Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Anggo domma iboan Jahowa Naibatamu ham masuk hu tanoh simasukonmu bahen parbagiananmu, anjaha buei bangsa sipajuh begu-begu ipabali hun lobeimu, ai ma halak Heti, Girgasi, Amori, Kanan, Peresi, Hewi pakon Jebusi, pitu bangsa bueian anjaha gogohan hun bamu,
2 anjaha anggo domma iondoskon Jahowa, Naibatamu sidea hu bamu, anjaha italuhon ham sidea, jadi maningon siapkononmu do sidea; seng bulih ham marpadan pakon sidea, anjaha seng bulih idopanmu sidea.
3 Anjaha seng bulih ham marsibuatan pakon sidea; seng bulih bereonmu borumu bani anak ni sidea, anjaha seng bulih buatonmu boruni bani anakmu.
4 Ai padari-darionni do anakmu marbalik humbangku, ase balosanni naibata na legan, jadi gajak ma ringis ni Jahowa mangidah nasiam, anjaha podas ma nasiam agouon-Ni.
5 Tapi maningon sonon do bahenonmu bani sidea; maningon parreongon nasiam do anjapanjap ni sidea, anjaha bolahan nasiam tiang sisombahon ni sidea, anjaha robohon nasiam sinumbah ni sidea, anjaha tutungon nasiam gana-gana ni sidea bani apuy.
6 Ai bangsa na pansing do nasiam bani Jahowa, Naibata nasiam; domma ipilih Jahowa Naibatamu ham humbani bangsa na i tanoh on bahen bangsa-Ni sandiri.
7 Sedo halani bueinan nasiam humbani bangsa na legan, ase ihaholongi Jahowa nasiam anjaha ipilih nasiam, ai nasiam do namin sietekan humbani sagala bangsa;
8 tapi halani holong ni uhur ni Jahowa do mangidah nasiam, anjaha laho patotapkon bulawan-Ni, na dob binulawankon-Ni hubani ompung nasiam, ase iarahkon Jahowa nasiam luar marhitei tangan na gogoh, anjaha itobus ham hun rumah parjabolonan, humbani Parao, raja ni Masir.
9 Halani ai botoh nasiam ma, Jahowa do Naibatamu, Naibata na sintong anjaha na bonar, na manramotkon padan pakon idop ni uhur bani halak na mangkaholongisi, pakon na manramotkon tonah-Ni, ronsi marribu-ribu sundut.
10 Tapi na mambalaskon hubani haganup na mangkagigihonsi marhitei na mangagouhon sidea; seng maralang-alang uhur-Ni mambalaskon jalo-jalo hajahaton ni halak na mangkagigihonsi.
11 Halani ai maningon ramotkononmu do tonah, aturan pakon uhum, sagala na hutonahkon sibahenonmu sadari on.
12 Jadi halani itangihon nasiam do uhum on, anjaha iramotkon pakon ihorjahon nasiam do in, jadi ramotkonon ni Jahowa ma bamu padan pakon idop ni uhur, na dob binulawankon-Ni bani ompungmu;
13 haholongan-Ni ma ham, anjaha pasu-pasuon-Ni, anjaha pabueion-Ni; pasu-pasuon-Ni do age buah ni boltokmu pakon buah ni tanohmu, gandummu, anggurmu, minakmu, rindih ni lombumu pakon biribiri, i tanoh na dob binulawankon-Ni hubani ompungmu, sibereon-Ni hu bamu.
14 Dapotan pasu-pasu ma ham lobih humbani haganup sagala bangsa; seng dong i tongah-tongah nasiam age sahalak dalahi barang naboru na lambang, age bani pinahan nasiam.
15 Anjaha padaohon ni Jahowa ma hun bamu sagala naborit, anjaha seng lopason-Ni sampar ni Masir na tinanda nasiam ai mangonai hubani nasiam, tapi hubani na mangkagigihon nasiam do ai mangonai bahenon-Ni.
16 Maningon bois siapkononmu haganup bangsa, na niondoskon ni Jahowa Naibatamu bamu, anjaha ulang ma malang-malang uhurmu mangidah sidea; anjaha seng bulih balosanmu naibata ni sidea, ai gabe tirangkap do ai bani nasiam.
17 Anggo nimu ibagas uhurmu, “Bueinan do bangsa sipajuh begu-begu on humbangku, sonaha ma pangusir hubani sidea?”
18 Ulang ham gobir mangidah sidea, tapi sai ingat ham ma na binahen ni Jahowa Naibata nasiam hubani Parao pakon hubani haganup halak Masir,
19 parlajouan na bolon, na nididah ni matamu sandiri, sagala tanda pakon halongangan, tangan na gogoh pakon botokon na toltol, na pinamasa ni Jahowa Naibatamu, laho paluarhon ham; sonai ma bahenon ni Jahowa, Naibatamu, hubani sagala bangsa na hinabiaranmu.
20 Tongoson ni Jahowa Naibatamu ope uhum hamagouan hu tongah-tongah ni sidea, paima siap ganup na tading ai ope pakon na marponop hun lobeimu.
21 Ulang ma gobir ham mangidah sidea, ai Jahowa Naibatamu do i tongah-tongahmu, Ia do na timbul anjaha na jombut.
22 Jahowa Naibatamu do na maniapkon otik-otik sagala bangsa sipajuh begu-begu i lobeimu; seng bulih sidea sahali siap bahenonmu, ase ulang lambin ganda binatang harangan pasari-sarionmu.
23 Tapi Jahowa Naibatamu do mangondoskon sidea i lobeimu, marhabiaran tumang do sidea bahenon-Ni paima siap tumang sidea.
24 Raja ni sidea pe ondoskonon-Ni do hubagas tanganmu, ase sasap goran ni sidea bahenonmu hun toruh ni langit, seng dong age sahalak na tahan i lobeimu, paima siap sidea bahenonmu.
25 Maningon bois do tutungonmu bani apuy gana-gana ni naibata ni sidea, seng bulih oji uhurmu bani pirak atap omas na longkot ijai, barang buatonmu ai bamu, ase ulang hona tirangkap ham bahenon ni ai, ai hagigian ni Jahowa Naibatamu do ai.
26 Halani ai seng bulih boanonmu ugas hagigian hu rumahmu, ase ulang hona papa ham usih songon ugas ai; maningon hasogamkononmu anjaha hagigihononmu do ugas na sonai, barang na dob hona papa do ai.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA