Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nampa appialimo Musa ri Batara angkana, "Mingka antekamma ebara’ angkana taerokai tu Israelka tappa’ siagang taerokai anjampangi kana-kanangku? Apa musti kugaukang ebara’ angkana nakana ke’nanga tena nale’ba’ Napappicinikang KalenNa Batara mae ri nakke?"
2 Akkuta’nammi Batara ri Musa angkana, "Apa antu ri limannu?" Appialimi Musa angkana, "Takkang".
3 Nakanamo Batara, "Buangi naung ri buttaya antu takkanga." Nabuammi Musa anjo takkanga, nampa tappinra anjo takkanga a’jari ulara’. Larimi Musa ampakabellai kalenna.
4 Nakanamo Batara ri Musa, "Reppesimi anjo ularaka siagang ta’galaki ingkonna." A’reppese’mi Musa nampa nata’gala’ anjo ularaka. Apaji natappinramo silalonna anjo ularaka a’jari takkang lalang limanna Musa.
5 Nakana Batara, "Gaukammi anjo kammaya sollanna tappa’ tu Israel angkanaya iNakke, Batara, Allata’alana boe-boena ke’nanga, Allata’alana Abraham, Ishak siagang Yakub, le’ba’ ampappicinikangi KalenNa mae ri kau."
6 Nakana pole Batara ri Musa, "Pantamaki limannu ri bajunnu." Mannurukimi Musa, na ri wattunna nabeso’ limanna assulu’, a’jari kebo’ dudumi anjo limanna lanri nitabai ri garring bukkuleng lompoa bahayana.
7 Nampa Nakana Batara, "Pantamaki ammotere’ anjo limannu ri bajunnu." Nagaukammi Musa anjo kammaya, na ri wattunna napasulu’ pole ammotere’, a’jari baji’mi ammotere’ anjo limanna.
8 Nakana Batara, "Punna taeroka tappa’ ke’nanga mae ri kau, yareka tena nayaking ri le’ba’namo nacini’ anjo gau’ malompo makase’rea, iami anne gau’ malompo makaruaya lampa’jari tappaki ke’nanga.
9 Punna tena ijapa naero’ tappa’ ke’nanga manna pole nale’ba’mo nacini’ anne ruaya gau’ malompo, siagang taerokai ke’nanga anjampangi kana-kanannu, angngalleko sike’de’ je’ne’ battu ri Binanga Nil nampa nupatiri’ naung ri buttaya. Latappinrai anjo je’neka a’jari cera’."
10 Mingka nakanamo Musa, "Iye’ Batara, mingka inakke teaiya’ tau cara’de’ a’bicara, baji’ nariolo kammayatompa kamma-kamma anne, ri le’ba’namo Batara a’bicara mae ri nakke. Battala’ sikali lilaku, salloi bateku a’bicara siagang tena nalaccu’."
11 Nakanamo Batara mae ri ia, "Inaika assarei bawa rupataua? Inai ampa’jari pepei siagang ampa’jari tongoloki? Inai assarei paccini’ siagang ampa’jari butai? Teaika iNakke, Bataraya?
12 Kamma-kamma anne a’lampamako, iNakke lantulungko a’bicara siagang langngajarakko apa mustia nupau."
13 Mingka appialimi Musa angkana, "Kupalaki, sollanna teai inakke Kisuro Batara, tau maraenga lalomo Kisuro."
14 Jari larromi Batara mae ri Musa na Nakana, "Sai nia’ sari’battannu niarenga Harun? Kuassengi angkanaya ia cara’deki a’bicara. Sikontutojenna, kamma-kamma anne niaki lalang pa’jappang mae anrinni, siagang lasannang sikali nyawana lanri assibuntulu’nu.
15 A’bicara mako siagang ia, siagang pauammi apa musti lanapau. INakke lantulungko sipa’rua siagang langngajarakko apa musti nupau siagang musti nugaukang.
16 Ia musti a’bicarai lalang arennu ri dallekanna ra’yaka. Ia la’jari juru bicaranu siagang lanapasangkammako angkanaya Allata’ala ampaui anjo apa mustia napau.
17 Erangi anjo takkanga, saba’ lanupakei anjo untu’ anggaukangi anjo sikamma gau’ malompoa."
18 Le’baki anjo ammotere’mi Musa mange ri balla’na Yitro, iamintu matoang bura’nena. Nampa nakana ri ia, "Kisarea’ ising untu’ a’lampa mange antoaki sikamma sari’battangku, kaerokka’ anciniki angkanaya maka attallasa’ iji ke’nanga?" Nakanamo Yitro ri Musa, "A’lampamako siagang salama’."
19 Ri wattunna nia’ ija Musa ri butta Midian, Nakana Batara ri ia, "Ammoterekko mange ri Mesir. Sikontu tau eroka ambunoko mate kabusu’mi."
20 Jari nakio’ tommi Musa bainenna siagang sikamma ana’-ana’na, nampa napanai’ ri keledaia nampa a’lampa ke’nanga mange ri Mesir. Lanri parentaNa Batara, naerang tongi Musa anjo takkanna.
21 Nakana Batara ri Musa, "Le’ba’ mako Kusare koasa untu’ anggaukangi gau’-gau’ malompoa. Jari punna ammotere’ mako sallang ri Mesir, gaukammi anjo sikamma gau’-gau’ malompoa ri dallekanna Karaeng Mesir. Mingka laKupa’jari terasaki pa’mai’na, sa’genna taeroka assarei ising untu’ a’lampa anjo bansaya.
22 Nampa paumi ri anjo karaenga angkanaya iNakke, Batara, appasang kamma anne: ‘Anjo Israel ana’ toaKu,
23 siagang ikau Kuparentakang mako sollanna nusare ising anjo anakKu untu’ a’lampa, sollanna akkulle nagaukang ibadana mae ri Nakke; mingka nutollaki anjo parentaKu. Kamma-kamma anne laKubunoi ana’nu toaya.’"
24 Ri se’reang tampa’ pakkemaang lalang anjo pa’jappanga, battui Batara mae ri Musa siagang eroki Nabuno Musa.
25 Anjo Zipora, bainenna Musa, angngallei se’re batu tarang nampa napolong cappa’ bukkuleng katauanna ana’na, nampa napasero ri bangkenna Musa. Nakana Zipora, "Ikau bura’ne cera’ mae ri nakke."
26 Anjo kananna nia’ passisambunganna siagang pa’gaukang sunnaka. Jari tajariami Batara ambunoi Musa.
27 Lalanna anjo wattua Nakanamo Batara ri Harun, "A’lampako mange ri parang lompoa untu’ ambuntuli Musa." A’lampami Harun, nampa sibuntulu’mo siagang andi’na ri moncong matangkasaka, siagang nabaumi anjo andi’na.
28 Nacaritami Musa mae ri Harun sikontu apa le’baka Napau Batara mae ri ia ri wattunna nisuro ammotere’ mange ri Mesir, kammayatompa sikontu gau’ malompo mustia nagaukang.
29 Nampa a’lampamo Musa siagang Harun mange ri Mesir, na napasse’re sikontu pamimpinna tu Israel.
30 Napabattumi Harun mae ri ke’nanga sikontu apa le’baka Napau Batara mae ri Musa. Siagang nagaukang tommi Musa sikontu anjo gau’ malompoa ri dallekanna ngaseng anjo taua.
31 Jari tappa’mi ke’nanga; siagang nalangngere’namo ke’nanga angkanaya Naparhatikammi Batara bansa Israel kammayatompa Nacini’mi sikamma kasessanna ke’nanga, su’ju’mi ke’nanga anynyomba.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA