Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nakana Batara mae ri nakke,
2 "He tau, tunrai pa’rasangang Amon.
3 Suroi anjo bansaya ampilangngeri apa Kupaua, iNakke, Batara Kaminang Tinggia, mae ri ke’nanga, angkana, ‘Sannangi nyawanu anciniki BallakKu nira’massi siagang butta Israel nipanraki kammayatompa bansa Yahudi niengka’ mange ri pammelakkanga.
4 Lanri kammana anjo laKulappassangko nibeta ri suku-suku bansa battua ri parang rayangnganga. Lanabangungi ke’nanga kema-kemana ri pa’rasangannu nampa ammantang tuli anjoreng. Lanakanrei ke’nanga rappo-rappoannu siagang lanainungi ke’nanga dadi’na olo’-olo’nu.
5 Kota Raba la’jari tampa’ pakkalawakiang unta, siagang sikontu pa’rasangang Amon la’jari tampa’ pakkalawakiang gimbala’. Jari nuassemmi angkanaya iNakkemi Batara.’"
6 Nakana Batara Kaminang Tinggia, "Attempa limako siagang a’rannu-rannuko. Nupakatunai butta Israel.
7 Lanri kammana anjo laKupassareangko mae ri jaia bansa, ia langngellaki siagang anrampasaki apa-apannu. LaKupanrakiko, sa’gennu takkulleamo a’jari se’re bansa, siagang tena tommo pa’rasangang kalennu. Nampa nuassemmo angkanaya iNakkemi Batara."
8 Nakana Batara Kaminang Tinggia, "Napaui Moab angkanaya anjo Yehuda sangkammai siagang bansa-bansa maraenga.
9 Lanri kammana anjo, sikamma kota-kota ampartahangkangai sikamma pa’baeng-baenna Moab, laKulappassangi nibunduki ri musu-musua, kammayami kota-kota kaminang ga’gaya iamintu: Bet-Yesimot, Baal-Meon siagang Kiryataim.
10 LaKulappassangi suku-suku battu rayaya ri parang lompoa ambetai Moab siagang pa’rasangang Amon, sa’genna takkulleamo Moab a’jari se’re bansa.
11 LaKuhukkungi Moab, nampa naassemmo angkanaya iNakkemi Batara."
12 Nakana Batara Kaminang Tinggia, "Bansa Edom le’baki nagaukang sala lompoa, lanri a’gau’ pallaki mae ri Yehuda, salaku tindakang pa’balassang.
13 Lanri kammana anjo Kupa’la’bangi Kupau angkanaya laKuhukkungi Edom siagang Kubunoi sikamma taua kammayatompa sikamma olo’-olo’ niaka anjoreng. Sikontu anjo pa’rasanganga, appakkaramula battu ri Téman sa’genna mange ri kota Dedan, Kupa’jari sino kabusuki; ra’ya’na lamatei lalang pa’bundukang.
14 BansaKu Israel laKupakei untu’ ampa’balassi Edom; siagang Edom lanihukkungi situru’ kahebakkanna pangngalarroingKu. Lanaassengi Edom angkanaya antekamma kasia’na nitujua ri pangngalarroingKu. INakke, Batara, anne akkana."
15 Nakana Batara Kaminang Tinggia, "Tu Filistin le’baki a’balasa’ palla’ mae ri musu lompona, siagang napanraki ke’nanga lanri birisi’na.
16 Lanri kammana anjo laKupa’la’bangi Kupau angkanaya iNakke lambunduki tu Filistin siagang ampanraki ke’nanga. Sikamma niaka tassesa ri daera pa’birinna Filistin laKubunoi.
17 LaKuhukkung lompoi ke’nanga siagang laKupa’betteseki larro boli’-bolikKu sa’genna sangga pakkasiakKu. Punna napisa’ringi ke’nanga pangngalarroingKu, naassemmi ke’nanga angkanaya iNakkemi Batara."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA