Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Tupung si e Isak nggo metua, janah pentang pe. Idilona anakna sintua Esau nina man bana, "O anakku." "Kai, Bapa," nina Esau ngaloi.
2 Nina Isak, "Idahndu nge kap maka aku nggo metua. Tah lanai bo ndekah aku nggeluh.
3 Buat dage panah ras anak panahndu. To ku kerangen kam erburu, buat sada rubia-rubia man bangku.
4 Tasakken man bangku pangan si ntabeh kuakap, jenari baba man bangku. Kenca kupan, kupasu-pasu ateku kam ope aku mate."
5 Tapi sanga ercakap-cakap Esau ras Isak kepeken ibegiken Ribka. Emaka kenca lawes Esau erburu,
6 nina Ribka man Jakup, "Enda denga nge kubegi ikataken bapandu man Esau,
7 'To buat sada rubia-rubia, tasakken e bangku. Kenca kupan, kupasu-pasu kam i lebe-lebe TUHAN ope denga aku mate.'"
8 "Emaka anakku," nina Ribka tole, "Begiken ras ikutken kai si kukataken.
9 To pilihi dua kambing si mburna, gelah kutasakken sitik pangan si ntabehna kal akap bapandu.
10 Kenca bage ibabandu kari man bana gelah ipanna, maka ipasu-pasuna kam ope ia mate."
11 Tapi nina Jakup man nandena, "Tehndu nge Esau kalak si ermbulu badanna, tapi aku lang.
12 Ntah idadap bapa kari aku, ma ietehna kutipu ia? Alu bage sumpah nge dat aku, labo pasu-pasu."
13 Nina nandena, "Aku nanggungsa sumpah si seh man bandu anakku. Bahanlah bagi si kukataken, to lah buat kambing e man bangku."
14 Emaka lawes Jakup muatca, ibabana man nandena, itasakkenna uga akap Isak ntabeh.
15 Kenca bage ibuat Ribka me baju Esau si mejilena kal, si ibunikenna i bas rumah e, jenari isuruhna ipake Jakup.
16 Itamakenna kulit kambing e i bas tas Jakup, ras bage pe i bas kerahungna si la lit mbuluna.
17 Iberekenna pangan si ntabeh e man Jakup, rikut pe ras roti si nggo itasakkenna.
18 Kenca bage lawes me Jakup ku bapana nina, "O, Bapa!" "Kai," nina bapana ngaloi, "Anakku siapai kam?"
19 "Aku kap Esau, anakndu sintua; nggo kulakoken bagi si isuruhndu. Kundul kam bapa, gelah ipanndu sitik pangan si kubaba enda, gelah ipasu-pasundu aku," nina Jakup njabapsa.
20 Nina Isak, "Uga maka bage pedasna dat kam, anakku?" Erjabap Jakup, "TUHAN Dibatandu kap si nampati aku ndatkenca."
21 Nina Isak man Jakup, "Mari terdeheren ku jenda gelah banci kam kudadap. Tuhu kin lah kam Esau?"
22 Ideheri Jakup bapana. Icikep bapana ia nina, "Sorandu bali ras sora Jakup, tanndu bali ras tan Esau.
23 La itandai Isak si Jakup sabap tanna ermbulu bagi tan Esau. Menam ipasu-pasuna Jakup,"
24 tapi isungkunna ka nina, "Tuhu kam Esau?" "Tuhu Bapa," nina Jakup.
25 Nina Isak, "Baba dage sitik pangan e bangku, gelah kenca kupan, kupasu-pasu kam." Ibaba Jakup pangan e man bapana, bage pe ibabana ka anggur man inemenna.
26 Kenca bage nina bapana man bana, "Mari terdeheren, emma aku anakku."
27 Sanga iemana bapana, ianggeh Isak bau uis anakna, emaka ipasu-pasuna anakna Jakup. Nina Isak, "Bau anakku si merim bali ras bau juma si nggo ipasu-pasu TUHAN.
28 Dibata mereken embun man bandu i langit nari si mahan jumandu mehumur. Ia lah si mereken man bandu mbue gandum ras anggur.
29 Bangsa-bangsa jadi suruh-suruhenndu gelah, janah nembah ia kerina man bandu. Kam lah si merentah senina-seninandu, sinursur nandendu pe nembahlah man bandu. Kalak si numpahi kam, kena sumpah, kalak si masu-masu kam dat pasu-pasu."
30 Kenca nggo dung Isak mereken pasu-pasuna, minter kenca Jakup lawes, reh seninana Esau i bas perburun nari.
31 Ia pe nasakken pangan si ntabeh, jenari ibabana ku bapana nina, "O Bapa, kekeken, pan dage pangan si kubaba enda, gelah banci aku ipasu-pasundu."
32 "Ise kin kam?" nina Isak nungkun. "Anakndu sintua, Esau," nina njabapsa.
33 Minter nggirgir kerina daging Isak emaka isungkunna, "Adi bage, ise dage ndai si nggo enggeleh rubia-rubia, janah si nggo mabasa bangku? Ope denga kam reh nggo kupan, nggo kupasu-pasu ia alu pemasu-masunku si pengkeri-kerinna, janah erkiteken si e nggo jadi sikerajangenna seh rasa lalap."
34 Kenca ibegi Esau e, serko ia alu sora megang. Ngilas kal akapna, janah nina, "Aku pe pasu-pasu min, Pa!"
35 Nina Isak njabapsa, "Nggo ndai reh agindu, itipuna aku. Nggo ibuatna pasu-pasundu."
36 Nina Esau, "Enda me pedua kaliken aku itipuna. Payo me gelarna Jakup. Nggo ibuatna hakku selaku anak sintua, genduari pasu-pasungku ka ibuatna. Lanai nge lit pasu-pasundu si man bangku?"
37 Nina Isak njabapsa, "Nggo kubahan ia jadi tuanndu, nggo kubahan maka kerina senina-seninana jadi suruh-suruhenna. Nggo kubereken man bana gandum ras anggur. Genduari kai kal pe lanai banci kubahan man bandu anakku!"
38 Isek seki Esau lalap bapana nina, "Sada kin ngenca pasu-pasundu, Bapa? Aku pe pasu-pasu min!" Emaka mulai ia ngandung.
39 Emaka nina Isak man bana, "Lanai lit embun i langit nari man bandu, lanai lit juma si mehumur man bandu.
40 Kam nggeluh arah pedangndu, tapi kam suruh-suruhen seninandu. Tapi bage pe, adi la kam nggit, kam banci nangtang i bas kuasana nari."
41 Erkiteken si e nembeh ate Esau man Jakup, perban bapana nggo mereken pasu-pasuna man Jakup. Rukur ia, "Bapangku lanai bo kap ndekah nggeluh, kenca e pagi kubunuh Jakup."
42 Tapi ieteh Ribka sura-sura Esau, emaka isuruhna kalak ndilo Jakup, janah nina, "Begiken, kakandu Esau erbalas atena man bandu janah ibunuhna atena kam.
43 Emaka genduari o anakku, bahanlah bagi si kukataken e. Minterlah kam lawes ndahi turangku Laban i Haran.
44 Ras ia me kam lebe, nimai ngadi nembeh ate kakandu,
45 seh ngayak lupa ia perbahanenndu man bana. Kenca bage kusuruh denggo si ngalo-ngalo kam mulih. Sabap la ateku bene anakku duana i bas sada wari."
46 Nina Ribka man Isak, "Ngelabuh aku ngenen bangsa Heti ndehara Esau ah. Adi si Jakup pe muat singuda-nguda bangsa Heti jadi ndeharana madin me aku mate."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA