Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Sanga iidah bangsa Israel maka Musa lalap la nusur i das Deleng Sinai nari, tapi ndekah ia tading i je, iulung-ulungna Harun janah nina, "La sieteh ntah kai nggo jadi man Musa, kalak si minpin kita ndarat i Mesir nari; emaka bahanlah sada dibata si man sembahen, guna minpin kita."
2 Nina Harun man bana kerina, "Tangtangilah anting-anting emas si ipake ndeharandu, anak-anakndu si dilaki ras si diberu, jenari bereken man bangku."
3 Emaka kerina bangsa Israel nangtangi anting-antingna jenari iberekenna man Harun.
4 Ibuat Harun kerina anting-anting ndai, ileburna, jenari ituang emas ndai ku sada cetaken, jenari itepana sada lembu emas. Nina bangsa ndai, "O Israel, enda me dibatanta si mabai kita ndarat i Mesir nari!"
5 Kenca idah Harun si e ipajekkenna sada batar-batar i lebe-lebe lembu emas ndai, jenari imomokenna nina, "Pagi ibahan sada pesta guna kemulian TUHAN."
6 Pepagina lampas, ibaba kalak ndai asuh-asuhen man tutungen jadi persembahen, ras si debanna si man pangan jadi persembahen persadan. Kundul ia kerina man ras minem-minem; dungna nggo sambar jadi sada pesta mabuk-mabuk, janah perlagu langkah dilaki ras diberu lanai erpepah.
7 Nina TUHAN man Musa, "Pedas kam mulih ku teruh, sabap bangsandu si nggo ibabandu ndarat i Mesir nari nggo erdosa janah nulak Aku.
8 Itadingkenna dalan si nggo Kupedahken gelah ikutkenna; ibahanna sada lembu emas tuangen janah nggo isembahna ras ibahanna persembahenna ku je. Ikatakenna e si mabai ia ndarat i Mesir nari.
9 Nggo Kuteh uga kengna bangsa enda.
10 Genduari, ula cubaken ngambati Aku. Nembeh kal ateKu man bana kerina, janah Kukernepken ateKu. Kenca bage, Kubahan ateKu kam ras kesusurenndu jadi sada bangsa si mbelin."
11 Tapi meseksek ipindoken Musa man TUHAN, Dibatana nina, "TUHAN, ngkai maka bage RawanNdu man BangsaNdu, si nggo IselamatkenNdu i Mesir nari alu gegeh ras kuasa si mbelin?
12 Adi IkernepkenNdu bangsa e, tentu ikataken bangsa Mesir me maka Kam nggo mbaba ia ndarat i Mesir nari alu tujun munuhsa i deleng-deleng enda janah ngeradaskenca tuhu-tuhu i bas doni enda nari. Ula min Kam merawa, ula min UkurNdu bage janah ula min sehken cilaka enda man BangsaNdu.
13 Inget min suruh-SuruhenNdu Abraham, Isak, ras Jakup. Ingetlah padan si nggo IbahanNdu ras ia maka IberekenNdu kesusurenna, teremna bagi buena bintang i langit, janah mereken man kesusurenna kerina taneh si nggo IpadankenNdu jadi sikerajangenna seh rasa lalap."
14 Emaka erkusur ukur TUHAN janah la IsehkenNa cilaka si nggo IsurakenNa man BangsaNa.
15 Nusur mulihken Musa i das deleng ndai nari, ibabana papan batu si dua e i ja tersurat pedah TUHAN i bas dua mbelahna.
16 Dibata jine si erbahan papan batu e janah Ia ka pe si nuratken pedah e i je.
17 Ibegi Josua sora bangsa Israel ersurak-surak jenari ikatakenna man Musa nina, "Kubegi sora kalak erperang i bas ingan erkemah."
18 Nina Musa, "Sora e labo sora kalak ersurak erkite-kiteken kemenangen ntah pe sora kalak nderkuh erkiteken talu erperang; sora e, eme kap sora kalak rende."
19 Kenca Musa nggo ndeher ku ingan erkemah e janah nggo teridah man bana lembu e dingen kalak ndai landek-landek, merawa kal ia. I bas nahe deleng e ibenterkenna papan batu si dua si ibabana ndai emaka pecah.
20 Ibuatna lembu si ibahan kalak ndai, ileburna, igilingna jadi tepung halus, jenari icampurna ras lau. Kenca bage isuruhna bangsa Israel minemsa.
21 Ikatakenna man Harun nina, "Kai nge ibahan bangsa enda man bandu, maka ibabaindu ia erbahan dosa si bage belinna?"
22 Nina Harun njabapsa, "Ula kam merawa man bangku; itehndu jine nge gegehna bangsa enda erbahan si jahat.
23 Ikatakenna man bangku, 'La sieteh ntah kai nggo jadi man Musa, si maba kita ndarat i Mesir nari, emaka bahanlah sada dibata si minpin kita.'
24 Kusuruh ia mereken perhiasen-perhiasen emasna man bangku, emaka kalak si lit i bas ia, minter itangtangina jenari iberekenna man bangku. Kubenterken perhiasen-perhiasen e ku bas api, jenari jadi me lembu e!"
25 Idah Musa maka nggo ipelepas Harun bangsa Israel rate-ate seh maka megombang imbang-imbangna man bana.
26 Emaka tedis Musa i bas gerbang ingan bangsa Israel erkemah, janah nina alu sora megang, "Ise si arah TUHAN reh ku jenda!" Emaka kerina suku Lewi pulung sekelewet Musa.
27 Jenari nina Musa man bana kerina, "TUHAN, Dibata Israel mereken perentah man bandu sekalak-sekalak gelah ibuatndu pedangndu, jenari laweslah arah tengah-tengah ingan erkemah enda i bas gerbang enda nari ku gerbang si deban guna munuh senina-seninandu, teman-temanndu, ras tetangga-tetanggandu."
28 Minter ipatuhi suku Lewi perentah e, jenari ibunuhna kira-kira 3000 kalak i bas wari e.
29 Nina Musa man suku Lewi, "Sendah nggo itangkuhkenndu dirindu jadi imam-imam ndahiken dahin TUHAN alu munuh anak-anakndu, senina-seninandu, emaka TUHAN nggo mereken pasu-PasuNa man bandu."
30 Pepagina nina Musa man bangsa Israel, "Nggo kam erbahan dosa si mbelin. Tapi genduari lawes ka aku mulihken ku das deleng ndahi TUHAN; mbera-mbera banci dat aku pengalemi dosa man bandu."
31 Kenca bage mulih Musa ndahi TUHAN, janah nina, "Bangsa enda nggo erbahan dosa si mbelin. Nggo ibahanna sada dibata i bas emas nari jenari ersembah ku je.
32 Ngarap aku gelah IalemiNdu dosana; tapi adi la Kam nggit, sasapkenlah gelarku i bas kitap InganNdu nuratken gelar-gelar BangsaNdu."
33 Erjabap TUHAN nina, "Kalak si nggo erdosa man bangKu nge si Kusasapken gelarna i bas kitapKu nari.
34 Genduari laweslah, babailah bangsa e ku ingan si nggo Kukataken man bandu. Ingetlah maka malekatKu pagi si nuduhken dalan man bandu, tapi paksana la banci la seh maka Kuukum bangsa enda erkite-kiteken dosana."
35 Emaka ipesusur TUHAN sada penakit ku bangsa e, sabap nggo ipaksana Harun erbahan lembu emas e.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA