Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Jadi dob salpu ai, sanggah panrajaion ni si Artasasta, raja ni Persia, tangkog ma hun Babel si Esra, ai ma anak ni si Seraya, anak ni si Asarya, anak ni si Hilkia,
2 anak ni si Salum, anak ni si Sadok, anak ni si Ahitub,
3 anak ni si Amarya, anak ni si Asarya, anak ni si Merayot,
4 anak ni si Seraya, anak ni si Ussi, anak ni si Buki,
5 anak ni si Abisua, anak ni si Pinehas, anak ni si Eleasar, anak ni si Aron, sintua ni malim ai.
6 Tangkog ma si Esra ai hun Babel. Sibotoh surat do ia, na pentar pasal titah ni si Musa, na binere ni Jahowa, Naibata ni Israel. Ibere raja ai do bani ganup na pinindoni, ai tangan ni Jahowa Naibatani do manogu-nogusi.
7 Tangkog do homa deba hu Jerusalem humbani halak Israel, humbani malim ampa halak Levi, humbani pandoding, humbani sijaga horbangan ampa siparugas i rumah panumbahan, ai ma papitu-tahunkon dob manrajai Raja Artasasta.
8 Jadi das ma ia i Jerusalem bulan lima, papitu-tahunkon dob manrajai raja ai.
9 Ai ari sada bulan sada do ia mamungkah tangkog hun Babel, anjaha ari sada bulan lima do ia das i Jerusalem, ai tangan ni Jahowa, Naibatani na layak ai do i babouni.
10 Ai humbani gok ni uhurni do ibahen si Esra, mamareksa titah ni Jahowa anjaha mandalankon ai, sonai homa mangajarhon titah pakon uhum i Israel.
11 Anjaha on do hata ni surat, na pinadihut ni Raja Artasasta hubani si Esra, malim anjaha sibotoh surat, na pentar pasal titah ni Jahowa pakon aturan-Ni, na hubani halak Israel ai.
12 “Ahu Artasasta, raja ni sagala raja, hubani si Esra malim in, sibotoh surat na pentar ibagas titah ni Naibata na i surga.
13 Domma hubahen parentah, sagala na marosuh uhurni ibagas harajaonku humbani bangsa Israel, malim atap halak Levi pe na sihol laho hu Jerusalem, bulih do laho rap pakon ham.
14 Ai na sinuruh ni raja in pakon panuturini sipitu halak ai do ham, laho mambahen pamareksaan pasal Juda pakon Jerusalem, domu hubani titah ni Naibatamu, na adong bamu.
15 Ampa mamboan pirak pakon omas, na binere ni raja in pakon panuturini humbani rosuhni hubani Naibata ni Israel, na marianan i Jerusalem,
16 pakon ganup pirak pakon omas guguan, na jumpah ham bani ganup tanoh Babel, rap pakon guguan, na binere ni halak simbuei ampa malim-malim humbani rosuhni, tumpak ni sidea bani rumah ni Naibatani na i Jerusalem.
17 Halani ai podas ma bolihon ham duit ai hubani lombu jonggi, biribiri tunggal, anak ni biribiri rap pakon galangan sipanganon ampa galangan siinumon hasomanni ai, anjaha galangkon ham ma ai i atas anjapanjap ni rumah ni Naibata nasiam na i Jerusalem.
18 Pasal pirak pakon omas na lobih ai, bulih do pakeion nasiam ai marguru hubani timbangan ni uhur nasiam, romban hubani rosuh ni Naibata nasiam.
19 Anjaha parugas, na dob binerehon bamu, hubani horja i Rumah ni Naibatamu, maningon ondoskononmu do ai hu lobei ni Naibata i Jerusalem.
20 Anjaha porini adong ope na porlu hubani rumah ni Naibata, na maningon sigalaronmu ope, galar ham ma ai humbani kas harajaon.
21 Anjaha ahu, Artasasta raja in, mamarentahkon hubani ganup bendahara, i dipar ni bah banggal. Barang aha na pinindo ni Malim Esra, na pentar pasal titah ni Naibata na i surga, mintor podas ma ai ipadalan,
22 sibar saratus talenta pirak, saratus kor gandum, saratus bat anggur, saratus bat minak, anjaha garam seng pala marbilangan suhatanni.
23 Barang aha na pinarentahkon ni Naibata na i surga, gok ma ai idalankon, laho manumpaki rumah ni Naibata na i surga, ase ulang sogop ringis-Ni hubani harajaon ni raja in pakon hubani anakni.
24 Ambah ni ai botoh nasiam ma, seng bulih paporsanonkon sohei, ongkos barang guguan hubani malim, halak Levi, pandoding, sijaga horbangan ampa siparugas i rumah panumbahan, hubani ganup siparhorja na i rumah ni Naibata tene.
25 Tapi anggo ham, Esra, domu hubani hapentaran ni Naibatamu, na adong bamu, pabangkit ma panrajai pakon panguhum, na manguhumi ganup bangsa ai, na i dipar ni bah banggal, ai ma ganup halak, na dob mambotoh titah ni Naibatamu; anjaha sagala na so mambotoh ai ope, ajari ma.
26 Barang ise na so mambalosi titah ni Naibatamu pakon titah ni raja in, maningon koras do uhumon ia, marhitei utang hosah barang na tarbuang, barang na hona donda atap na itutup.
27 Pinuji ma Jahowa, Naibata ni ompungta, na mamuhoi uhur na sonai ai ibagas uhur ni raja ai, laho pajengeskon rumah ni Jahowa na i Jerusalem,
28 anjaha ibahen ahu jumpahan idop ni uhur i lobei ni raja ai, pakon panuturini pakon i lobei ni haganup juakjuakni na sangap. Jadi tenger ma uhurhu, ai tangan ni Jahowa, Naibatangku do i babouhu, anjaha hupatumpu ma humbani Israel sipambobai, na sihol rap tangkog pakon ahu.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA