Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 "Dilo seninandu Harun ras kerina anak-anakna si dilaki, Nadap, Abihu, Eleasar ras Itamar. Serapken ia i bas bangsa Israel nari, gelah banci ia jadi imam ndahiken kerina dahin si Kusuruh.
2 Bahan paken imam man seninandu Harun gelah teridah ia mulia ras mejile.
3 Dilo kerina kalak si beluh erbahan paken, si nggo Kubere kepentaren guna si e, jenari suruh ia kerina erbahan paken Harun, gelah banci ia itangkuhken jadi imam, ndahiken dahinKu.
4 Suruh ia erbahan sada tutup tenten, sada baju epod, sada jubah, sada baju si ersulam, sada bulang-bulang, ras sada selempang. Arus ibahan paken imam enda man seninandu Harun ras anak-anakna, gelah banci ia jadi imam, ndahiken si Kusuruh.
5 Kerina paken e la banci la ibahanna i bas wool biru, ungu, ras megara, bage pe benang emas ras lenen halus.
6 Tambah si e baju epod arus ibahan i bas wool biru, ungu, ras megara, bage pe emas ras lenen halus janah ihiasi alu sulamen.
7 Bahan dua tinali bas bara guna mpersadasa; tinali bas bara enda ijarumken arah pinggirna e.
8 Sada gendit si itenun halus, bahan-bahanna seri, ijarumi ersada ras baju epod e.
9 Buat dua batu permata delima. Daramilah sekalak tukang emas si beluh guna ngukir gelar-gelar anak Jakup si sepulu dua i bas batu permata si dua e. Urutenna rikutken umurna; enem gelar i bas tep-tep batu permata. Jenari leketken tep-tep batu permata i bas bingke emas.
10 (Kel 28:9)
11 (Kel 28:9)
12 Kenca bage tamaken permata si dua ndai i bas tinali baju epod ndai jadi tanda suku-suku Israel si sepulu dua. Alu bagenda ipersan Harun gelar-gelar suku Israel i bas barana, gelah Aku, TUHANndu, rusur nginget bangsangKu.
13 Seakatan bingke emas si dua e,
14 arus maka ibahan ka dua rante emas murni si ipiuh bagi tinali. Jenari leketken rante e ku bingke emas ndai."
15 "Bahan sada tutup tenten man Imam si Mbelin gelah ipakena e guna meteh peraten Dibata. Bahan seri ras baju epod ndai janah sulamenna pe seri.
16 Bentukna segi empat, ilipat dua, gedangna ras belangna 22 sentimeter.
17 Leketken i je empat baris batu permata si meherga, i bas baris si pemena: sada permata rubi, topas, ras garnet.
18 I bas baris si peduaken: sada permata samrud, batu nilam, ras sada berlian.
19 I bas baris si peteluken: sada permata lasuardi, sada akik, ras sada amatis.
20 I bas baris si peempatken: sada mutiara biru, sada delima, ras sada jasper. Kerina permata e ileketken sada-sada i bas bingke emas.
21 I bas tep-tep batu permata enda iukir sada-sadai gelar anak-anak Jakup, jadi tanda suku-suku bangsa Israel.
22 Bahan rante tutup tenten enda i bas emas murni nari, si ipiuh bagi tinali.
23 Bahan dua gelang emas jenari leketken i bas suki si arah das tutup tenten e,
24 emaka iketken tinali emas si dua ndai ku gelang emas si dua e.
25 Leketken ujungna si dua nari ku ingan batu permata si dua ndai, janah alu bagenda sangkutken ia arah lebe tinali bas bara baju epod e.
26 Jenari bahan dua gelang emas, sangkutken arah bas i bas suki si arah teruh tutup tenten e rembak ras baju epod.
27 Bahan dua nari gelang emas jenari leketken sada-sadai i bas ujung si arah teruh nali bara baju epod ndai. Ingan ngeleketkenca deherken pengkelimenna, i babo gendit si itenun halus ndai.
28 Iket lah gelang tutup tenten e ras gelang bara si tanggung e alu benang biru. Alu bage tutup tenten e banci leket i babo gendit ndai janah ia la banci nursur.
29 Asum Harun bengket ku bas Ingan si Badia e, arus ipakena tutup tenten e si nggo iukir alu gelar-gelar suku-suku bangsa Israel. Alu bagenda, Aku, TUHANndu, rusur nginget bangsangKu.
30 Tamaken pe Urim ras Tumim i bas tutup tenten e, gelah banci ipake Harun tupung ia reh ku bas inganKu si badia. I bas paksa-paksa si bage, la banci la ipakena rusur tutup tenten e, gelah banci itentukenna kai sura-surangKu man bangsa Israel."
31 "Jubah si nutupi baju epod ndai ibahan i bas wool biru nari.
32 Bahan pe sada lubang ingan nucukken takal, janah pinggir lubang enda ndai ilapisi alu uis si itenun rapat, gelah ula banci merigat.
33 I bas tepina si arah teruh tamaken buah galiman si ibahan i bas wool biru, ungu, ras megara. I bas kelang-kelangna e, itamaken pe giring-giring emas.
34 (Kel 28:33)
35 Jubah enda la banci la ipake Harun adi ia ndahiken dahin imam. Adi reh ia ku lebe-lebengKu i bas Ingan si Badia ntah tupung ia nadingken ingan e, sora giring-giring e la banci la terbegi, emaka ia la mate.
36 Bahan sada perhiasen i bas emas murni nari, jenari ukirlah i je kata-kata enda, 'Ipersembahken man TUHAN saja.'
37 Iketkenlah e arah lebe bulang-bulang e alu benang biru.
38 La banci la ipake Harun enda i bas perdempakenna, gelah Aku, TUHANndu, ngaloken kerina persembahen si ibereken bangsa Israel man bangKu, aminna gia lit ibahan kalak kesalahen-kesalahen i bas ia mpersembahkenca e.
39 Tenunlah baju Harun i bas lenen halus nari ras bahanlah sada bulang-bulangna i bas lenen halus nari ras bage pe sada selempang si ihiasi alu sulamen.
40 Bahanlah baju, selempang, ras bulang-bulang man anak-anak Harun, gelah teridah ia mulia ras mejile.
41 Pakekenlah paken-paken enda man seninandu Harun ras anak-anakna. Kenca bage tangkuhken ia janah endesken ia man bangKu alu namaken minak saitun ku ia kerina, gelah banci ia jadi imam ndahiken dahinKu.
42 Bahan man bana seluar gendek i bas lenen nari mulai i bas awakna seh ku pahana, guna nutupi bagin badanna si la arus teridah.
43 Si enda arus ipake Harun ras anak-anakna adi lawes ia ku Kemah Perjumpan ntah pe adi ideherina batar-batar ndahiken dahin imam i bas Ingan si Badia, gelah ula ia ibunuh erkite-kiteken teridah bagin badanna si la patut teridah. Enda me peraturen si tetap man Harun ras kesusurenna."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA