Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kata TUHAN seh man bangku nina,
2 "O manusia si ermasap-masap, nubuatkenlah ukumen nandangi nabi-nabi Israel si mahan-mahani nubuatna jine. Suruh ia megiken kata TUHAN."
3 Enda me si ikataken TUHAN, "Cilaka me nabi-nabi si motu e! Ia ernubuat rikutken sura-sura ukurna, dingen pengenehenen si ibahan-bahanina.
4 O bangsa Israel, nabi-nabindu sitik pe la erguna, bali ras serigala si tading i bas runtuhen kota.
5 La ia erjaga i bas ingan tembok si nggo runtuh janah la ipehulina pe tembok si nggo runtuh e. Erkiteken si e Israel la terperentahken adi reh pagi perang tupung wari TUHAN.
6 Pengenehenenna la tuhu, janah nubuatna pe guak. Ikatakenna maka katangKu nge si ipesehna, tapi situhuna labo lit ia Kusuruh. Kuga banci seh bagi si inubuatkenna?
7 Kukataken man bana, 'Pengenehenenndu e labo tuhu, janah nubuatndu e guak nge. Ikatakenndu maka katangKu si ibelaskenndu, tapi Aku la pernah ngerana man bandu.'"
8 Erkiteken si e TUHAN si Erdolat ngataken man bana kerina, "Katandu e labo tuhu, janah pengenehenenndu guak nge. Emaka Kulawan kam.
9 Kuukum me kerina nabi-nabi si pengenehenenna palsu dingen nubuatna mabai kalak papak. Lanai banci kam ikut mereken keputusen i bas runggun bangsangKu; gelarndu lanai isuratken i bas gelar-gelar bangsa Israel; ndigan pe lanai kam mulih ku negerindu. Kenca bage ietehndu me maka Aku kap TUHAN si Erdolat.
10 Kam mabai bangsa e papak alu ngataken maka kerinana nge sikap. Kepeken situhuna sitik pe labo sikap. BangsangKu majekken tembok alu batu si longgar-longgar, jenari reh ka kam engkapurisa.
11 O nabi-nabi palsu, nandangi runtuh me tembokndu e. Kupesusur me udan meder, udan baho ndabuh ku je, janah angin meter ngembuskenca.
12 Emaka runtuh me tembok e, jenari kerina kalak ngataken maka labo lit gunana tembok e ikapuri."
13 Genduari, enda me si ikataken TUHAN si Erdolat, "Erkiteken nembehna ateKu, Kusuruh me angin meter, udan meder, ras baho engkernepken tembok e.
14 Kuruntuhken ateKu tembok si ikapurindu e, kuperperken, janah palasna nari ngenca Kupediat tading. Runtuh me ia janah mate kam ibulakina. Kenca bage ietehndu me kerina maka Aku kap TUHAN.
15 Tembok e ras si ngapursa, inanamindu me uga sangatna rawangKu. Kenca bage Kukataken man bandu maka tembok e nggo getem, bali ras kam si ngapursa,
16 nabi-nabi si perguak, si ngataken man Jerusalem maka kerina nge sikap, i ja si tuhuna kai pe la sikap," bagen nina TUHAN si Erdolat.
17 Nina TUHAN, "Genduari, o manusia si ermasap-masap, perdiatekenlah diberu-diberu si lit i tengah-tengah bangsandu si erbahan nubuat. Ernubuatlah kam kerna ukumen,"
18 janah kataken man bana katangKu, Aku TUHAN si Erdolat nindu, "Cilaka me kam o diberu tukang nubuat! Itamakenndu ajimat i bas pergelangen tan kalak kerina, bage pe tudung penangkal i bas takal kalak, gelah alu si e banci ikuasaina geluh kalak si deban. Atendu engkuasai pate-geluh bangsa Dibata janah ipakendu kuasandu guna kepentingenndu jine.
19 Ikaruskenndu Dibata i lebe-lebe BangsaNa lako ndatken piga-piga ngkerauk gandum ras piga-piga ncepik roti. Ibunuhndu kalak si la ersalah, janah kalak si patut mate ipelepasndu nggeluh. Guna si e iguakindu bangsa Dibata janah tek ka ia man bandu."
20 Emaka genduari bage nina TUHAN si Erdolat, "Ciga ateKu ngidah ajimat-ajimat si ipakendu i bas pergelangen tanndu e, sabap alu si e atendu engkuasai pate geluh bangsangKu. Emaka Kusintapken nge pagi e i bas tanndu nari jenari Kubebasken kalak si ikuasaindu e.
21 Kusintapken me tudung penangkalndu janah Kubere bangsangKu pulah i bas kuasandu nari seh rasa lalap. Kenca bage itehndu me maka aku kap TUHAN."
22 "Alu kata guak si iturikenndu ceda ibahanndu kalak si bujur ukurna, selangsa Aku jine la ateKu ceda. Kalak jahat la ipelepasndu mperobahi lagu langkahna gelah ula ia terkelin.
23 Erdandanken si e pengenehenndu si palsu ras nubuatndu si papak e genduari ipengadi. Kupulahi bangsangKu i bas kuasandu nari, gelah itehndu maka Aku kap TUHAN."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA