Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Miser Abraham i Mamre nari kempak Selatan Kanaan, janah ringan ia kelang-kelang Kades ras Sur. Pudi wari, asum ia ringan i Gerar,
2 ikatakenna maka turangna nge Sara. Emaka isuruh Abimelek raja Gerar ngelegi Sara man bana.
3 I bas sada berngi icidahken Dibata BaNa man Abimelek i bas nipi nina, "Mate me kam erkiteken ibuatndu diberu enda sabap ia nggo erjabu."
4 Tapi Abimelek langa bo ersada kula ras Sara, emaka nina, "TUHAN labo aku salah! IkernepkenNdu kin AteNdu aku ras rayatku?
5 Abraham jine ngataken maka turangna nge Sara, janah Sara pe bage ka nge nina. Kulakoken enda alu ukur meciho, janah aku langa lit erbahan si lepak."
6 Ngaloi Dibata i bas nipi e, "Ue, Kueteh nge maka alu ukur meciho nge ilakokenndu e. Emaka Kuambati kam gelah ula kam erdosa bangKu, erkiteken emaka la Kubere ia ikuitndu pe.
7 Emaka ulihken lah diberu enda man perbulangenna. Perbulangenna eme sekalak nabi, suruh-suruhen Dibata; ia kari ertoto kerna kam maka ula kam mate. Tapi adi la iulihkenndu diberu e, la banci lang mate kam ras rayatndu!"
8 Pepagina lampas erpagi-pagi idilo Abimelek kerina pegawaina janah iturikenna kai si nggo jadi. Emaka seh ia kerina biarna.
9 Kenca bage ilebuh Abimelek si Abraham, isungkunina, "Uga perbahanenndu e man kami? Kai kin salah si nggo kubahan man bandu maka ibanndu mara si mbelin e man bangku ras man kerajanku. La mehuli perbahanenndu e.
10 Ngkai maka bage ibahanndu?"
11 Ijabap Abraham, "Kuakap kin la lit sekalak pe i jenda kalak si mbiar man Dibata. Emaka mbiar aku ibunuh kalak guna ndatken ndeharangku.
12 Tuhu nge ia turangku. Ia anak bapangku tapi la kami sada nande, emaka kuempoi ia.
13 Jadi sanga isuruh Dibata aku nadingken rumah bapangku, lawes aku ku negeri si deban, ningku man ndeharangku, 'Cidahken lah keleng atendu man bangku alu ngataken man kerina kalak maka turangndu nge aku.'"
14 Kenca bage iulihken Abimelek si Sara man Abraham, janah radu ras si e iberekenna ka man bana biri-biri, lembu, ras budak-budak.
15 Nina Abimelek man Abraham, "Enda tanehku kerina, banci kam ringan ije arah apai atendu."
16 Nina ka Abimelek man Sara, "Kubereken man turangndu 1000 duit pirak, jadi tanda man kalak kerina maka kam la ersalah, janah kerina kalak meteh si e."
17 Erkiteken kejadin si jadi i bas Sara, ndehara Abraham e, kerina diberu si lit i bas istana Abimelek lanai banci mupus ibahan TUHAN. Emaka ertoto Abraham kerna Abimelek, emaka ipepalem Dibata ia. Bage pe ndehara Abimelek ras budakna si diberu IpepalemNa kerina janah nggo ka banci mupus.
18 (Kej 20:17)
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA