Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai ibobai ma ahu hu horbangan ai, ai ma horbangan parhapoltakan ai.
2 Tonggor ma, roh do hamuliaon ni Naibata ni Israel hun hapoltakan, anjaha sora ni parrohni ai songon parhasak ni bah marbanggal do; jadi lihar do tanoh ai halani hamuliaon-Ni ai,
3 Ia pangungkabon na huidah ai, usih do ai bani pangungkabon na huidah ijia, sanggah roh Jahowa laho mangagou huta ai, anjaha usih bani pangungkabon na huidah i lambung ni Bah Kebar; jadi manrogop ma ahu.
4 Masuk ma hamuliaon ni Jahowa hubagas Rumah na Mapansing ai hun horbangan parhapoltakan ai;
5 jadi iangkat Tonduy ai ma ahu, lanjar iboan ma ahu hu alaman parbagas ai. Tonggor ma, hamuliaon ni Jahowa do manggoki Rumah na Mapansing ai.
6 Sanggah na jonjong ai dalahi ai i lambungku, hutangar ma adong na marsahap hu bangku hun Rumah na Mapansing ai,
7 nini ma hu bangku, Ale anak ni jolma, ianan on do hajongjongan ni paratas-Ku ampa sidogeian ni jampal ni nahei-Hu; ijon do Ahu marianan i tongah-tongah ni halak Israel ronsi sadokah ni dokahni. Anjaha seng be pabutakon ni ginompar ni Israel goran-Ku na Mapansing in, sidea age raja-raja ni sidea marhitei parnaibata silebanon ni sidea, atap marhitei bangkei ni raja-raja ni sidea, bani parmatei ni sidea,
8 marhitei na pajongjong molmolanni i lambung ni molmolan-Ku, labahni bani labah-Ku, pitah tembok mando holangkolang-Ku humbani sidea. Ibutaki sidea do goran-Ku na pansing in marhitei hasamboron na hinorjahon ni sidea ai, gabe Huboiskon sidea ibagas ringis-Ku.
9 Tapi sonari, ipadaoh sidea ma parnaibata silebanon ni sidea ai ampa bangkei ni raja-raja ni sidea hun Bangku, ase marianan Ahu i tongah-tongah ni sidea ronsi sadokah ni dokahni.
10 Ai pe, ale anak ni jolma, patorang ma bani ginompar ni Israel pasal Rumah Panumbahan on, rupani ampa popouni, ase maila sidea halani hajahaton ni sidea ai.
11 Anggo domma maila sidea halani haganup pambahenan ni sidea ai, patorang ma bani sidea pasal rupa ampa poupou ni Rumah Panumbahan ai, pasal dalan kaluar ampa dalan masuk ampa rumang ni haganupan ai; pabotohkon ma bani sidea haganup pasal aturanni ampa titahni; suratkon ma ai i lobei ni sidea, ase iparuhurhon anjaha idalankon sidea haganup titah ampa aturan-aturanni.
12 On ma titah pasal Rumah Panumbahan ai: haganup ianan inggot bani pakpak ni dolog ai pansing tumang do ai. Tonggor ma, ai ma titah pasal Rumah Panumbahan ai.
13 On do sibaran ni anjapanjap ai, mangihutkon asta na ganjangan santopap humbani asta na somal: Onjolanni saasta gijangni anjaha saasta bolagni, anjaha marbibir inggot, sanjongkal gijangni.
14 On ma gijang ni anjapanjap ai; humbani onjolanni na bani tanoh das bani tangga partoruh dua asta anjaha bolagni sada asta; humbani tangga sietekan ai hubani tangga sibolagan ai ompat asta do anjaha saasta bolagni.
15 Tataring panggalangan ai ompat asta do gijangni; humbani tataring ai adong do jurjur hu atas ompat tanduk, saasta gijangni.
16 Ia tataring ai marompat suhi do, sapuluh dua asta ganjangni anjaha sapuluh dua asta bolagni.
17 Ia tangga-tangga sibolagan ai sapuluh ompat asta do ganjangni anjaha sapuluh ompat asta do bolagni, ase marompat suhi do. Marbibir inggot satongah asta bolagni, anjaha onjolanni sada asta do inggot. Mandompakkon hapoltakan do tanggani.
18 Dob ai nini ma dompak ahu, “Ale anak ni jolma, sonon do hata ni Tuhan Jahowa: On ma aturan pasal anjapanjap ai: Bani ari ai, siapkonsi ai, laho manggalangkon galangan situtungon i atas ni ai, anjaha laho mamispiskon daroh hujai,
19 bere ma sada anak ni lombu bahen galangan pardousaon bani malim-malim halak Levi ai, ginompar ni si Sadok, na bulih roh mandohori Ahu, laho marugas Bangku, nini Tuhan Jahowa.
20 Anjaha buat ma deba humbani darohni ai, anjaha nahkon ma ai bani tanduk na ompat ai ampa bani haompatsi suhi-suhi ni tangga-tangga ai, ampa bani bibirni inggot; sonai ma urasonmu anjapanjap ai, laho mambahen pardearan pasal ai.
21 Ningon buatonmu do homa anak ni lombu galangan pardousaon ai, anjaha itutung ma ai bani ianan na tinontuhon hujai, i darat ni ianan na mapansing ai.
22 Anjaha padua-arihon maningon galangkononmu do sada hambing tunggal, na so martikas bahen galangan pardousaon, ase hona uras anjapanjap ai, songon na dob huuras ai marhitei anak ni lombu.
23 Dob siap iuras ho anjapanjap ai, maningon galangkononmu do sada anak ni lombu na so martikas ampa sada biribiri tunggal na so martikas humbani hulanan ai.
24 Haduasi do ai galangkononmu i lobei ni Jahowa, anjaha maningon tirtirhonon ni malim do garam hu atasni, anjaha igalangkon ai songon galangan situtungon bani Jahowa.
25 Pitu ari dokahni maningon pasirsironmu do ganup ari sada hambing tunggal bahen galangan pardousaon; sonai homa sada anak ni lombu ampa sada biribiri tunggal na so martikas humbani hulanan ai maningon pasirsiron do.
26 Pitu ari dokahni maningon bahenon ni sidea pardearan pasal anjapanjap ai anjaha urasonni ai, sonai ma ipapansing ai.
27 Anjaha dob salpu ari ai, jadi paualuh-arihon ampa torus i pudini ai maningon galangkonon ni malim do bani anjapanjap ai galangan situtungonnima ampa galangan pardameiannima; jadi marosuh ma uhurhu mangidah hanima, nini Jahowa.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA