Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 GUSTE Allah Se Mahatenggi adhabu ka sengko’, "He, manossa se ta’ langgeng, mara anyanye nyanyeyan pangoburan reya kaangguy Tirus, kottha paseser se adagang ban pandhudhu’na saneyap paseser. Kabala apa se ekoca’agi Sengko’, GUSTE Allah Se Mahatenggi: Tirus, ba’na masombong ngoca’ kantha reya, ‘Sengko’ raddin tadha’ calena.’
2 (27:1)
3 (27:1)
4 Monggu ka ba’na tase’ daddi bengkona. Ba’na epaddek epakantha kapal se bagus ropana.
5 Geddhungnga ba’na kaju aras dhari Gunong Hermon, canggana lajarra kaju comara dhari Libanon.
6 War-guwarra ba’na ekagabay dhari ju-kajuwan raja e Basan. Galadhagga dhari kaju comara se dhari kapolowan Siprus asalla, rarengganna dhari gaddhing okeran se larang.
7 Lajarra dhari kaen linen, gabayan Messer, ngangguy solaman se ana-barna. Tendhana dhari kaen se alos kaen dhari Siprus se abarna bungo terrong.
8 Tokang guwarra dhari Sidon ban Arwad. Reng-oreng kapalanna padha ahli.
9 Kang-tokang kaju se alako e kapalla ba’na, tokang se padha penter dhari Gebal. Pal-kapal dhateng dhari saneyap nagara mabadha’a hubungan dagang ban ba’na.
10 Rit-parjurit dhari Persiya, Lidiya ban Libiya maso’ daddi tantarana ba’na. Reng-oreng jareya agantong tameng ban songko’ bajana e dhung-geddhungnga kotthana ba’na, abanto makala so-mosona ba’na ban nambai kakalonta’anna ba’na.
11 Rit-parjurit dhari Arwad ajaga e dhung-geddhungnga ba’na; ra-manarana ba’na ekawal reng-oreng dhari Gamad. Tamengnga reng-oreng jareya egantong epajajar e geddhungnga ba’na. Reng-oreng jareya se magenna’ kabagusanna ba’na.
12 Ba’na ajuwal rang-barang daganganna se talebat bannya’na jareya e Spanyol, ban ba’na narema bajaran aropa salaka, besse, tema pote ban tema celleng.
13 Ba’na adagang e Yunani, e Tubal ban e Mesekh, ban menangka bajaranna ba’na narema nor-dunor ban rang-barang dhari parunggu.
14 Rang-barangnga ba’na eporop ban jaran kareta, jaran tompa’an ban jaran buwadan dhari Bet-Togarma.
15 Pandhudhu’ Rodus adagang ban ba’na keya ban pandhudhu’ paseser melle rang-barang daganganna ba’na, eporop bi’ gaddhing sarta kaju celleng.
16 Gar-sodagar dhari nagara Siria melle rang-barang daganganna ba’na ban sel-hasella ba’na se bannya’ jareya. Reng-oreng dhari Siria jareya majar ngangguy mamatan dhari bato jamerrut, kaen bungo terrong towa asora’ mera, kaen solaman, kaen linen alos, mamatan dhari bato koral ban bato mera dalima.
17 Yehuda ban Isra’il morop rang-barang daganganna ba’na bi’ gandum, maddu, mennya’ jaitun ban palappa.
18 Pandhudhu’ Damsyik melle rang-barang daganganna ba’na sarta sel-hasella nagarana ba’na, ebajar ban anggur dhari Helbon, buluna dumba dhari Sahar, besse tempa’an ban palappa.
19 (27:18)
20 Pandhudhu’ Dedan majari rang-barangnga ba’na ngangguy en-kaen pa-kapa.
21 Oreng Arab ban pangobasana tana Kedar majari rang-barangnga ba’na ngangguy budhu’na dumba, dumba lake’ ban embi’.
22 Bi’ sodagar dhari Syeba ban Ra’ema rang-barangnga ba’na eporobi mamatan, emmas ban palappa se paleng bagus.
23 Tha-kottha Haran, Kane, Eden, gar-sodagar dhari Syeba, tha-kottha Asyur ban Kilmad, kabbi padha adagang ban ba’na.
24 Reng-oreng jareya ajuwal ka ba’na kalambi se gus-bagus ban larang, kaen bungo terrong towa asora’ mera, kaen solaman, but-babut se ana-barna ban le-tale se koko.
25 Barang daganganna ba’na eangko’ ban kapal se areng-erengan, pal-kapal dagang se ja-raja. Ba’na akantha kapal se sarat buwadanna, kapal se ngaronge sagara.
26 Bi’ kang-tokang guwar ba’na egiba ka tase’ sampe’ ka tengnga. Ba’na eantem angen temor se talebat santa’na.
27 Sakabbinna barang dagangan buwadanna ba’na, sakabbinna bandhigana ba’na, sakabbinna tokang kaju ban sodagarra, saneyap parjurit e kapal jareya, padha elang tasellem e bakto ba’na karem.
28 Para bandhigana acerreng polana tako’, cerrengnga ekaedhing ka gir-penggir tase’.
29 Sateya pal-kapal jareya padha edina, para bandhigana padha ongga ka tenggangan.
30 Reng-oreng jareya padha nangese nasibba ba’na, padha aserro ban nanges ce’ ngennessa; padha aburbur abu e cethagga, lu’-gulu’an e abu menangka tandha sossa.
31 Polana ba’na reng-oreng jareya agundhul obu’na, ngangguy kaen karong menangka tandha sossa. Padha nanges ce’ ngennessa nangese nasibba ba’na.
32 Ba’na laju ngejung lagu pangoburan, ‘Tirus, sapa tandhinganna ba’na? Tirus, e tase’ sateya ba’na ta’ metto caca.
33 E bakto ba’na ngaronge tase’ raja, ngeba buwadan se berra’, ba’na nyokobi kabutowanna sa-bangsa; to-rato bi’ ba’na epasogi keya.
34 Sateya ba’na la nyellem ancor e dhasarra sagara. Reng-oreng se alako e kapalla ba’na ban sakabbinna buwadanna elang noro’ tasellem ban ba’na e tengnga tase’ raja.’
35 Reng-oreng paseseran padha katako’an ngedhing parkara nasibba ba’na. Bariya keya to-ratona, katako’anna atena katon e mowana.
36 Ba’na elang salanjangnga. Gang-dagang sadunnya padha baridhu polana tako’ ngalame nasibba akantha ba’na."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA