Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Mosa adhabu pole ka reng-oreng Isra’il,

² "Sateya tang omor la saratos dhu polo taon, sengko’ la ta’ sanggup pole mimpin ba’na. Laen dhari jareya PANGERAN la adhabu ja’ sengko’ ta’ eedine noro’ alengka Songay Yordan.

³ GUSTE Allah dibi’ se alomampa’a e adha’anna ba’na, mateyana sa-bangsa se abengko e jadhiya, sopaja ba’na bisa’a ngobasane nagarana. Yusak se mimpina ba’na, akantha se la edhabuwagi PANGERAN.

⁴ PANGERAN matompessa sa-bangsa jareya, padha ban se makala Sihon ban Og, ratona oreng Amori, ban maancor nagarana.

⁵ Bi’ PANGERAN ba’na epamennanga ka sa-bangsa jareya, saellana jareya ba’na kodu atoro’ ka apa se epessennagi sengko’ parkara sa-bangsa jareya kodu epabaramma.

⁶ Ba’na pakoko atena, ban pabangal. Ta’ osa tako’ ka sa-bangsa jareya, ba’na bakal etolonga bi’ GUSTE Allahna dibi’. Ba’na ta’ kera eco-koco ban ta’ kera edinggallagi bi’ Salerana."

⁷ Mosa pas adikane Yusak, sarta pas adhabu e adha’na reng-oreng Isra’il, "Ba’na pakoko atena ban pabangal, Yusak! Ba’na se mimpina bangsa Isra’il reya se entara arebbu’ nagara se ejanjiyagi PANGERAN ka bangatowana.

⁸ PANGERAN dibi’ se nontona ban nolongana ba’na. PANGERAN ta’ kera co-ngoco ban ta’ kera adinggallagi ba’na. Daddi ba’na ta’ osa tako’ otaba kene’ ate."

⁹ Mosa pas nyerrat hokomma GUSTE Allah, laju eparengngagi ka mam-imam Lewi se epangoros Petthe Parjanjiyan, sarta ka para pamimpinna oreng Isra’il.

¹⁰ Mosa makon kantha reya ka reng-oreng jareya, "Sabban pettong taon sakaleyan, e aher taon, e dhalem taon palebbaranna otang e bakto paraya’an Ranggun Dhaun,

¹¹ ba’na kodu maca’agi kom-hokom reya pakaja e adha’anna reng-oreng Isra’il se abakte ka GUSTE Allahna e kennengngan se etantowagi Salerana.

¹² Reng-oreng lalake’an ban babine’an, na’-kana’ ban oreng manca se abengko e tha-kotthana ba’na soro akompol, soro ngedhingngagi baca’an jareya, me’ olle reng-oreng jareya ajar hormat ka GUSTE Allahna sarta ngestowagi kon-papakonna.

¹³ Kalaban cara se kantha jareya, na’-ana’na ba’na se gi’ ta’ tao ngedhing parkara hokomma GUSTE Allahna jareya pas daddi ngedhing, sarta pas ajar hormat ka Pangeran saabidda odhi’ e nagara se sakejja’ aggi’ reya bakal ekobasa’ana ba’na e bara’na Songay Yordan."

¹⁴ PANGERAN pas adhabu ka Mosa, "Odhi’na ba’na e dunnya reya la ta’ abit pole. Daddi kassa’ olok Yusak, ajak ka Tang Kemah, bi’ Sengko’ eberri’ana du-petodu." Daddi Mosa ban Yusak laju meyos ka Kemah Socce,

¹⁵ PANGERAN ngaton ka se kadhuwa jareya e dhalem pelar ondhem e seddi’na labangnga Kemah.

¹⁶ Dhabuna PANGERAN ka Mosa, "Ba’na la para’ mateya, ban samatena ba’na, bangsa Isra’il ta’ esto pole ka Sengko’, ban ta’ neptebbi parjanjiyan se epabadha Sengko’ bi’ reng-oreng jareya. Reng-oreng Isra’il bakal mongkorana Sengko’ sarta pas nyemba’a ka la’-alla’an se esemba e nagara se sakejja’ aggi’ emaso’ana reng-oreng Isra’il jareya.

¹⁷ Mon sampe’ kantha jareya, Sengko’ bakal peggella parana ka reng-oreng jareya. Reng-oreng jareya bi’ Sengko’ edina’agiya ban epatompessa. Bi’ Sengko’ epadhatengngana balai se nako’e sabannya’na, saellana jareya reng-oreng Isra’il buru apangrasa ja’ balai jareya dhateng polana aba’na eonduri bi’ Sengko’.

¹⁸ E bakto jareya Sengko’ la ta’ endha’ nolonge reng-oreng jareya pole, polana reng-oreng jareya nyemba ka la’-alla’an ban alako jahat.

¹⁹ Sateya mara toles nyanyeyan reya, ajarragi ka bangsa Isra’il menangka bukte se nerrangngagi salana reng-oreng jareya.

²⁰ Bi’ Sengko’ reng-oreng Isra’il jareya egiba’a ka nagara se sogi tor landhu, akantha se ejanjiyagi Sengko’ ka bangatowana. E dhissa’ reng-oreng jareya bakal sennengnga odhi’na ban bakal olleya sakabbinna kakanan se ekaparlo aba’na. Tape saellana jareya reng-oreng jareya bakal mongkorana Sengko’ pole, pas nyemba ka la’-alla’an. Reng-oreng jareya bakal nolaga Sengko’ ban mongkere Tang parjanjiyan,

²¹ ban bakal bannya’a balai se nako’e se teba’a ka aba’na. Tape nyanyeyan reya bakal enyanyeyagiya terros, menangka bukte se nerrangngagiya salana reng-oreng jareya. La’-mala’ sateya reya, sabellunna Sengko’ ngeba reng-oreng jareya ka nagara se la ejanjiyagi Sengko’ rowa, Sengko’ la tao essena atena."

²² E are jareya keya Mosa nyerrat nyanyeyan rowa, se pas eajarragi ka bangsa Isra’il.

²³ Saellana jareya PANGERAN adhabu ka Yusak, pottrana Nun, dhabuna, "Ba’na pakoko atena ban pabangal, Yusak! Ba’na se mimpina bangsa Isra’il maso’a ka nagara se ejanjiyagi Sengko’ ka reng-oreng jareya, ban Sengko’ se nolongana ba’na."

²⁴ Mosa pas nyerrat kom-hokomma PANGERAN e dhalem buku. Se nyerrat epangastete, dhari adha’ sampe’ ka budhi.

²⁵ Saellana mare pas adhabu ka mam-imam Lewi se epangoros Petthe Parjanjiyan, dhabuna,

²⁶ "Giba buku Hokomma Allah reya, saba’ e seddi’anna Petthe Parjanjiyanna GUSTE Allahna, sopaja pagguna badha e jadhiya menangka bukte se nerrangngagi salana bangsa reya.

²⁷ Sengko’ tao bangsa Isra’il reya ce’ cengkalla ban dujan aberonta’. E bakto sengko’ gi’ odhi’ bai reng-oreng jareya la aberonta’ ka PANGERAN; apa pole mon sengko’ la mate!

²⁸ Sateya mara pakompol e adha’anna sengko’ reya para pamimpinna bangsa Isra’il ban para parwirana, polana badha se ekoca’agiya sengko’. Langnge’ ban bume bi’ sengko’ epadaddiya sakse ka reng-oreng jareya.

²⁹ Sengko’ tao, ja’ mon sengko’ la mate, oreng Isra’il tanto daraka’a pole ban ta’ endha’ atoro’ ka sabarang se la eajarragi bi’ sengko’. Pagi’ reng-oreng jareya bakal nemmowa balai, sabab PANGERAN duka polana reng-oreng jareya ngalakone sabarang se elarang PANGERAN."

³⁰ Saellana jareya Mosa laju anyanye sampe’ mare, eedhingngagi bi’ sakabbinna ommat Isra’il.

Ulangan

Video Ulangan 31

Ikuti Kami:

KONTAK | PARTISIPASI | DONASI