Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Emaka iperentahken Raja Darius gelah ipepayo kerina surat-surat kerajan si isusun i Babil.
2 Tapi i kota Ekbatana, i bas propinsi Media nge gulungen surat e terdat. Isina bagi si tersena si arah teruh enda:
3 "I bas tahun si pemena pemerentahenna raja Kores, merentahken maka Rumah Pertoton i Jerusalem ipajekken ka mulihi man ingan nehken persembahen gelehen ras persembahen tutungen. Rumah Pertoton e ganjangna dua pulu pitu meter janah belangna dua pulu pitu meter.
4 Dingdingna ibahan ilapisi selambar kayu i babo tiap telu lapis batu. Kerina kinikerin igalari perbendaharan kerajan.
5 Bage pe perkekas-perkekas emas ras pirak si ibaba Raja Nebukadnesar nai ku Babil i bas Rumah Pertoton i Jerusalem nari, arus iulihken ku bas inganna si payo i bas Rumah Pertoton i Jerusalem."
6 Kenca bage ikiremken Darius balasen si tersurat arah teruh enda: "Man Tattenai, Gubernur Eprat Barat ras Setar Bosenai bage pe teman-temanndu pegawai i Eprat Barat. Ula deherindu Rumah Pertoton e,
7 janah ula campurindu dahin e. Pelepas gubernur Juda ras peminpin Jahudi e majekken Rumah Pertoton Dibata mulihi i bas inganna si gelgel.
8 I jenda kuperentahken man bandu gelah isampatindu kalak e majekkenca. Kerina kinikerin arus igalarindu man kalak e, ula terlat, janah buat i bas kas kerajan si ialoken i bas duit pajak propinsi Eprat Barat, gelah dahin e ula lang-lang.
9 Tep-tep wari, arus tetap iberekenndu man imam-imam i Jerusalem kai keperlun si ikataken man bandu: jenggi lembu si nguda denga, biri-biri, ntah anak biri-biri si man tutungen jadi persembahen Dibata Surga, ntah gandum, sira, lau anggur, tah minak saitun.
10 Si enda arus ilakoken gelah banci ipersembahkenna persembahen si ngena ate Dibata Surga dingen ertoto mindo pasu-PasuNa guna aku ras anak-anakku si dilaki.
11 Tole pe kuperentahken: ise si la ngikutken perentah enda arus idekdek sada beloti i bas rumahna nari, jenari itelapi sada ujungna, kenca bage ipantemken ku bas beltekna seh telpus. Janah rumahna iruntuhken jadi gun-gunen sampah-sampah.
12 Dibata, si milih Jerusalem jadi ingan ersembah man BaNa, Ialah si ngambengken raja tah bangsa si ngelanggar perentah enda ras ncubakenca ncedaken Rumah Pertoton si lit i bas kota e. Perentah enda la banci la ipatuhi tuhu-tuhu. Aku, si mereken perentah enda." Raja Darius
13 Kenca bage gubernur Tattenai, Setar Bosenai, ras teman-temanna pegawai si deban, nehken perentah Raja Darius, sitik pe la nimpang.
14 Emaka peminpin-peminpin Jahudi nerusken pembangunen Rumah Pertoton e, si erdalan alu mehuli alu penjemba-jemba Nabi Hagai ras Sakaria. Idungina Rumah Pertoton e sue ras si nggo iperentahken Dibata Israel ras si iperentahken Kores, Darius, ras Artasasta, raja Persia.
15 Rumah Pertoton e nggo dung i bas wari si peteluken bulan Adar, i bas tahun peenemken pemerentahen Raja Darius.
16 Kenca bage bangsa Israel, imam-imam, kalak Lewi, ras kerina kalak si deban, si nggo mulih i pembuangen nari alu ukur meriah mengket Rumah Pertoton e.
17 Guna kerja mengket Rumah Pertoton e ipersembahkenna seratus jenggi lembu, dua ratus biri-biri, ras empat ratus anak biri-biri jadi persembahen gelehen, ras sepulu dua kambing jadi persembahen pengalemi dosa, sada guna tiap suku Israel.
18 Tambah si e iaturkenna pe imam-imam ras kalak Lewi guna ndahiken dahin-dahin i bas Rumah Pertoton i Jerusalem, sue ras pedah-pedah si isuratken i bas kitap Musa.
19 Kalak si nggo mulih i pembuangen e nari ngerayaken Paskah i bas wari si pesepuluempatken bulan si pemena.
20 Kerina imam-imam ras kalak Lewi nggo mbersihken dirina, emaka nggo ia bersih rikutken aturen agama. Jenari kalak Lewi nggeleh asuh-asuhen si man persembahen i bas wari Paskah e guna kerina kalak si nggo mulih i bas pembuangen e nari, bage pe guna imam-imam ras kalak Lewi e jine.
21 Si atan man persembahen e, eme kalak Israel si nggo mulih i bas pembuangen nari, bage pe kalak si ngiani negeri e si lanai nggit ngikutken lagu langkah perbegu si melket e, jenari reh ia nembah man TUHAN.
22 Pitu wari dekahna kalak ndai ngerayaken Pesta Roti si la itama Ragi e alu dem keriahen. Meriah kal ukur kalak ndai erkiteken ibahan TUHAN nggo mehuli ukur raja Assur man bana seh maka isampati raja e ia i bas dahin majekken mulihi Rumah Pertoton Dibata nu Israel.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA