Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 A’bicarami Batara mae ri Musa siagang Harun ri butta Mesir. Nakana,
2 "Anne bulanga a’jari bulang makase’re battu pa’bilangang tanggala’nu.
3 Pabattui anne parentaya mae ri sikontu umma’ Israel: Ri tanggala’ sampulo anne bulanga, sikontu tu bura’nea musti ammolongi sikayu ana’ gimbala’ untu’ nakanre siagang kaluargana.
4 Punna sike’de’ duduji anggota kaluargana, natakkullea napila’busi anjo sikayua ana’ gimbala’, anjo kaluargaya akkullei siagang siampi’ balla’na angkanrei anjo ana’ gimbalaka. Anjo gimbalaka musti nibagei situru’ jaina tau langnganrea.
5 Akkullei nupile gimbalaka yareka bembea, mingka musti lakia, umuru’ sitaung, siagang tenaya callanna.
6 Musti nuboliki sa’genna tanggala’ sampulo angngappa’. Anjo alloa, ri karuenna, sikontu umma’ Israel musti napolongi anjo ana’ gimbalaka.
7 Musti nipasapui sike’de’ cera’na ri ruaya benteng pakke’bu’ ballaka, siagang irateanganna pakke’bu’ napammantangia ke’nanga angkanrei.
8 Anjo memang bangngia musti nulanggai dagenna nampa nupasikanre siagang gangang pai’ siagang roti tenaya nammake pa’gambang.
9 Anjo ana’ gimbalaka musti nilangga ngasengi, kabusu’na siagang ulunna, bangkenna siagang bone battanna. Kanremi anjo dageng le’baka nilangga, teako nia’ nukanre mata yareka nipallu.
10 Teako niakki nuboli’ manna pole sike’de’ anjo dagenga sa’genna bari’basa’; punna nia’ sesanna, musti nitunui sa’genna la’busu’.
11 Ri wattunnu angnganre musti ammakeang bajikko untu’ sadia a’lampa, ammake sandala’ siagang takkang ri limannu. Musti akkaro-karoko angnganre. Iaminjo nipakalompona allo Paska untu’ ampakalompoA’, iNakke anne Bataraya.
12 Anjo bangngia laKujappai sikontu butta Mesir, nampa Kubuno sikontu ana’-ana’ bura’ne toaya, baji’ rupataua, kammayatompa olo’-oloka. LaKuhukkungi sikontu rewatana Mesir, lanri iNakkeji bawang Batara.
13 Anjo cera’ niaka ri pakke’bu’ balla’nu la’jari pammatei mae ri sikamma balla’ pammantangannu. Punna Kuciniki anjo ceraka, laKulaloiko siagang tena naKupanrakiko ri wattunna Kuhukkung Mesir.
14 Anjo alloa musti nuu’rangi na nupakalompo a’jari allo lompo mae ri Batara. Untu’ situlusu’na anjo alloa musti nupakalompoi tunggala’ taung."
15 Nakana Batara, "Tuju allo sallona takkulleako angnganre roti ammake pa’gambang. Ri allo makase’rea sikontu pa’gambanga musti nipasuluki battu ri balla’nu, nasaba’ punna lalanna anjo tuju alloa nia’ sitau angnganre roti ammake pa’gambang, tenamo nakkulle nikana anggota ummakKu.
16 Ri allo makase’rea, kammayatompa ri allo makatujua, musti a’rappungangko untu’ anggaukangi ibadanu. Anjo alloa takkulleako anggaukangi sikamma jamanga pantaranganna untu’ appasadiaya kanre.
17 Anjo alloa laKuerangi sikontu bansanu assulu’ battu ri Mesir. Lanri kammana anjo untu’ situlusu’na, tunggala’ taung, anjo allo kammaya musti nupakalompoi a’jari allo lompo.
18 Lalanna bulang makase’rea, appakkaramula tanggala’ sampulo angngappa’ bangngi, sa’genna tanggala’ ruampulo asse’re bangngi, takkulleako angnganre roti ammakea pa’gambang. Lalang tuju allo sikontu pa’gambanga musti nupasuluki battu ri balla’nu. Sikamma tu Israelka yareka bansa maraenga angnganrea roti ammake pa’gambang lalang nisuarrinna anjo allo lompoa, tenamo nalanikanai anggota ummakKu."
19 (12:18)
20 (12:18)
21 Nakioki Musa sikontu pamimpinna bansa Israel nampa nakana mae ri ke’nanga, "A’lampamako mange angngalle sikayu ana’ gimbala’ untu’ kaluarganu, untu’ ampakalompoi allo Paskaya.
22 Angngalle mako sisikko’ leko’-leko’ nampa nutallangngang naung ri katoang nipammoneia anjo cera’na gimbalaka, nampa nupasapu mae ri ruaya benteng pakke’bu’nu siagang irateanganna pakke’bu’ balla’nu. Sa’genna bari’basa’ tena manna sitau akkulle ambokoi balla’na.
23 Ri wattunna Nainroi Batara anne pa’rasanganga untu’ ambunoi tu Mesirka, laNaciniki Batara anjo cera’ niaka ri ruaya benteng pakke’bu’nu siagang irateanganna pakke’bu’ balla’nu; jari laNalaloiji bawang balla’nu siagang tena Napa’biangi Malaeka’ Kamateanga antama’ ri balla’nu untu’ ambunoko.
24 Ikau siagang ana’-ana’nu musti nuturuki anjo parentaya sa’genna satunggu-tungguna.
25 Punna antama’ mako ri pa’rasangang Napa’janjianga Batara mae ri kau, musti nugaukangi anne pa’gaukanga.
26 Punna akkuta’nang ana’-ana’nu angkana, ‘Apa battuanna anne pa’gaukanga?’
27 Musti appialiko angkana, ‘Anne koro’bang Paska untu’ ampakalompoi Batara, lanri Nalaloi sikamma balla’na tu Israel ri Mesir, ri wattunna Nabuno sikamma ana’ toa bura’nena tu Mesir, nampa ikatte nalappassangki’ attallasa’!’" Jari akkulantu’mi tu Israel siagang anynyomba.
28 Nampa a’lampa ke’nanga siagang nagaukang anjo apa Naparentakanga Batara mae ri Musa siagang Harun.
29 Ri wattu lantanna anjo bangngia Nabunomi Batara sikontu ana’ bura’ne bungasa’na bansa Mesir, appakkaramula battu ri ana’na karaenga, sa’genna mae ri ana’na tau nitarungkua. Sikontu olo’-olo’ bungasaka lassu’ nibuno ngaseng tommi.
30 Anjo bangngia ambangung ngasemmi tu Mesir siagang karaenga kammayatompa sikamma pagawea. Nia’mo kalangngerang sa’ra karru’ lompo ri sikontu pa’rasangang Mesir. Tena manna se’re balla’ tu Mesir takamateang ana’ bura’ne bungasa’na.
31 Anjo memang bangngia, nakio’mi karaenga anjo Musa siagang Harun nampa nakana, "A’lampa ngaseng mako battu anrinni! Bokoi pa’rasangangku! Mange mako ansombai Allata’alanu situru’ pappala’nu.
32 Erang ngasemmi sikontu sapinu, gimbala’nu, siagang bembenu, siagang a’lampamako! Nampa pappalakkang tonga’ barakka’."
33 Nisuro karo-karomi tu Israel a’lampa ri tu Mesir, ambokoi anjo pa’rasanganga. Nakana ke’nanga, "Tena tamatena ngaseng ikambe punna tena nu’lampa ngaseng!"
34 Nampa angngalle ngasemmo tu Israel panci-pancina ke’nanga niaka bonena leokang roti tenaya nammake pa’gambang, nampa naroko’ siagang kaeng, na napisang.
35 Nagaukang ngaseng tommi ke’nanga apa le’baka napau Musa, iamintu appalaki ke’nanga belo-belo bulaeng, pera’ siagang pakeang battu ri tu Mesir.
36 Napagio’mi Batara atinna tu Mesir sa’genna lammoro’ pa’mai’ mae ri tu Israel; napassareammi ke’nanga sikamma apa napalaka tu Israel. Kammaminjo carana tu Israel na naerammo kakalumanynyanganna tu Mesir assulu’ battu ri anjo pa’rasanganga.
37 A’lampami tu Israel a’jappa bangkeng battu ri kota Raamses mange ri kota Sukot. Ia jaina ke’nanga iamintu 600.000 tau, tanirekengapi bai’-bainea siagang ana’-anaka.
38 Jai sikali sapi naerang ke’nanga, kammayatompa gimbalaka siagang bembea. Jai todong bansa maraeng amminawang.
39 Attunumi ke’nanga roti tenaya nammake pa’gambang battu ri leokang naeranga ke’nanga battu ri Mesir. Nibongka silalonnami ke’nanga, sa’genna tenamo nasawe appasadia bokong.
40 Nia’mo 430 taung sallona ammantang bansa Israel ri Mesir.
41 Ri allo kala’busanna anjo taung maka-430 taung, sikontu barisanna anjo umma’Na Batara a’lampami ambokoi butta Mesir.
42 Anjo bangngia tulusu’ a’jagaNa Batara untu’ angngantaraki ke’nanga assulu’ battu ri Mesir. Siagang iatommi anjo bangngia untu’ situlusu’na niu’rangi a’jari bangngi nipakalompo untu’ Batara. Anjo bangngia musti a’jaga-jagai umma’ Israel.
43 Nakana Batara mae ri Musa siagang Harun, "Iaminne paratoranna punna nipakalompo allo Paskaya. Bansa maraenga takkulleai angnganre dageng gimbala’ nipassareanga ri allo Paskaya.
44 Mingka ata nuballia akkullei amminawang angnganre, punna le’ba’mi nisunna’.
45 Tau battu-battua yareka tau angnganre gajia takkulleai amminawang angnganre.
46 Sikontu anjo dageng gimbalaka musti lalangi ri balla’ nikanre, siagang takkulleai nierang assulukang balla’. Teako tepoki bukunna manna pole sipappa’.
47 Sikontu umma’ Israel musti napakalompoi anjo passua’-suarranga.
48 Tau tenayapa nisunnaki takkulleai nakanre anjo kanre passua’-suarranga. Punna nia’ bansa maraeng ammantang tulimi ri kau naero’ ampakalompoi allo Paskaya untu’ ampakalompoA’, iNakke Bataraya, sikontu tu bura’ne niaka lalang ri kaluargana musti nisunnaki la’bi riolo. Le’baki anjo akkullemi ke’nanga nikana tu Israel tojeng-tojeng, siagang akkullemi amminawang lalang ri passua’-suarrang Allo Lompo Paskaya.
49 Anne paratorang kammaya, nataba tongi tu Israel sitojennaya kammayatompa sikamma bansa maraeng niaka ammantang tuli ri tangnga-tangnganu."
50 Mannuruki ngasemmi tu Israel siagang nagaukang ngasemmi sikamma anjo apa le’baka Naparentakang Batara mae ri Musa siagang Harun.
51 Anjo alloa Naerammi Batara sikontu bansa Israel assulu’ battu ri Mesir.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA