Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ibrahim ngalle dhari Mamre ka bagiyan lao’na tana Kana’an, pas neptep e antarana Kades ban Syur. Ta’ saapa abidda dhari jareya, e bakto gi’ alenggi e Gerar,
2 Ibrahim adhabu ja’ Sara jareya ale’na. Daddi Rato Abimelekh dhari Gerar makon oreng ngeba Sara ka salerana.
3 E baja malem Allah ngaton ka rato jareya e dhalem sopennana, laju adhabu, "Ba’na kodu mate, sabab ba’na ngala’ binena oreng."
4 Tape Abimelekh gi’ ta’ nyedding Sara, daddi laju mator, "Adhu, GUSTE, Pangeran! Abidalem ta’ sala! Ponapa Junandalem mateyana abdidalem sareng bangsa abdidalem?
5 Ibrahim dibi’ se adhabu ja’ babine’ ka’dhinto ale’na, sarengngan jugan babine’ ka’dhinto ngoca’ sapaneka jugan. Abdidalem ngala’ babine’ ka’dhinto kalaban maksod se sae sareng ate se berse, daddi abdidalem ta’ sala."
6 Allah laju adhabu pole e dhalem sopennana, "Iya bendher, Sengko’ tao ja’ ba’na pajat ngala’ babine’ jareya kalaban ate se berse. Lantaran jareya bi’ Sengko’ ba’na elang-alange sopaja ta’ agabaya dusa ka Sengko’, ban Sengko’ ba’na ta’ ebagi nyedding ka babine’ jareya.
7 Daddi sateya mara babine’ jareya pabali ka lakena. Sabab lakena nabbi, nabbi jareya bakal nyo’onnagiya ba’na ka Sengko’ sopaja ba’na ta’ mateya. Tape mon ba’na ta’ endha’ mabali babine’ jareya, ba’na ban ra’yadda masthe mate!"
8 Kalagguwanna gu-laggu Abimelekh adikane para ponggabana, laju eparenge oneng parkara kadaddiyan jareya. Ponggabana padha katako’an kabbi.
9 Saellana jareya Abimelekh adikane Ibrahim, laju adhabu, "Sampeyan me’ sapaneka ka kaula? Ponapa salana kaula ka sampeyan, me’ sampeyan madhateng mosiba paneka ka kaula ban ka karaja’an kaula? Ta’ sae ganeka.
10 Ponapa maksodda sampeyan?"
11 Dhabuna Ibrahim, "Ca’epon pekker abdidalem e ka’dhinto tadha’ oreng se tako’ ka Allah, daddi abdidalem tanto epate’e manabi badha oreng se terro ka raji abdidalem.
12 Sarengngan pole Sara ka’dhinto pajat ale’ abdidalem, tonggal eppa’ laen ebu, sareng abdidalem laju ekabine.
13 Daddi e bakto Allah makon abdidalem adinggallagi compo’na eppa’, epakon entar ka nagara manca, abdidalem ngoca’ ka raji abdidalem, ‘Mon ba’na taresna ka sengko’, mon badha oreng atanya ba’na abala ja’ sengko’ reya kaka’na ba’na.’"
14 Saellana jareya Abimelekh mabali Sara ka Ibrahim. Laen dhari jareya Ibrahim eparenge dumba ban sape, dunor lalake’an ban babine’an.
15 Dhabuna rato jareya ka Ibrahim, "Paneka nagara kaula; sampeyan kengeng alenggi e ka’imma’a saos se ekasokane."
16 Saellana jareya rato adhabu ka Sara, "Kaka’na sampeyan bi’ kaula ampon eparenge pesse saebu salaka menangka bukte ka sadajana oreng ja’ sampeyan gi’ socce. Sampeyan ta’ sala."
17 Polana kadaddiyan jareya babine’an e karatonna Abimelekh bi’ PANGERAN epajubeng kabbi. Ibrahim laju nyo’on ka Allah. Allah laju mabaras Abimelekh, rajina ban nor-dunor babine’anna, sampe’ babine’an jareya bisa andhi’ ana’ pole.
18 (20:17)
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA