Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 E settong are Mosa ngowan embi’ ban dumbana Yitro, mattowana, imam e nagara Midian jareya. Embi’ ban dumbana jareya ebakta lebat e sagara beddhi, sampe’ napa’ ka Gunong Sinay, gunong se socce.
2 E jadhiya malaekadda PANGERAN ngaton e dhalemmanna apoy se rabbang dhari dhalemma but-ombut. Mosa ngoladi ombut jareya rabbang tape ta’ katonon.
3 "Ane," ca’na panggaliyanna, "arapa ombut rowa me’ ta’ katonon? Kodda’ bi’ sengko’ esemma’ana, sengko’ terro taowa."
4 E bakto PANGERAN ngoladi ja’ Mosa nyander ka seddi’anna ombut jareya, Mosa pas eera’ dhari dhalemmanna ombut jareya. "Mosa! Mosa!" dhabuna. Saodda Mosa, "Ka’dhinto, Guste!"
5 Allah adhabu, "Ja’ ma’-semma’ dha’ enna’. Bukka’ sandhalla, sabab tana kennengnganna ba’na manjeng jareya socce.
6 Sengko’ reya Allahna bangatowana ba’na, Allahna Ibrahim, Ishak ban Yakub." Daddi Mosa laju notobi raena bi’ astana sabab tako’ se ngoladana Allah.
7 PANGERAN adhabu, "Sengko’ la nangale’e Tang ommat eseksa ce’ sarana e Messer; ban Sengko’ la ngedhing serrona se menta tolong sopaja epabebasa dhari kakobasa’anna reng-oreng se nyeksa aba’na. Sengko’ la tao ka sakabbinna kasangsara’anna reng-oreng jareya.
8 Daddi Sengko’ toron dha’ enna’ mabebasa oreng Isra’il dhari bangsa Messer; bi’ Sengko’ reng-oreng jareya epakalowara dhari Messer, egiba’a ka nagara se lebar; tana jareya landhu tor ma’mor. Sateya tana jareya gi’ ekennengnge bangsa Kana’an, Het, Amori, Feris, Hewi ban Yebus.
9 Sengko’ la ngedhing tangessa bangsa Isra’il, ban la tao bangsa jareya eseksa ce’ sarana bi’ bangsa Messer.
10 Sateya bi’ Sengko’ ba’na eotosa ka rato Messer, sopaja ba’na ngennenga mimpin Tang ommat jareya kalowar dhari Messer."
11 Tape Mosa mator ka Allah, "Pasera abdidalem ka’dhinto? Kadi ponapa abdidalem se ngadhebba ka rato Messer sareng abakta’a bangsa Isra’il kalowar dhari Messer?"
12 Dhabuna Allah, "Ba’na ebarengngana bi’ Sengko’. Ban mon bangsa jareya bi’ ba’na la epakalowar dhari Messer, ba’na abakte ka Sengko’ e gunong reya. Jareya menangka bukte ja’ ba’na esoro Sengko’."
13 Tape Mosa gi’ mator pole, "Manabi abdidalem entar ka reng-oreng Isra’il pas abala saka’dhinto, ‘Sengko’ epakon Allahna bangatowana ba’na entar ka ba’na,’ reng-oreng gapaneka pas atanya, ‘Pasera asmana?’ abdidalem ngoca’a kadi ponapa?"
14 Dhabuna Allah, "Sengko’ reya SENGKO’ BADHA. Ba’na ngoca’ kantha reya, Sengko’ epakon entar ka ba’na bi’ se asmana SENGKO’ BADHA.
15 Kabala ka reng-oreng Isra’il ja’ Sengko’, PANGERAN, Allahna bangatowana bangsa Isra’il jareya, Allahna Ibrahim, Allahna Ishak ban Yakub, nyoro ba’na entar ka reng-oreng jareya. Jareya Tang nyama salanjangnga. Jareya sebbudanna Tang nyama se kodu eangguy manossa ron-temoron.
16 Kassa’ pakompol saseppona bangsa Isra’il; kabala ja’ Sengko’, PANGERAN, Allahna bangatowana bangsa Isra’il, Allahna Ibrahim, Ishak ban Yakub, ngaton ka ba’na. Kabala ja’ Sengko’ mekker ka reng-oreng Isra’il ban la tao epabaramma reng-oreng jareya bi’ bangsa Messer.
17 Daddi Sengko’ la neptebbagi makalowara bangsa Isra’il dhari Messer, kennengnganna bangsa jareya nanggung seksa’an; bi’ Sengko’ egiba’a ka nagara se landhu tor ma’mor, iya areya nagarana oreng Kana’an, Het, Amori, Feris, Hewi ban Yebus.
18 Tang ommat bakal atoro’a ka oca’na ba’na. Ba’na ban pin-pamimpinna bangsa Isra’il pas entar ka rato Messer, ngoca’ kantha reya, ‘Badha dhabuna PANGERAN, Allahna bangsa Ibrani. Bangsa Ibrani nyo’ona edi badhi entara ka ra-ara beddhi se jauna tello are parjalanan dhari ka’dhinto, parlo ngatorragiya kurban ka PANGERAN, Allahna bangsa abdidalem.’"
19 Saellana jareya Allah adhabu pole, "Sengko’ tao ja’ rato Messer ta’ kera magi, kajabana mon epaksa.
20 Tape Sengko’ ngangguya Tang kakobasa’an; bangsa Messer bi’ Sengko’ eokoma. Sengko’ madhatengnga balai se nako’e ka nagara jareya. Saellana jareya tanto ba’na kabbi pas ebagi kalowar dhari Messer.
21 Bi’ Sengko’ oreng Messer epamora’a ate ka bangsa reya, daddi mon bangsa Isra’il jareya kalowar dhari Messer ta’ sampe’ kalowar ta’ ngeba pa-apa.
22 Saneyap babine’ Isra’il kodu menta ka reng-oreng Messer tatanggana otabana ka babine’an Messer se apolong bengko ban aba’na, kalambi ban pareyasan dhari emmas ban salaka. Jareya bi’ reng-oreng Isra’il bakal eangguyyagiya ka na’-ana’na, lalake’ ban babine’. Kalaban cara se kantha jareya oreng Isra’il arampas dhi’-andhi’na oreng Messer."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA