Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Samasam hinan do hata i sab tanoh on anjaha sada do parsahapan.

² Sanggah na bungkas sidea hun habinsaran, jumpah sidea ma sada pamah i nagori Sinear, jadi marianan ma sidea ijai.

³ Nini sidea ma samah sidea, “Topa hita ma batu merah anjaha tutung hita ma dear-dear. Tanoh na tinutung ai ma ipakei sidea jadi batu anjaha samasam hirtah ipakei jadi panrohat.”

⁴ Nini sidea ma, “Pungkah hita ma sada huta ampa sada menara banta, na das hu langit pakpakni anjaha bahen hita ma banta sada goran, ase ulang merap hita hu sab tanoh on.”

⁵ Jadi turun ma Jahowa laho mangidah huta ampa manara, na pinauli ni jolma ai,

⁶ dob ai nini ma, “Tonggor ma, sada bangsa anjaha sada sahap do sidea ganup. Pamungkah ni na sihol sibahenon ni sidea ope on; anjaha aha pe lang humbani na dob sinurahon ni sidea, na so tarjadihon sidea.

⁷ Eta, turun ma Hita, geori Hita ma sahap ni sidea ijai, ase ulang marsiarusan sahap be sidea.”

⁸ Sonai ma sidea ipaerap Naibata hunjai hu sab dunia on, jadi maronti ma sidea na pauli huta ai.

⁹ Halani ai ibahen ma goran ni huta ai Babel, halani ijai do igeori Jahowa sahap ni ganup dunia on, hunjai ma ipaerap Jahowa sidea hu sab dunia on.

¹⁰ On ma ginompar ni si Sem. Dob marumur si Sem saratus tahun, itubuhkon ma si Arpaksad, dua tahun dob salpu bah na sumbang ai.

¹¹ Manggoluh ope si Sem lima ratus tahun nari, dob itubuhkon si Arpaksad, anjaha itubuhkon do anak pakon boru.

¹² Dob marumur si Arpaksad tolu puluh lima tahun, itubuhkon ma si Selah.

¹³ Manggoluh ope si Arpaksad ompat ratus tolu tahun nari dob itubuhkon si Selah, anjaha itubuhkon do anak pakon boru.

¹⁴ Dob marumur si Selah tolu puluh tahun, itubuhkon ma si Heber.

¹⁵ Manggoluh ope si Selah ompat ratus tolu tahun, dob itubuhkon si Heber, anjaha itubuhkon do anak pakon boru.

¹⁶ Dob marumur si Heber tolu puluh ompat tahun, itubuhkon ma si Peleg.

¹⁷ Manggoluh ope si Heber ompat ratus tolu puluh tahun nari dob itubuhkon si Peleg, anjaha itubuhkon do anak pakon boru.

¹⁸ Dob marumur si Peleg tolu puluh tahun, itubuhkon ma si Rehu.

¹⁹ Manggoluh ope si Peleg dua ratus siah tahun nari, dob itubuhkon si Rehu, anjaha itubuhkon do anak pakon boru.

²⁰ Dob marumur tolu puluh dua tahun si Rehu, itubuhkon ma si Serug.

²¹ Manggoluh ope si Rehu dua ratus pitu tahun nari, dob itubuhkon si Serug, anjaha itubuhkon do anak pakon boru.

²² Dob marumur si Serug tolu puluh tahun, itubuhkon ma si Nahor.

²³ Manggoluh ope si Serug dua ratus tahun nari, dob itubuhkon si Nahor, anjaha itubuhkon do anak pakon boru.

²⁴ Dob marumur si Nahor dua puluh siah tahun, itubuhkon ma si Terah.

²⁵ Manggoluh ope si Nahor saratus sapuluh siah tahun nari, dob itubuhkon si Terah, anjaha itubuhkon do anak pakon boru.

²⁶ Dob marumur si Terah pitu puluh tahun, itubuhkon ma si Abram, si Nahor pakon si Haran.

²⁷ On ma ginompar ni si Terah. Itubuhkon si Terah ma si Abram, si Nahor, pakon si Haran, anjaha itubuhkon si Haran ma si Lot.

²⁸ Sanggah manggoluh ope bapani, matei ma si Haran i tanoh hatubuhanni, i Ur, i tanoh Kasdim.

²⁹ Mambuat boru ma si Abram pakon si Nahor; goran ni parinangon ni si Abram si Sarai, goran ni parinangon ni si Nahor si Milka, boru ni si Haran, bapa ni si Milka pakon si Jiska.

³⁰ Tapi lambang do si Sarai, seng dong tubuhan tuah ia.

³¹ Dob ai iarahkon si Terah ma si Abram anakni ai, pakon si Lot anak ni si Haran pahompuni ai, ampa si Sarai parumaenni ai, parinangon ni si Abram, anak ni ai, jadi bungkas ma sidea hun Ur, na i tanoh Kasdim, sihol misir hu tanoh Kanaan; das ma sidea hu Haran, lanjar marianan ijai.

³² Jadi dob dua ratus lima tahun umur ni si Terah, matei ma ia i Haran.

Kejadian

Video Kejadian 11

Ikuti Kami:

KONTAK | PARTISIPASI | DONASI