Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Narapi’na 127 taung umuru’na Sara,
2 matemi ri Hebron ri butta Kanaan. Si’na sikalimi pa’mai’na Abraham siagang nakarrukimi anjo kamateanna bainenna.
3 Le’baki anjo nabokoimi Abraham anjo lapung tumate bainenna na’lampa mange ri tu Het, niaka ammantang ri anjo pa’rasanganga. Nakanamo,
4 "Inakke anne tubattu-battuja’ ammantang ri tangnga-tangngata ngaseng; kisarea’ pangngellai untu’ ammalli siapa are luara’na butta sollanna akkulle kutarawang bainengku."
5 Appialimi ke’nanga angkana,
6 "Ikambe anne nipakalompoki’ lanri ikattemi sitau pamimping makassaka ri alla’na ikambe. Jari kitarawammi bainenta ilalang ri pa’jerakkang kaminang bajika ia napatanga ikambe. Ikambe anne sannang ngasengi pa’maitta ansadiakangi pa’jerakkanna bainenta."
7 Nampa su’ju’mo Abraham ri dallekanna ke’nanga,
8 na nakana, "Punna kikellaija’ antarawangi bainengku anrinni, kitulunga’ nakipappalakanga’ ri Efron, ana’ bura’nena Zohar,
9 sollanna ero’ nabalukang ri nakke Kali’bong Makhpela ia niaka ri biring kokonna. Bajiki punna nabalukang anjo tampaka anrinni, napara kisa’bi ngaseng. Ia ballinna lakubayara’ tabasikali, sollanna akkulle kupatang anjo tampaka."
10 Anjo wattua niaki kalenna Efron sitabang ammempo siagang anjo tu Het ri tampa’ pa’rappunganga ri pakke’bu’ lompona kotaya. Appialimi nanisa’bi ri sikamma tau niaka anjoreng, angkana,
11 "Kalenna bansaku a’jari sa’bi angkanaya anjo kokoa siagang kali’bong niaka ri ampi’na kupassareangi mae ri katte sollanna akkulle kitarawang bainenta."
12 Su’ju’mi Abraham ri dallekanna anjo tu Hetka,
13 siagang nalangngere’ ngasemmi taua angkana ri Efron, "Kupalaki nikipilangngeri kanangku. Erokka’ amballi ngasengi anjo kokoa. Kitarimami doe’na, sollanna akkulle kutarawang bainengku anjoreng."
14 Appialimi Efron angkana,
15 "Anjo siapa are luara’na tampa’, poro patambilangnganji doe’ pera’ ballinna, apa anggaranna anjo ri katte sipa’rua? Tarawammi bainenta anjoreng."
16 Situjumi Abraham ri anjo anggarang ballinna. Narekemmi doe’ pera’na sangkamma jaina anjo napaua Efron, iamintu patambilangngang doe’ pera’, situru’ timbangang ia biasaya napake padangganga. Nampa nabayara’mo mae ri Efron, nisa’bi ri sikamma tu Het niaka hadere’.
17 Kammaminjo na’jari napatangmo Abraham anjo kokonna Efron, ia niaka ri Makhpela, irayanganna Mamre. Anjo tampaka iamintu koko siagang kali’bonna kammayatompa sikontu poko’-poko’na, kammayami poko’-poko’ niaka todong ri sikamma pa’baeng-baenna.
18 Anjo tampaka niakuimi angkanaya a’jarimi tampa’na Abraham ri sikontu tu Het niaka hadere’ ri anjo pa’rappunganga ri pakke’bu’ lompona kotaya.
19 Le’baki anjo natarawammi bainenna Abraham, iamintu Sara, lalang ri kali’bong Makhpela ri butta Kanaan.
20 Kammaminjo sa’genna anjo kokoa siagang kali’bonna, napatanga tu Het riolo, a’jarimi napatang Abraham untu’ a’jari butta pa’jerakkang.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA