkadi. Dhabuna, "Bauna tang ana’ padha ban bauna teggal se eberkadi PANGERAN.

²⁸ Moga-moga bi’ Guste Allah ba’na eparengngana ebbun dhari langnge’, ban teggalla ba’na moga epalandhuwa! Moga-moga Allah marengana ba’na gandum ban anggur!

²⁹ Moga-moga sa-bangsa daddiya abdina ba’na ban ku-suku bangsa atelloga ka ba’na. Moga-moga ba’na ngobasa’ana la-balana, ban moga-moga na’ potona ba’na asojuda kabbi ka ba’na. Moga-moga oreng se abasto ba’na ekennenga babaston, ban reng-oreng se aberkadi ba’na kaparengana berkat keya."

³⁰ Ishak la mare aberkadi Yakub. E bakto Yakub buru ondur, Esau laju dhateng dhari se ababurun.

³¹ Ollena dagingnga la eola epanyaman, pas egiba ka eppa’na. Ca’na Esau, "Pa’, ngereng alenggi, paneka’ daging ollena kaula se aburu, ngereng dha’ar, manabi lastare, kaula pas berkadi."

³² "Ba’na reya sapa?" ca’na Ishak. Saodda Esau, "Kaula pottra sareyangnga sampeyan, Esau."

³³ Ishak ce’ takerjadda, sampe’ ngetter sabadan, dhabuna, "Mon bariya sapa se nyambelli keban buruwan gella’, sarta ngeba ka sengko’ dagingnga se la eola gella’ rowa? Bi’ sengko’ gi’ buru mare ekakan sabellunna ba’na dhateng. Bi’ sengko’ oreng jareya la eberkadi; daddi berkat jareya salanjangnga ekaandhi’ oreng jareya."

³⁴ E bakto ngedhing dhabuna eppa’na jareya, Esau laju nanges rat-tharadan sambi ngoca’, "Ngereng kaula berkadi jugan, Pa’!"

³⁵ Dhabuna Ishak, "Sengko’ la etepo ale’na ba’na. Berkat se samasthena etarema ba’na la ekala’."

³⁶ Ca’na Esau, "Paneka ampon kadhukaleyanna kaula eco-koco. Patot ban nyamana Yakub. Ha’ sareyangnga kaula ampon ekala’, samangken berkat se samasthena etarema kaula ekala’ jugan. Ponapa sampeyan ta’ kaagungan karena berkat se kengeng eparengngagi ka kaula, Pa’?"

³⁷ Dhabuna Ishak, "Bi’ sengko’ ale’na ba’na la epadaddi lorana ba’na, la-balana bi’ sengko’ epadaddi dunorra kabbi, gandum ban anggur bi’ sengko’ la esangowagi keya. Sateya sengko’ ta’ andhi’ pa-apa pole se ekenneng bagi ka ba’na, Na’!"

³⁸ Esau gi’ maksa nyo’on ka eppa’na, "Ponapa sampeyan pera’ kaagungan berkat samacem, Pa’? Ngereng kaula berkadi jugan, Pa’!" Samarena jareya Esau laju nanges pole.

³⁹ Ishak adhabu, "Ba’na ta’ kera nemmo gaggarra ebbun dhari langnge’, ta’ kera andhi’ teggal se landhu.

⁴⁰ Ba’na bakal olleya pangoreban dhari peddhangnga, tape ba’na bakal daddiya dunorra ale’na. Nangeng mon ba’na aberonta’, ba’na bakal lopoda dhari kakobasa’anna."

⁴¹ Esau sake’ ate ka Yakub polana berkadda eppa’na ebagi ka Yakub jareya. Ca’na pekkerra, "Eppa’ la para’ seda’a; samarena kasossa’an jareya bi’ sengko’ Yakub epateyana."

⁴² Tape e bakto Ribka meyarsa maksodda Esau jareya, laju adikane Yakub, pas adhabu, "Edhingngagi, Na’, Esau amaksod malessa sake’na atena, mateyana ba’na.

⁴³ Daddi sateya, Na’, mara ba’na patoro’ oca’. Kassa’ duli buru ka bengkona tang taretan se anyama Laban e Haran.

⁴⁴ Ba’na neng e jadhiya gallu kaangguy sabatara, sampe’ kaka’na ba’na elang peggella,

⁴⁵ sarta loppa ka lalakonna ba’na se mapeggel atena jareya. Bi’ sengko’ ba’na pas esorowa kone’e. Sengko’ ta’ terro kaelangana ana’ dhadhuwa’ e dhalem saare."

⁴⁶ Ribka mator ka Ishak, "Kaula ce’ caremmedda ka reng-oreng manca binena Esau ka’issa’. Manabi Yakub abine oreng Het jugan, kaula tanto mate."

Kejadian

Video Kejadian 27

Ikuti Kami:

KONTAK | PARTISIPASI | DONASI