Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 "Suku Lewi, eme suku imam, sitik pe la ngalo taneh i bas Israel jadi baginna. Tapi ia nggeluh i bas pemere ras persembahen si ibereken man TUHAN.
2 La lit taneh sikerajangenna, bagi suku-suku si deban; baginna eme kinihamaten jadi imam TUHAN sue ras si ipadanken TUHAN.
3 Adi lit kalak mpersembahken lembu ntah biri-biri, maka imam-imam ngaloken paha lebena, tulan rahangna, ras beltekna.
4 Bagin si pemena i bas gandum, anggur, minak saitun ras mbulu biri-biri, e pe jadi bagin imam-imam.
5 TUHAN milih suku Lewi i tengah-tengah suku-sukundu si deban gelah suku e ndahiken ndahin TUHAN selaku imam seh asa lalap.
6 Tiap kalak Lewi banci reh i bas tep-tep kota Israel nari ku ingan ersembah si sada e, adi bage atena,
7 dingen pe banci erdahin i je selaku imam TUHAN Dibatana bali ras kalak Lewi si deban si erdahin i je.
8 Pangan si man alonkenna bali buena ras imam-imam si deban. Banci isimpanna kai pe si itenahken keluargana man bana."
9 "Kenca kam seh ku negeri si ibereken TUHAN Dibatandu man bandu, ula ikutken perbahanen-perbahanen si mbau i bas bangsa-bangsa si lit i je.
10 Ula persembahken anak-anakndu i bas api i babo batar-batar persembahenndu. Ula pelepas bangsandu ertendung, ngoge tanda-tanda, ntah mpergunaken mangmang,
11 ntah make guna-guna, janah ula pediat ia nungkun man begu kalak si nggo mate.
12 Nembeh ate TUHAN Dibatandu man kalak si ngelakoken perbahanen si mbau e. Eme pe sabapna maka IpelawesNa bangsa-bangsa e i bas negeri e nari sanga kam ngasak ku je.
13 Setialah man TUHAN alu bulat ukurndu."
14 Kenca bage nina Musa, "I bas negeri si nandangi iinganindu e, rayat si i je ngikutken pedah-pedah kalak ertendung, ngoge tanda-tanda. Tapi ilarang TUHAN kam ngelakoken si bage.
15 Tapi isuruh TUHAN pagi man bandu sekalak nabi bali ras aku, i bas bangsandu nari, janah arus iikutkenndu ia.
16 I bas wari sanga kam pulung i Deleng Sinai mindo kam maka ulanai ibegindu TUHAN ngerana tole, bage pe ulanai min iidahndu api KemulianNa, sabap mbiar kam mate perban si e.
17 Erkiteken si e nina TUHAN man bangku, 'Mehuli kal pemindonna e.
18 Kusuruh pagi man bana sekalak nabi si seri ras kam i bas tengah-tengah bangsana nari; Kukataken pagi man bana kai si man katankenna. Janah iturikenna pagi man bangsa e asa kai si Kuperentahken.
19 Ngerana ia i bas gelarKu, janah Kuukum asa kai kalak si la nggit ngikutken ia.
20 Tapi adi lit sekalak nabi si pang ngerana i bas gelarKu sedangken la Kuperentahken ia ngerana, arus maka mate ia erkiteken si e. Bage ka pe, asa kai nabi si ngerana i bas gelar dibata-dibata si deban arus mate erkiteken si e.'
21 Nggit maka nungkun pusuhndu, uga nge metehsa maka si iberitaken sekalak nabi la i bas TUHAN nari.
22 Adi lit sekalak nabi ngerana i bas gelar TUHAN, tapi la jadi bagi si ikatakenna e, tentu beritana e labo berita TUHAN. Nabi e ngerana i bas gelarna jine, emaka ula kam mbiar man bana."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA