Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Napasse’remi Musa sikontu bansa Israel nampa nakana mae ri ke’nanga, "Iaminne parentaNa Batara mae ri kau ngaseng:

² Nia’ annang allo wattunnu untu’ anjama, mingka allo makatujua iamintu allo untu’ pammari-mariang, allo lompo nisa’laka untu’ Batara. Inai-nai anjama ri Allo Pammari-marianga musti nihukkung matei.

³ Ri anjo alloa takkulleako apparinra pepe’ ri balla’nu."

⁴ Nakana Musa mae ri sikontu bansa Israel, "Kamma anne parentaNa Batara:

⁵ Erangi passarenu mae ri Batara. Inai nipagio’ atinna, musti assarei bulaeng, pera’, siagang tambaga;

⁶ kaeng lenang alusu’, kaeng wol gau’, lame butung siagang eja; kaeng battu ri bulu bembe;

⁷ kukkulu’ gimbala’ laki nikasumba ejaya, kukkulu’ alusu’, kayu akasia,

⁸ minynya’ untu’ lampu; rampa-rampa untu’ minynya’ upacara siagang untu’ dupa mabauka;

⁹ paramata delima siagang paramata maraeng untu’ nipabelo-belo ri baju efod siagang pa’lapa’ barambanna Imang Lompoa."

¹⁰ "Sikontu tau cara’deka anjama-jama musti battui ampareki sikontu apa Naparentakanga Batara, iamintu:

¹¹ Kema, pattongko’na siagang pa’rangka’na, pakkai’ siagang rangkana, kayu-kayu tappalanga, benteng pakke’bu’ siagang pa’lapa’na;

¹² Patti Parjanjiang siagang pa’bule’na, pa’rangka’na siagang kaeng pa’bombo’na;

¹³ mejang siagang kayu pa’bule’na, sikontu pakkakasa’na siagang roti nipatalaya;

¹⁴ bangkeng lampu untu’ passingarri siagang pakkakasa’na, lampu siagang minynya’na;

¹⁵ tampa’ pattunuang dupa siagang kayu pa’bule’na, minynya’ upacara, dupa mabauka; gordeng untu’ pakke’bu’ Kema,

¹⁶ tampa’ pakkoro’bangngang untu’ koro’bang nitunu siagang julu’-julusi battu ri tambaga, kayu pa’bule’ siagang sikontu pakkakasa’na; ba’ tampa’ je’ne’ pa’bissa-bissang siagang dapara’na,

¹⁷ sikamma layara’ untu’ paranglakkenga, sikamma bentenga siagang pa’lapa’na, gordeng pakke’bu’ lompona paranglakkenga,

¹⁸ sikamma pattoka siagang otere’na untu’ Kemaya siagang untu’ paranglakkenga;

¹⁹ pakeang ibada untu’ sikamma imanga ri wattunna tugasa’ ke’nanga ri Kamara’ Matangkasaka, kammayatompa pakeang nisa’laka untu’ Imang Harun siagang ana’-ana’na."

²⁰ Nampa bubara’mo anjo sikontu bansa Israel a’rappunganga,

²¹ siagang inai-nai ta’gio’ nyawana untu’ assare, massing mangemi angngerangi passarena ri Batara untu’ ampa’gannaki apa niparalluanga ri KemaNa Batara. Naerang tommi ke’nanga sikontu apa niparalluanga untu’ ibada siagang bahang untu’ pakeanna imanga.

²² Inai-nai ero’, baji’ bura’ne yareka baine, battui angngerang paniti belo-belo, anting-anting, cincing, rante, siagang sangka’ rupa belo-belo bulaeng untu’ nipassareang mae ri Batara.

²³ Inai-nai nia’ ammallaki kaeng lenang alusu’, kaeng wol gau’, lame butung yareka eja, kaeng battu ri kukkulu’ bembe, kukkulu’ gimbala’ laki nikasumba eja, yareka kukkulu’ alusu’, napassareang tommi.

²⁴ Sikamma tau akkullea assare pera’ yareka tambaga, naerangi untu’ napassareang mae ri Batara. Kamma tomminjo nagaukang sikamma tau niaka kayu akasiana untu’ anjo jamanga.

²⁵ Sikamma bai’-baine cara’deka appare’ bannang lenang alusu’ siagang bannang wol gau’, lame butung siagang eja, massing naerang tommi le’baka napare’.

²⁶ Appare’ tommi ke’nanga bannang battu ri bulu bembe.

²⁷ Sikamma pamimpinga angngerangi paramata delima siagang paramata maraengannaya untu’ nipabelo-belo ri efod siagang ri pa’lapa’ barambang.

²⁸ Angngerang tongi ke’nanga rampa-rampa siagang minynya’ untu’ lampu, minynya’ upacara siagang dupa bauka rasanna.

²⁹ Sikontu tu Israelka massing naerammi passarena ke’nanga siagang ati maci’nonna mae ri Batara untu’ jama-jamang Naparentakanga Batara tete ri Musa.

³⁰ Nampa nakanamo Musa mae ri tu Israel, "Le’ba’mi Napile Batara anjo Bezaleel ana’na Uri, cucunna Hur, battu ri suku Yehuda

³¹ siagang le’ba’mi nisare kakoasang. Nisarei ri Allata’ala pammahang, kacara’dekang siagang pakkulle untu’ a’rupa-rupa jamang alusu’,

³² untu’ appare’ rancana parallua ri kacara’dekang, kammayatompa untu’ anjamai battu ri bulaeng, pera’ siagang tambaga;

³³ untu’ angngalusi batu paramata lanipareka belo-belo; untu’ angngukiriki kayua siagang sangka’ rupa jama-jamang alusu’ maraengannaya.

³⁴ Bezaleel siagang Aholiab, ana’na Ahisamakh battu ri suku Dan, nisaremi kacara’dekang ri Batara untu’ ampangngajarrangi kacara’dekanna ke’nanga mae ri tau maraenga.

³⁵ Nisarei ke’nanga a’rupa-rupa kacara’dekang untu’ jamang nipaka, cara’de’ anrancang siagang attannung kaeng lenang alusu’, wol gau’, lame butung siagang eja, kammayatompa kaeng maraengannaya. Iami ke’nanga tau cara’de’ anrancang siagang tau akkullea anggaukangi a’rupa-rupaya jama-jamang.

Keluaran

Video Keluaran 35

Ikuti Kami:

KONTAK | PARTISIPASI | DONASI