¹ Galatiak de zi, em in enlala joblo-top tanganna! Nara emsa kirekam gweibiridaka? Ki san ee home dam-dam enkam srip gulsuk gwizimk– Yesussu de te-lidak sonnak makan ta irin hip denaye!
² Emki sap eenlala gwen: Emsa ba nakon Alap mo Enhona ing gwe hebiridaka? Kina ki Musa mo titi tabin ol san de ang ta gwen nakon. Zen diki Yesus hup de ol dawemna insa kim laiblibik, dekam am emsa ing gwe hebiridaka.
³ Em sap nonol Alap mo Enhonak eyaing gwe kini gwek, hwena angkam ema tim ul gweꞌan, “Ëe asa ere mo sosonkam Alap mo dwam gwibinni syal ei gwibir.” Zep em angkam mese enaha gwehak!
⁴ Emki eenlala gwen– men kim eKristen gwen srem wenya Yesus hup de jal hap emsa karek da gwibikke: Alap man kire hap de dawemna ebe mae hap ngatan zi mo langnak lam gulzimꞌira. Hwena em de Yesussu hli tankam, ki waba habe zebe hap de jal hap karekna oltowe gwek!
⁵ Zep emki eenlala gwen: Em bawalkame Alap mo Enho mo sosonna eisbik? Hen Alap mensa owas-owasna eno mae mo ngirinnik syal gwe-gwibirki, zen bawalkam kon gwesik hanak? San ha eKristen gwen sremnak kime epba titi tabin ol san ang ta gwekke? San ha Yesus hup de ol dawemna insa kime laiblibikke?
⁶ Emki hen Alap mo ola ansa enlala gwibin: “Abraham zen Alapsa taibliblaka, zep Alap anakan gubluka, ‘Em mese ere mo nwenak dakastili.’”
⁷ Zen in zep, man dam gwesinin: Men zen Alap mo ola daibli gwibirin, zen zen– Abraham mo wei-wik gun walas naye.
⁸ Alap orep mes ki Yahudi srem zini ebe mae hap dena anakan kalang gweka, “Ano olsa de taibli gwibinkim, zen dekam sa ere mo nwenak edakastil gwer.” In zep Abrahamsa hamal hap ol dawemna ansa gu-gubluka, “Tingare zi ausuna heꞌho gwibinni ebon onakon sa nulin.”
⁹ Abraham zen ola insa taiblibirki, in zep Alap heꞌho gwibinni zebe hap golblaka. Zep nen hen kirekam: Nen de Abraham mo kim Yesus hup de ol dawemna insa taiblibinkim, dekam esa hen Alap onakore heꞌho gwibinni Abraham mo kim ulin.
¹⁰ Hwena men zen de eenlala gweꞌak, “Ëe Musa mo titi tabin ol san de ang ta gwenkam asa Alap mo nwenak edakastil,” hwena kire zini Alap kareknak sa kang gulu. Sap Musa mo titi tabin olak man lwak, “Men zen de titi tabin ola ansa aha-en mae ngip nuꞌik, desa sa Alap kareknak kang gulu.”
¹¹ Sap nen kitak ema ngip ul gwenan. Zep tangan dam gwesinin: Nen bejen titi tabin syalsa de blol gwibinkim Alap mo nwenak edakastin. Zen in zep hen Alap mo olak anakan lwak, “Men zen ere mo nwenak edakastiꞌin, zen kitak Asa de taibliblan en nakon.”
¹² Titi tabin ola, desa “ang tan”kam nen gwibirin. Desa “taiblibin”kim hom nen gwibirin. Zep Musa mo titi tabin olak man lwak, “Men zen de tingare ola an san ang ta tine gweꞌak, zen zen en sa engaya gwer.”
¹³ Hwena zini nen bejen kirekam ang ta tinen. Zep Musa mo titi tabin ola kon, nesa kitak maka Alap kareknak kang guꞌura. Hwena zen zep Alap nebe mae hap de jal lam gulzimdinni iwe Tane zemka hwena dre neka. Zen zep Yesussu de neno mae mo weinak drenen hap dena Musa mo titi tabin olak hen anakan lwak, “Men desa tenyak makan ta irinni, desa sa Alap kareknak hen drenera.”
¹⁴ Zen zep Kristus neno mae mo weinak tilki– nen dikim hwena heꞌho gwibinni insa hlaun hup, Alap mensa Abrahamsa gu-guk gweblakake, sap Yahudi zi, sap Yahudi srem zi. Zen kirekam Alap Zen syal gwibirki– dekam de Yesussu de taibli gweblan nakon Alap zere mo Enhosa zer gwizimdin hip, men kirekam Zena gu-guk gwibirida gwekake.
¹⁵ Aya-wal oso-wal, neno mae mo ngirinnik ki zini aha zi niban ola aha-en nul gwenan. Zi de wal bose zeban ba mae hap olsa aha-en unni, hwena hyanak aha zi bejen zeno nik mo ol aha-en unni insa wet gulsuzimdin.
¹⁶ Zep Alap mo Abrahamsa de gu-gublunna in hen kirekam. Zeno nik mo aha-en un hyanak aha zi bejen wet gulsuzimdin. Dekam Alap Abrahamsa totoresa anakan gu-guk gweblaka, “Ëe asa heꞌho gwibinni eno auyan hap golblal.” Alap mo olak hom anakan lwak, “Ere mo auyan-tane wal hap asa golzim.” Dekam enlalana beya zi hip. Hwena Zen anakan gu-guk gweblaka, “Ere mo Auyan-tane hap asa golblal.” Enlalana Zini aha-en. Zen Kristus.
¹⁷ Zep zeno enlalana a kirekam moye: Alap nonol Abrahamsa gu-guk gweblaka, ki zep hwena tahunna 430 enkam damank. Ki zep hwena titi tabin ola Musa hap golblaka. Zep mensa Musa Bak hap hyanak golblaka, zen bejen wet gulsun– mensa nonol Abrahamsa gu-guk gweblakaye.
¹⁸ Sap Alap hom anakan Abrahamsa gubluka, “Titi tabin ola an sane ang gwe-gweꞌanka, ki asa heꞌho gwibinni ebe hap golblal.” Kirekam de gu-gublunanam, zen ki totoresa de golgu-guk gweblankam hom nwe-mase gweꞌan. Zen ki hwena syalsa de wei yul soneblan makan maka nwe-mase gwek. Hwena Alap Zen kwasang-kwasangna, zep totoresa de golblan hap gu-guk gweblaka.
¹⁹ Kirekam insa lwak, ahakon sa hwena egul, “Ki hwena Alap ba hap titi tabin ola insa Musa hap golblaka?” Zen hwena mae hap titi tabin ola insa mas gulzimki: Dekam de tingare zi hip zere mae mo karek-kareksa goltrei gwizimdin hip. Hwena Yesus in Abraham mo Auyan-tanena mensa gu-guk gweblakake. Zep Alap insa titi tabin ola golzimki, zen Yesus de hatazan srem ennak de desan ang ta gwen hap dena. Zep titi tabin ola in bol-zaun tangan naka hom. Diki men desa nonol Abrahamsa gu-guk gweblaka, zen diki zen– bol-zaun tangan wenyaye. Titi tabin ola in Alap Zen hom Musa hap golblaka. Zen hwena zere mo dam taha nakore zi ayang nul gweblak.
²⁰ Hwena Abrahamsa kim gu-guk gweblaka, zen aha mae hom ayang nul gweblak. Zen Zen tangan gu-guk gweblaka. Zep man dam gwesinin: Abrahamsa de gu-guk gweblanna in zen tangan nebe mae hap bol-zaun gwizimꞌin.
²¹ Hwena ahana maka anakan gulsuꞌura, “Ki hwena Abrahamsa de gu-gublun naban Musa mo titi tabin ola ban hom apde neꞌan.” Hwena kirekam hom! Zen man apde neꞌan. Hwena Alap hom titi tabin ola golzimki– dekon de engaya gwen hap denaye. Kirekam de lwaꞌanam, nen emaka desan de ang ta gwenkam kitak nenaka ngaya labiꞌin, hen dekon emaka Alap mo nwenak edakastiꞌin.
²² Hwena kirekam bejen. Sap Alap mo olak man ale nuk, “Kareksa de gol gwen hap de sosonna mes tingare zisi tahalebik.” Zen in zep, Alap aha-en tangan engaya gwen hap de orana nebe mae hap kles tyasizimki– in kim Abrahamsa zere mo Auyan-tane hap dena gu-guk gweblakaye. Zep men zen zeno Auyan-tanena Yesussu daibli gweblaꞌan, zen zen en Abraham mo auyan-tane walyak biti gweꞌan.
²³ Yesussu de taibliblan hap dena insa kime tame ul srem gwek, nen dekam sekola walas mo kime lowehe gwek. Musa mo titi tabin ola in dekam nesa irik gil gwek, hen guru makan tawa ta gwibik– hendep Alap de engaya gwen hap de ora esena insa kles tyasizimdinnik dep. Alap insa titi tabin ola golzimki, zen dekam de guru makan nesa Kristus osan dep golegwehan hap– nen dikim Kristussu de taibliblankam Alap mo nwenak edakastin hip.
²⁴ (3:23)
²⁵ Zen in zep, nen kime Yesussu laibliblak, nen dekam san de sekola nakon de etamat gwenna kiye. Hen dekam home etan dwam eibiꞌin– titi tabin ola in de nesa irik gin hipye.
²⁶ Nen kim Yesussu anakan laibliblak, “Zen Zen– nesa de ngaya tabin hip de Zi niye,” dekam zebe eraha-en gwek. Dekam zebe hen Alap zere mo hanan tabin walas hap ejowek.
²⁷ Hen emsa kim Zeno bosekam baptis dabik, dekam zebe hen anakan enaka oletreblak, “Ëe mese Kristus hun zeraha-en gwer.” Zep em angkam Bian Alap mo nwenak san de Yesus Zena kiye.
²⁸ Zep angkam nen kitak Alap mo nwenak aha-en. Zen hom nesa nwekam anakan goleake gwenda, “An Yahudi wal. An Yunani wal. An zi mo tana iltikinnik de babu gwen zi. An tana iltikinnik de babu gwen srem zi. An zi. An we.” Hwena Zen aha-ere nwe-masekam anakan nesa kara ta gwibirida, “An ano Tane naban de zeraha-en gwen zi.”
²⁹ Em de kirekam Kristus hun zeraha-en gwenkam, dekam em hen mese Abraham mo Auyan-tanenak biti gwek. Zep heꞌho gwibinni mensa Alap Abrahamsa gu-guk gweblaka, zere mo Auyan-tane hap de golblan hap dena, ki em hen esa ulin.