Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Areya’ dhaftarra para kapalana kaom se ebuwang ka Babil ban se abali abareng ban sengko’, Ezra, ka Yerusalim e bakto Artahsasta jumenneng rato:

² Gersom, dhari kaom Pinehas Daniyel, dhari kaom Itamar, Hatus ana’na Sekhanya, dhari kaom Daud, Zakhariya, dhari kaom Paros, abareng ban lalake’an dhari kaomma bannya’na saratos saeket oreng (badha catheddan silsilana reng-oreng jareya), Elyoënai ana’na Zerahya, dhari kaom Pahat-Mo’ab, abareng ban lalake’an dhu ratos oreng, Sekhanya ana’na Yahaziyel, dhari kaom Zatu, abareng ban lalake’an tello ratos oreng, Ebed, ana’na Yonatan, dhari kaom Adin, abareng ban lalake’an saeket oreng, Yesaya ana’na Ataliya, dhari kaom Elam, abareng ban lalake’an pettong polo oreng, Zebaja ana’na Mikha’el dhari kaom Sefaca, abareng ban lalake’an ballung polo oreng, Obaja ana’na Yehiyel, dhari kaom Yowab, abareng ban lalake’an dhu ratos ballu bellas oreng, Selomit ana’na Yosifiya, dhari kaom Bani, abareng ban lalake’an saratos sabidak oreng, Zakhariya ana’na Bebai, dhari kaom Bebai, abareng ban lalake’an ballu lekor oreng, Yokanan ana’na Hakatan, dhari kaom Azgad, abareng ban lalake’an saratos sapolo oreng, Elifelet, Yehiyel ban Semaya, dhari kaom Adonikam, abareng ban lalake’an sabidak oreng (reng-oreng jareya nyosol jang budhiyan), Utai ban Zabud, dhari kaom Bigwai, abareng ban lalake’an pettong polo oreng.

³ (8:2)

⁴ (8:2)

⁵ (8:2)

⁶ (8:2)

⁷ (8:2)

⁸ (8:2)

⁹ (8:2)

¹⁰ (8:2)

¹¹ (8:2)

¹² (8:2)

¹³ (8:2)

¹⁴ (8:2)

¹⁵ Galumpo’na reng-oreng jareya kabbi bi’ sengko’ epakompol e penggirra songay se agili ka kottha Ahawa; sengko’ ban reng-oreng jareya laju akemah e jadhiya tello are abidda. Saellana bi’ sengko’ epareksa, sengko’ buru tao ja’ e antarana reng-oreng jareya badha mam-imamma, tape tadha’ oreng Lewina maske settonga.

¹⁶ Sengko’ laju ngolok oreng kasanga, e antarana para pamimpin, iya areya: Eliyezer, Ariyel, Semaya, Elnatan, Yarib, Elnatan, Natan, Zakhariya, Mesulam; sengko’ ngolok keya guru kadhuwa, iya areya Yoyarib ban Elnatan.

¹⁷ Saellana jareya, reng-oreng jareya bi’ sengko’ esoro entar ka Ido, kapalana masarakat e Kasifya. Reng-oreng jareya bi’ sengko’ esoro menta ka Ido, ban ca-kancana se padha alako e Padalemman Socce sopaja ngeremmagiya reng-oreng ka sengko’, epaladinana e Padalemman Socce.

¹⁸ Dhari kasaeyanna Allah, Ido ban ca-kancana ngeremmagi ka sengko’ Serebiya, iya areya oreng Lewi se penter dhari kaom Mahli. Serebiya dhateng abareng ban na’-ana’na sarta tan-taretanna, bannya’na ballu bellas oreng.

¹⁹ Hasabya ban Yesaya dhari kaom Merari epadhateng keya; Hasabya ngeba la-balana dhu polo oreng.

²⁰ Laen dhari jareya gi’ badha pole dhu ratos dhu polo oreng se alako e Padalemman Socce se nyamana edhaftar. Bangatowana reng-oreng jareya molae lamba’ la eteptebbagi bi’ Rato Daud ban om-kaom oreng agung karaja’an epabanto oreng Lewi.

²¹ E penggirra Songay Ahawa jareya sengko’ laju ngomommagi ja’ reng-oreng jareya kabbi kodu apowasa ban marendha e ajunanna Allah. Sengko’ ban reng-oreng jareya adu’a sopaja Allah kasokana mimpin rombongan reya e dhalem parjalanan, apareng parlindhungan ka sengko’ ban ka reng-oreng jareya kabbi, ka na’-ana’na ban ka sakabbinna dhi’-andhi’na.

²² Sengko’ sengka se nyo’ona tantara jaran ka rato se ekaparlo alindhungana reng-oreng jareya e dhalem parjalanan. Sabab sengko’ la mator ka rato, ja’ Allah se esemba sengko’ ban reng-oreng reya kabbi aberkadi sapa’a bai se abakte ka Salerana ban baji’ sarta ngokom reng-oreng se ta’ esto ka Salerana.

²³ Daddi sengko’ kabbi padha apowasa sarta adu’a ka Allah nyo’on parlindhungan, ban Allah ngabbuli parnyo’onan jareya.

²⁴ Dhari mam-imam se kalonta bi’ sengko’ epele dhubellas oreng: Serebiya, Hasabya ban sapolo oreng laenna.

²⁵ Saellana jareya, reng-oreng jareya bi’ sengko’ enembangngagi salaka, emmas ban kas-pakakas sombanganna rato, para panasehat ban kaom oreng agung sarta sakabbinna oreng Isra’il, se eangguya e Padalemman Socce. Jareya kabbi bi’ sengko’ epassra’agi ka para imam jareya.

²⁶ Areya’ dhaftarra sombangan jareya: salaka ~~22 ton; pakakas dhari salaka dhu polo meggi ~~70 kilo; emmas ~~3.400 kilo; jembung emmas dhu polo meggi’ ~~8,4 kilo; jembung paronggu se ce’ bagussa, se argana padha ban jembung emmas, dhu meggi’.

²⁷ (8:26)

²⁸ Sengko’ ngoca’ ka para imam jareya, "Sampeyan ampon eteptebbagi kaangguy PANGERAN malolo, kaangguy Allah se esemba bangatowana sampeyan ban kaula, sapaneka jugan sadajana pakakas salaka sareng emmas se eatorragi ka PANGERAN ganeka namong kaangguy PANGERAN malolo.

²⁹ Jaga rang-barang ganeka pateppa’ sampe’ sampeyan napa’ ka Padalemman Socce. Sanapa’na ka’assa’, tembang rang-barang ganeka, pas passra’agi ka mam-imam kapala sareng pin-pamimpinna oreng Lewi, sareng ka pin-pamimpinna oreng Isra’il e Yerusalim."

³⁰ Mam-imam ban reng-oreng Lewi jareya pas narema salaka, emmas ban kas-pakakas jareya, egiba’a ka Padalemman Socce e Yerusalim.

³¹ E tanggal dhubellas bulan settong sengko’ ban reng-oreng laenna mangkat dhari Songay Ahawa, laju mangkat ka Yerusalim. E dhalem parjalanan jareya sengko’ kabbi padha elindhunge Allah, daddi ta’ sampe’ eserrang otaba eaddhang moso.

³² Sanapa’na ka Yerusalim, kabbi padha bu-ambu lesso tello are abidda.

³³ Saellana jareya, e are se kapeng empa’ sengko’ ban reng-oreng laenna padha entar ka Padalemman Socce, laju nembang salaka, emmas ban kas-pakakas rowa. Samarena, kabbi laju epassra’agi ka Imam Meremot pottrana Uriya, esakse’e Eleyazar pottrana Pinehas ban oreng Lewi kadhuwa, iya areya Yozabad pottrana Yesuwa ban Nowaja pottrana Binui.

³⁴ Rang-barang jareya kabbi ebitong ban etembang, laju ecathet sagenna’na.

³⁵ E are jareya keya reng-oreng se padha abali dhari pambuwangan jareya, ngatorragi kurban obbaran ka Allahna Isra’il. Se eatorragi aropa sape lake’ dhubellas meggi’ kaangguy saantero Isra’il, dumba lake’ sangang polo ennem meggi’ ban budhu’na dumba pettong polo petto’ meggi’; laen dhari jareya gi’ badha embi’ dhubellas meggi’ kaangguy kurban pangamponanna dusana reng-oreng jareya dibi’. Ban-keban jareya kabbi eobbar menangka kurban ka PANGERAN.

³⁶ Saellana jareya dhokumen se etarena dhari rato bi’ reng-oreng jareya laju eatorragi ka para gubennor ban kaom oreng agung propinsi Efrat Bara’. Daddi om-kaom oreng agung jareya apareng bantowan ka ra’yat sopaja padha’a bisa teptep abakte ka PANGERAN e Padalemman Socce.

Ezra

Video Ezra 8

Ikuti Kami:

KONTAK | PARTISIPASI | DONASI