¹ Walasna, em ane-bia uk mo ol san em ang ta gwen, sap Kristen walas hap zen kirekam dakastiꞌin.
² Sap Alap mo olak man lwak, “Ane-biasa em blikip gwesik gwizimdin.” Hen Alap mo dare taha-tapkam de jalse gwen olak, walas hap dena in sren. Sap zeno aumwa topnak anakare gu-gubiridan ola man lwaꞌan,
³ “Em de ane-biasa blikip gwesik gwizimdinkim, em heꞌho gwibin nika esa hla kul gwer, hen eno mae mo okamanak de gwenna sa blal gwer.”
⁴ Bi walkam dena, walas omka bahem olkam hit ti gwibin. Ki sa hwena emsa husus neibirida gwer. Diki dawemna Bian Yesus mo dwam gwibin sin em oto tasik gwibin hen tawa ta gwibin.
⁵ Men zen zi mo tana iltikinnik ebabu gwe-gwenan, emki ere mae mo zi bina in mo ol san tingare enho naban ang ta gwen– dawemkam de blikip gwesiblin naban hen airin niban, men kiye, Bian Yesus Zenaka de blikip gwesiblinna.
⁶ Zen kirekam em lowehe gwen– sap zi bina in de zen emsa kara tabin sremnak, sap emsa de kara tabinnik. Hwena anakan em eenlala gwe-gwen, “Ëe an diki Kristus mo tana iltikinnik de gwe gwen zi. Zi mo tana iltikinnik home. Ëe zep asa aha-ere enlalakam Bian Alap mo dwam gwibin sin zini an hon syal gwe-gwer.”
⁷ Zen in zep em isrip-sri naban ere mo zi bina in mo syala gol gwen– anakare enlala naban, “Asa an Bian Yesus awe de syal gwen hap dam tasiki, zep ee an zeno syalsae goꞌan. Zini an moka home.”
⁸ Emki hen eenlala gwe-gwen, “Dawemsa de syal gwe-gwibin wenya, Bian sa zebe mae hap dawemna golzimdi– sap tana iltikinnik de lowehen wenya kip, hen sap kirenak de lowehen srem wenya kip.”
⁹ Em hen zisi de bi gwibiridan wenya, dawem enkam em golelowehe gwen– ere mae hon de ebabu gwen zini in saye. Bahem jala ban anakan tik-tik ta gwibin, “Em de ansa nabakam syal gwibin sremkam, ee asa emsa lek tyal.” Emki eenlala gwe-gwen, “Deban mae apdekam neno mae mo Zi Bina hen ki– in Zen ngatan zi mo langnak gweꞌaraye. Hen Zen hom ahakore en naka nwekam goleake gwenda.”
¹⁰ Zep aumwa hap ee ama emsa gubiridaꞌan: Bian han de zeraha-en gwen ennak nen tatem ezauk gwen, sap zeno sosonna mam tanganna.
¹¹ Sap nen angkam dowal mo kigi nabane ereijaꞌan, hen zen mes tangan eijan hap tewesiki. Zen in zep, eijan hap de kirekam-kirekamna mensa Alap nebe mae hap gol gwizimnira, desa nen kitak alala tan hen teirensin. Zen dekam esa tatem ezaul.
¹² Sap nen zi bosyan han de eijan hap home etamal gweꞌan. Hwena kirekam-kirekam dowal-dowala ban de goleeijan habe etamal gweꞌan– men zen angkam de lang kawesinni ansa bi neibiꞌinke, hen men zen ngli nakon tingare dowal-dowala teipsinkim irik niꞌin halke.
¹³ Zen in zep, tingare Alap onakore eijan hap de kire-kirena insa nen teirensin hen alala tan– dekam de dawemkam neno mae mo jal zini insa goleeijan hap, zen de nesa tobe gul zunnak, hendep eijan yala in de tap gwennak eka nama tatem ezauk.
¹⁴ Zen in zep, nen tatem ezaun. Alap onakore eiwa de ola, tak makan nen darak tan. Hen anakare enlalana biti makan nen darak tan, “Alap eiwa mes abe hap golblaka– ee dikim zere mo nwenak gwen hap, san de kareksa de gol gwen srem zi.”
¹⁵ Alap onakore ol dawemna, zere han dikim zerumlae gwen hap dena, zao en nen ki tatem ezaun. Zen san de eijan hap de sepatuna kiye– nen dikim tatetekam ezaun hup dena.
¹⁶ Dowal mo kigi mo gwetapna, zen syauk nuban. Zen de nebon tisin srem hap, Biansa nen anakan taibli gweblan, “Zen Zen sa asa il gwehe gweblala.”
¹⁷ Eijan hap de topina, zen anakare enlala naban nen lowehe gwen, “Asa mes Yesus ngaya taka.” Hen Alap mo ola, zen nebok makan nen teirensin, sap Alap mo Enho nakore sosonna, zen zewe.
¹⁸ Banakare maekam de lowehen nakon, Alapsa nen zere mo Enho nakore sosonkam gu sonebla tine gwen. Salok-salokkam nen lowehe gwen, hen Alapsa de abe ta gwenna bap nen esin gwe hana gwen. Ere mae en hap bahem gu sone gweblan, hwena tingare langnak de Kristen zi hip em hen gu sone gweblan.
¹⁹ Asa hen ol gu sonenkam bahem eititi gwe-gweblan. Sap ee ol dawem gol halada gwen jal habe jalom ek tihinak awe gwe gweꞌan– Kristus hup de ol aning gunsu de Yahudi srem zi mo lang san dep gol halada gwen jal hap. Anakarekam emki gu sone gweblan, “Bian, Paulus hup enlala blala ing ta sone gwebla– zen dekakim udobe naban engaya gwen hap de ol dawemsa srip gulsuk gwizimki.”
²⁰ (6:19)
²¹ Neno mae mo wal bose dawemna, Tikikus Bak, zen tatetekam Bian mo nganak syal gwe-gwenda. Zen sa emsa ekkam abe hap de ola anakan tonbirida zala, “Zen angkam kirekam bwinak gweꞌara.” In zebe ebon mae osan dep zer soneꞌan– zen de abe hap hen ano wal bose wal hap denaka emsa tonbiridazan hap. Eno mae mo abe hap de enlala ngalapna dekam sa sewe hera.
²² (6:21)
²³ Dikire Bian Alap ne Bian Kristus Yesus nebon onakon ebe mae hap hata gwizimk– em dikim kwasang-kwasang naban lowehe gwen hap dena, hen Zena en naka dikim taiblizimdin hip denaye. Sap em in zere nik mo taha terenake lowehe gweꞌan.
²⁴ Dikire Alap onakore kwasang-kwasangna ebon mae onak lwa gwek– hen tingan men zebon mae Bian Kristus Yesus hup de kwasang-kwasangna tinsin sremkam lwa gwenanke.