Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 PANGERAN adhabu ka sengko’,
2 "He, manossa se ta’ langgeng, Sengko’ GUSTE Allah Se Mahatenggi, ngoca’agiya parkara reya ka tana Isra’il: Reya’ aherra saantero nagara reya!"
3 Pangeran adhabu, "He, Isra’il, sateya la napa’ baktona ba’na se tompessa. Ba’na bakal taowa rassana peggella Tang ate. Bi’ Sengko’ ba’na eadilana menorot lalakonna ba’na se juba’.
4 Bi’ Sengko’ ba’na ta’ ekaneserrana ban ta’ esapora’a. Bi’ Sengko’ ba’na eokoma menorot sakabbinna kajuba’an se la elakone ba’na. Daddi ba’na tao ja’ Sengko’ reya PANGERAN."
5 Reya’ se edhabuwagi GUSTE Allah Se Mahatenggi ka bangsa Isra’il, "Balai se settong bakal nyosola balai laenna teba’a ka ba’na.
6 Sateya kabbi la mare. Reya’ dhi-budhina ba’na. Tadha’ pangarebban pole ka ba’na.
7 Kabbi la obus monggu ka ba’na, he, bangsa se badha e tana reya. Sateya la tadha’ ta-pesta e ba-mezba e pagunongan, se badha pera’ kabadha’an se salbut.
8 Sakejja’ aggi’ ba’na bakal taowa rassana peggella Sengko’ se talebat rajana. Bi’ Sengko’ ba’na eadili menorot lalakonna ba’na. Sakabbinna lalakonna ba’na se juba’ bi’ Sengko’ ebalessa kabbi.
9 Bi’ Sengko’ ba’na ta’ ekaneserrana ban ta’ esapora’a. Sengko’ ngokoma ba’na menorot kajuba’an se la elakone ba’na. Daddi ba’na tao ja’ Sengko’ reya PANGERAN, ban Sengko’ se ngokom ba’na."
10 Are balai monggu ka Isra’il la dhapa’. Oreng ngalakone kakerrasan sarep-karebba. Kasombongan napa’ ka batessa.
11 Kakejjemman nambai kajahadan. Kasogiyan, kaagungan ban kajaja’anna oreng Isra’il bakal tompessa kabbi.
12 Baktona la para’, arena la semma’! Oreng se melle ban se ajuwal ta’ olle kaontongan pa-apa sabab okomanna Allah bakal teba’a ka sakabbinna oreng.
13 Tadha’ sodagar se sempada narema pole pa-apa se ejuwal, sabab babendunna Allah teba ka sapa’a bai. Oreng se jahat ta’ kera salamet.
14 Tarompet amonye ban reng-oreng padha aya-sadhiya kabbi. Tape tadha’ oreng settonga se mangkada ka paperrangan sabab babendunna Allah teba ka sakabbinna oreng.
15 E rong-lorongnga kottha badha paperrangan, e ko-bengko badha panyaket ban kalaparan. Sapa’a bai se badha e lowar kottha bakal mateya e dhalem paperrangan, ban se badha e kottha bakal daddiya kurbanna panyaket ban kalaparan.
16 Sabagiyan bakal salamedda, pas buru ka pagunongan, akantha dara se eagga dhari ra-cora; padha nanges aserrowan polana sa-dusana.
17 Saneyap oreng bakal lempowa tanangnga, ban to’odda ngetter.
18 Reng-oreng jareya bakal akalambiya karong, sabadan ngetter kabbi. Cethagga bakal epagundhula, ban epamalo.
19 Emmas ban salaka bi’ reng-oreng jareya bakal ebuwanga e lorong akantha kas-rakas, sabab e are bakto PANGERAN neba’agi babendunna, emmas ban salaka ta’ bisa nolong masalamet aba’na, la’-mala’ ajuruggagi aba’na ka dhalem dusa. Emmas ban salaka jareya la ta’ ekenneng angguy norodi napsona otaba makennyang tabu’na.
20 Lamba’ reng-oreng jareya gumbira polana andhi’ mamatan se bagus, tape sarrena mamatan jareya ekagabay la-brahala se majitjit, bi’ PANGERAN rang-barang dhi’-andhi’na reng-oreng jareya epadaddi barang se nako’e.
21 PANGERAN adhabu ka bangsa Isra’il, "Bi’ Sengko’ reng-oreng manca epannengnga arampok ba’na. Reng-oreng jahat bakal arampasa dhi’-andhi’na ba’na ban manajjisa rang-barang jareya.
22 Sengko’ neng-ennengnga mon Tang Padalemman eparosak otaba epacemmer bi’ gal-bigal.
23 Sanagara salbut. E man-dhimman badha oreng epate’e oreng kalaban kejjem.
24 Sa-bangsa se paleng galak bi’ Sengko’ epadhatengnga epangennengngana ko-bengkona ba’na. Go-jagona ba’na se paleng kowat bakal arassa’a tako’ mon sa-bangsa jareya bi’ Sengko’ epanneng maancor sakabbinna kennengnganna kabakteyanna ba’na.
25 Reng-oreng jareya sossa ban potos pangarep, pas nyare kataremtemman, tape ta’ nemmo.
26 Balai ban kabar juba’ dhateng ros-terrosan. Ba’na bakal menta’a ka bi-nabbi sopaja endha’a aramal, tape tadha’ se bisa’a. Bariya keya mam-imam ta’ andhi’ pa-apa se eajarragiya ka ommadda, ban para pamimpin ta’ andhi’ babala’an pa-apa pole.
27 Rato bakal nangesa, ana’na rato bakal potosa pangarep, ban ra’yat bakal ngetterra katako’an. Bi’ Sengko’ ba’na eokoma menorot lalakonna, ban eadilana akantha ba’na se ngadili oreng laen. Daddi ba’na pas tao ja’ Sengko’ reya PANGERAN."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA