Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ E taon se kapeng settong pamarenta’anna Kores, rato Persiya, PANGERAN alampa’agi apa se la edhabuwagi kalaban parantara’anna Yeremiya. PANGERAN maguli atena Kores kaangguy makalowar parenta se ebaca’agi e saantero karaja’anna. Essena parenta jareya kantha reya:

² "Areya’ parentana Kores, rato Persiya. PANGERAN, Allah se ngobasane sowarga mele sengko’ epadaddi rato se marenta saantero dunnya, ban sengko’ eparenge papakon kaangguy maddeggagi Salerana padalemman e Yerusalim e dhaera Yehuda.

³ Moga-moga Allah alindhungana ba’na kabbi se daddi ommadda. Sateya ba’na kodu mole ka Yerusalim, paddek pole Padalemman Soccena ALLAH Isra’il, Allah se alenggi e Yerusalim.

⁴ Mon badha ommadda e kennengngan pambuwangan reya se buto bantowan kaangguy mole ka Yerusalim, ga-tatanggana kodu aberri’ bantowan jareya. Oreng jareya kodu eberri’ bantowan se aropa salaka ban emmas, sango se ekaparlo e dhalem parjalanan sarta keban kaangguy ngeba dhi’-andhi’na, bariya keya tor-ator se bakal egiba’a ka Padalemman Socce e Yerusalim."

⁵ Saellana jareya para kapalana kaom e dhalem suku Yehuda ban Benyamin, mam-imam ban reng-oreng Lewi, sarta saneyap oreng se atena epaguli bi’ PANGERAN, akes-rengkes moleya ka Yerusalim maddegga pole Padalemman Socce jareya.

⁶ Ga-tatanggana kabbi padha aberri’ bantowan se aropa rang-barang, akantha pakakas dhari salaka ban emmas, sango se ekaparlo e dhalem parjalanan, keban kaangguy ngeba dhi’-andhi’na, sarta rang-barang laenna, ban tor-ator se egiba’a ka Padalemman Socce.

⁷ Bung-jembung ban kor-bukor se bi’ Rato Nebukadnezar ekala’ dhari Padalemman Socce e Yerusalim pas eangko’ esaba’ e kowella ba-dibana dibi’, bi’ Kores epabali ka ommat Isra’il.

⁸ Rang-barang jareya epassra’agi ka Mitredat, kapalana parbendhara’anna karaja’an. Mitredat pas adhaftar rang-barang jareya; dhaftar jareya ebagi ka Sesbazar, gubennor Yehuda.

⁹ Areya’ dhaftarra rang-barang jareya: bung-jembung emmas kaangguy opacara tor-ator ka Pangeran ~~30; bung-jembung salaka kaangguy opacara tor-ator ka Pangeran ~~1.000; bung-jembung laenna ~~29; bung-jembung emmas se ne’-kene’ ~~30; bung-jembung salaka se ne’-kene’ ~~410; pakakas laenna ~~1.000;

¹⁰ (1:9)

¹¹ Jembung emmas ban salaka sarta rang-barang laenna jareya bannya’na kabbi lema ebu pa’ ratos meggi’. E bakto Sesbazar ban reng-oreng laenna se mole dhari pambuwangan e Babil mangkat ka Yerusalim, rang-barang jareya kabbi egiba bi’ Sesbazar.

Ezra

Video Ezra 1

Ikuti Kami:

KONTAK | PARTISIPASI | DONASI