Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 E jaman jareya badha oreng lalake’ Lewi abine babine’ dhari sukuna dibi’.
2 Babine’ jareya ngandhung, pas rembi’ lalake’; robana ce’ bagussa, daddi bi’ ebuna eerrep, sampe’ tello bulan abidda.
3 Tape tantona ta’ ekenneng errep ros-terrosan. Daddi ebuna pas agabay karanjang dhari rebba mendhong, elabur ban pakal sarta etter. Ana’na pas epamaso’ ka karanjang jareya, ban karanjangnga laju esaba’ e ba-rebba se tombu e penggirra Songay Nil.
4 Embugga babaji’ jareya ngetek, manjeng abak jau dhari kennengngan jareya, ngabassagi ba’ baramma’a daddina ale’na.
5 Kabendherran pottrena rato meyos ka songay jareya, aserama. Bu’ embanna padha anante’ sambi lan-jalanan e penggirra songay. O-tao pottre gella’ ngoladi badha karanjang tasangsang e ba-rebba. Pottre jareya laju nembali bu’ embanna, epakon ngala’ karanjang jareya.
6 Karanjang jareya ebukka’, pottre pas ngoladi essena babaji’. Babaji’ jareya nanges, ban pottre arassa neser ka kana’ jareya. Dhabuna, "Tantona reya ana’na oreng Yahudi."
7 Embugga babaji’ gella’ nyander, laju atanya, "Ponapa junandalem enyareyagiya babine’ Yahudi epakona nyepsebbi kana’ ka’dhinto?"
8 "Iya, kassa’ nyareyagi," dhabuna pottre. Daddi kana’ jareya laju ngolok ebuna babaji’ jareya dibi’.
9 Dhabuna pottre ka babine’ jareya, "Giba babaji’ reya, sosowe ban rabaddagi. Bi’ sengko’ ba’na eopa’ana." Daddi bi’ babine’ jareya babaji’na egiba, laju esosowe sarta erabat.
10 Saellana abak raja, kana’ jareya pas eaterragi ka pottrena rato. Bi’ pottre pas epondhut ana’, sarta pas enyamae Mosa. Ca’na panggaliyanna polana ollena ngangkes dhari dhalem aeng.
11 Saellana dibasa, Mosa laju manggi’i reng-oreng sabangsana. Mosa ngoladi ja’ bangsana, iya areya bangsa Yahudi, epaksa alako berra’. E settong are Mosa ngoladi badha oreng Messer mate’e oreng Yahudi.
12 Mosa ngas-balingasan ka kangan ka kacer; saellana ngoladi ja’ tadha’ oreng se nangale’e, oreng Messer gella’ pas epate’e. Mayyidda ebendhem e dhalem beddhi.
13 Kalagguwanna Mosa kalowar pole. E jadhiya ngoladi badha oreng Yahudi kadhuwa teppa’na akeket. Dhabuna Mosa ka oreng se sala, "Aponapa sampeyan me’ atokaran sabangsana?"
14 Ca’na oreng jareya, "Aponapa’a sampeyan me’ ros-orosan, me’ ta’ kala ka rato? Ponapa samangken sampeyan mateyana kaula, akantha se mate’e oreng Messer ka’issa’?" Mosa pas tako’, sabab ca’na panggaliyanna tantona: "badha oreng se tao ja’ salerana mate’e oreng Messer rowa."
15 Naleka rato meyarsa parkara jareya laju nyare akkal mateyana Mosa. Tape Mosa laju buru ka Midian. E settong are, teppa’na Mosa alenggi e seddi’anna settong somor, pas badha babine’an kapetto. Babine’an jareya ana’na Yitro, imamma oreng Midian, entar ka jadhiya nyello’a aeng eenommagiya ka embi’ ban dumbana eppa’na.
16 (2:15)
17 Tape babine’an jareya eojuk bi’ reng-oreng ngowan laenna. Mosa nyander, nolonge babine’an jareya, pas nolonge mondhuddagi aeng se eenommagiya ka embi’ ban dumbana.
18 Sanapa’na babine’an jareya ka bengkona, eppa’na atanya, "Me’ mole baja teya, ja’ reng gi’ aban?"
19 "Kaula ela-salae oreng ngowan, tape pas etolonge oreng Messer," saodda tra-pottrana. "La’-mala’ kaula enyello’agi aeng, ebin se eowan kaula eenome."
20 "Badha e dhimma oreng jareya sateya?" dhabuna imamma oreng Midian jareya ka tra-pottrana. "Me’ ta’ eajak dha’ enna’? Kassa’ kone’e, soro adha’ar e dhinna’."
21 Mosa pas alenggi apolong e jadhiya. Bi’ Yitro Mosa epabine’e pottrana se anyama Zipora.
22 Zipora pas bubut, laju babar lalake’. Ca’na panggaliyanna Mosa, "E dhinna’ reya sengko’ oreng manca, daddi tang ana’ reya bi’ sengko’ enyama’ana Gersom."
23 Saellana olle pan-barampan taon dhari jareya, rato Messer seda, tape bangsa Isra’il gi’ paggun terros ekadunor, daddi padha aserrowan menta tolong, ban Allah meyarsa serrona reng-oreng jareya.
24 E bakto meyarsa serrona reng-oreng Isra’il jareya, Allah emot ka janjina ka Ibrahim, Ishak ban Yakub.
25 Allah ngoladi oreng Isra’il se ekadunor jareya, laju motossagi nolonga reng-oreng jareya.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA