Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai nini Jahowa ma dompak si Musa, “Barbar ma bam dua batu panuratan usih hubani na parlobei ai, ase Husuratkon hubani batu panuratan ai ganup hata na dob tarsurat bani batu panuratan na parlobei na dob binolahkonmondi.
2 Sirsir ma ho girah sogod, ase sogod ma ho tangkog hu Dolog Sinai, laho jongjong ijai i lobei-Hu i pakpak ni dolog ai.
3 Sahalak pe lang bulih tangkog rap pakon ho, anjaha sahalak pe lang boi homa taridah i atas ganup dolog in; age biribiri age lombu seng bulih manggagat dohorhon dolog in.”
4 Dob ai ibarbar si Musa ma dua panuratan batu usih hubani na parlobei ai; ipagirah ma sogodni ai puho laho tangkog hu Dolog Sinai, songon na tinonahkon ni Jahowa hu bani, lanjar iboban ma i tanganni panuratan na dua ai.
5 Jadi tuad ma Jahowa ibagas sada hombun, lanjar jongjong ma Ia ijai i lambungni, anjaha idilohon ma goran ni Jahowa.
6 Mamontas ma Jahowa hun lobei ni si Musa lanjar dilo-dilo, “Jahowa, Jahowa do Naibata pardear layak anjaha paridop ni uhur, nanget marringis, anjaha gok holong ni uhur-Ni pakon habonaran-Ni,
7 na pahotkon holong ni uhur-Ni hubani halak marribu-ribu, anjaha na manasap hajahaton, panlanggaron pakon dousa; tapi sabonar lang ra paluahkon sonin tumang parsalah, anjaha na mambalaskon hajahaton ni ganup bapa hubani anakni pakon pahompuni ronsi sundut patoluhon pakon paompatkon.”
8 Jadi tarolos ma si Musa manrogop hu tanoh lanjar marsombah.
9 Anjaha nini ma, “Anggo domma dapotan idop ni uhur ahu i lobei-Mu, ale Tuhan, mahua mardalan ma Tuhan i tongah-tongahnami, age pe bangsa na hengkeng maruhur bangsa on, anjaha sasap Ham ma hajahatonnami pakon dousanami, anjaha bahen Ham ma hanami rupei-Mu.”
10 Dob ai nini Jahowa ma, “Tonggor ma, Ahu mambahen padan: I lobei ni bangsamu, bahenon-Ku ma halongangan na so ongga masa i sab tanoh on ampa i tongah-tongah ni sagala bangsa parbegu; anjaha ganup bangsa na mangkasomani ho in, mangidah horja ni Jahowa, ai na majangin tumang do na sihol bahenon-Ku marhitei ho.
11 Parimbagaskon ma ibagas uhurmu na Huhatahon in bam sadari on. Tonggor ma, usiron-Ku do hun lobeimu halak Amori, Kanani, Heti, Peresi, Hewi pakon Jebusi.
12 Jaga ma dirimu ase ulang mambahen padan ho pakon pangisi ni tanoh sisolukonmin, ase ulang gabe tirangkap sidea i tongah-tongahmu.
13 Maningon parreongonmu do anjapanjap ni sidea anjaha bolahanmu gana-gana ni sidea anjaha robohonmu sisombahon ni sidea.
14 Ai seng bulih sombahonmu naibata na legan, ai Jahowa, na margoran Parsimburu, Naibata parsimburu do.
15 Seng bulih mambahen padan ho pakon pangisi ni tanoh in, ai anggo marbangkis sidea mangirikkon naibata ni sidea, barang manggalang sidea hubani naibata ni sidea gabe idilo ho anjaha ipangan ho humbani na ginalangkonni in,
16 anjaha anggo ibuat ho humbani boru ni sidea ai bahen parinangon ni anakmu, marbangkis ma boru ni sidea in mangirikkon naibata ni sidea, gabe dihut ma anakmu marbangkis mangihutkon naibata ni sidea ai.
17 Seng bulih bahenonmu naibata tuangan bam.
18 Maningon tongtong ho marari raya sagu-sagu na so niigaran. Pitu ari dokahni panganonmu sagu-sagu na so niigaran, songon na dob hutonahkon in bam bani panorang na dob tinontuhon bani bulan Abib, ai bani bulan Abib do ho luar hun Masir.
19 Sagala bunga tubuh Ahu do simadasi pakon sagala tunggal humbani pinahanmu, ai ma bunga tubuh humbani lombu pakon biribiri.
20 Maningon tobusonmu do bunga tubuh ni halode marhitei biribiri, tapi anggo seng sihol tobusonmu ai, maningon ponggolhononmu do borgokni. Maningon tobusonmu do sagala bunga tubuh ni anakmu. Seng bulih atap ise roh hu lobei-Hu marhasoman tangan na lumei.
21 Onom ari ma ho marhorja, tapi anggo ari papituhon in maningon marsaran ho; bani musim paninggalaon ampa pariama pe maningon marsaran ho.
22 Pesta sipitu ari in pe maningon ingatonmu do, ai ma pesta limbuah ni pariama gandum, pakon pesta patumpuhon buah bani ujung ni tahun.
23 Tolu hali ibagas na satahun maningon roh sagala paramangon na i tongah-tongahnima hu lobei ni Tuhan Jahowa, Naibata ni Israel.
24 Ia dob Huusir bangsa sipajuh begu-begu hun lobeimu, anjaha Hupalumbang tanoh iananmu, sahalak pe lang na manguhur-uhuri tanohmu sadokah tangkog ho sihol mangidah bohi ni Jahowa Naibatamu, sitolu hali in ibagas na satahun.
25 Seng bulih galangkononmu daroh ni galangan Bangku rap pakon sagu-sagu na niigaran, anjaha seng bulih marborngin paturuton galangan pesta Paskah das ronsi patar.
26 Maningon boanonmu do limbuah ni tanohmu hu rumah ni Jahowa Naibatamu. Seng bulih lompahonmu anak ni hambing ibagas dadih ni inangni.”
27 Dob ai nini Jahowa ma hubani si Musa, “Suratkon ma hata on, ai marguru hubani hata on do padan na hubahen in bam pakon hubani Israel.”
28 Jadi sai ijai ma si Musa rap pakon Jahowa ompat puluh ari ompat puluh borngin dokahni, seng mangan ruti anjaha minum bah. Isuratkon ma ganup hata ni padan ai, titah na sapuluh ai hu batu panuratan ai.
29 Sanggah tuad si Musa hun Dolog Sinai ai, anjaha ijolom i tanganni na dua batu panuratan hasaksian ai sanggah tuad ia, seng ibotoh si Musa na dob marsinalsal do sisik ni bohini, halani na dob marsahapi ai ia pakon Jahowa.
30 Jadi ididah si Aron pakon ganup halak Israel ma si Musa, hape tonggor ma, domma marsinalsal sisik ni bohini, gabe mabiar ma sidea roh hun dohor hu bani.
31 Tapi idilo si Musa ma sidea, gabe mulak ma sidea hu bani, si Aron pakon ganup pangintuai ni tumpuan ai, lanjar marsahap ma si Musa hubani sidea.
32 Jadi dob sonai roh ma hun dohor ganup halak Israel, gabe ipadas si Musa ma hubani sidea ganup hata na ipatugah Jahowa hubani i atas Dolog Sinai.
33 Dob salpu si Musa marsahap pakon sidea, ibahen ma sada tudung-tudung hubani bohini;
34 tapi anggo masuk use si Musa hu lobei ni Jahowa sihol marsahap pakon-Si, ibuat ma tudung-tudung ai paima luar ia use; anjaha anggo luar ma ia, ihatahon ma hubani halak Israel hata na tinonahkon hu bani.
35 Jadi anggo ididah halak Israel bohi ni si Musa anjaha marsinalsal sisik ni bohini, gabe ipasuang si Musa ma tudung-tudung ai hu bohini paima masuk ia use laho marsahap pakon Jahowa.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA