Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Jadi dob salpu barita ondi, dob mahombun ringis ni Raja Ahasveros, idingat ma si Vasti ampa pambahenanni ampa haputusan na dob nidalankonni bani.
2 Dob ai roh ma hata ni juakjuak ni raja ai, sipangidangi bani, “Dear ma namin riridon bani raja in anak boru, sijengesan rupa.
3 Ipabangkit raja in ma namin halak bani ganup nagori ginomgomanni in, ase ipatumpu ganup anak boru sijengesan rupa hu huta Susan, hu rumah na niiankon ni naboru-naboru ai, na jinaga ni si Hega, juakjuak ni raja in, anjaha ibere ma hubani sidea minak siparanggirhonon ni sidea.
4 Anjaha anak boru, na hinarosuhkon ni raja in, ai ma gabe puangbolon gantih ni si Vasti.” Marosuh do raja ai mambogei hata ai, jadi ibahen ma sonai.
5 Jadi adong ma ijia i Susan, i huta pamatang ai, sada halak Jahudi, na margoran si Mordahai, anak ni si Jair, anak ni si Simei, anak ni si Kis, halak Benjamin,
6 na dihut tarbuang hun Jerusalem, rap pakon halak na tarbuang, sanggah tarboan si Jekonya raja ni Babel.
7 Ia ma bapa na pagodang-godangkon si Hadasa, ai ma si Ester, boru ni amang tuani, ai seng dong be bapa barang inangni; dear do parangkulaon ni anak boru ai anjaha jenges homa rupani. Jadi dob matei bapani ampa inangni iain si Mordahai ma ia gabe boruni.
8 Jadi dob sar hata ampa titah ni raja ai, anjaha domma buei anak boru ipatumpu hu huta Pamatang Susan, ibagas panjagaan ni si Hega, tarboan ma homa si Ester hu rumah ni raja ai, ibagas panjagaan ni si Hega, siramotkon naboru-naboru ai.
9 Jadi rosuh ma uhurni mangidah anak boru ai, gabe jumpahan idop ni uhur ma ia i lobeini; jadi tarolos ma ia pasirsirhon minak siparanggirhononni sonai homa sipanganon parbagiananni ampa pitu naboru pilihan hun rumah ni raja ai pangkasomanini. Dob ai ipatongon ma hubani ampa hubani naboru pangkasomanini ai ianan sidearan ibagas rumah partumpuan ni naboru-naboru ai.
10 Tapi lang ipatugah si Ester bangsani atap hasusuranni, ai domma itonahkon si Mordahai hinan hu bani, ase ulang ipatugah ai.
11 Anjaha ganup ari do mardalan-dalan si Mordahai i lobei ni rumah partumpuan ni naboru-naboru ai, laho mangidah atap na sonang do si Ester, anjaha aha do na sihol bahenon hu bani.
12 Ai anggo jumpah ma horin ni sada anak boru laho masuk hu lobei ni Raja Ahasveros, dob idalani panorang siparanggironkon ni naboru-naboru sisapuluh dua bulan ai, ai ansai do dokah ni paranggiron ni sidea ai, onom bulan maranggir minak mir, onom bulan nari minak balsem ampa na morum-morum na legan na somal pinakei ni naboru-naboru,
13 dob ai pe ase bulih ia masuk hu lobei ni raja ai; ibere ma hubani barang aha harosuhni siboanonni hun rumah partumpuan ni naboru-naboru ai hu rumah ni raja ai.
14 Bodari masuk ma ia, anjaha patarni mulak use hu rumah partumpuan ni puang-puang na paduahon, na ibagas panjagaan ni si Saasgas, juakjuak ni raja ai, na manramotkon naboru-naboru ai; seng bulih be ia roh hu lobei ni raja ai, legan ma anggo marosuh uhur ni raja ai mangidahsi, anjaha idilo goranni.
15 Jadi dob jumpah horin ni si Ester, boru ni si Abigail ai, amangtua ni si Mordahai, na dob niainni gabe boruni, laho masuk hu lobei ni raja ai, seng dong age aha ipangindo sobali na hinatahon ni si Hega, juakjuak ni raja ai, siramotkon naboru-naboru ai. Jadi ganup ma halak na mangidah si Ester ai, rosuh uhurni mangidahsi.
16 Jadi iboan ma si Ester hu lobei ni Raja Ahasveros, hu rumah ni raja ai, bulan sapuluh, ai ma bulan Tebet, papitu-tahunkon dob gabe raja ia.
17 Jadi holongan ma uhur ni raja ai mangidah si Ester humbani ganup puang-puang na legan ai, bueinan do ia jumpahan idop ni uhur ampa rosuh ni uhur i lobei ni raja ai, ase ganup anak boru ai; ipajujungkon raja ai ma bani sada sortali harajaon, laho pabangkitkonsi gabe raja, gantih ni si Vasti.
18 Ibahen raja ai ma sada pesta banggal bani ganup pambobai ampa juakjuakni, pesta banggal halani si Ester ai. Ambahni ai iparentahkon raja ai ma, ase ipahampung balasting ni nagori-nagori ai, anjaha marsilayak-layak ia romban hubani habayakon ni raja ai.
19 Sanggah na patumpuhon anak boru ai paduahalihon, hundul-hundul do si Mordahai i horbangan ni raja ai.
20 Ia si Ester seng ipatugah hasusuranni ampa bangsani, songon na tinonahkon ni si Mordahai hu bani; songon na hinatahon ni si Mordahai ai do ibahen si Ester, usih songon sanggah na pinagodang-godangni ia.
21 Bani panorang ai sanggah hundul-hundul si Mordahai i horbangan ni raja ai, manriah ma dua halak juakjuak ni raja ai, si Bigtan pakon si Teres, sijaga labah, gabe ipindahi sidea ma dalan laho mambunuh Raja Ahasveros.
22 Tarbogei ma ai hubani si Mordahai, gabe ipatugah ma ai hubani si Ester, puangbolon ai, anjaha si Ester use patugahkon ai hubani raja ai i atas goran ni si Mordahai.
23 Jadi dob ipareksa parkara ai, anjaha sonai do tongon, gabe igantung ma sidea haduasi hubani hayu. Anjaha isuratkon do ai ibagas buku Barita ni Raja ai.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA