Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Anak ni Jahowa Naibata nasiam do nasiam. Halani sahalak na matei, seng bulih rarikan nasiam daging nasiam, anjaha seng bulih suhuron nasiam salibon ni mata nasiam.
2 Ai bangsa na pansing do ham bani Jahowa Naibatamu, anjaha domma ipilih Jahowa ham, ase ham gabe bangsa-Ni sandiri humbani ganup bangsa na i atas tanoh on.
3 Seng bulih panganonmu sagala sihagigihononkon.
4 On ma pinahan na bulih panganon nasiam: Lombu, biribiri pakon hambing,
5 ursa, balua, horbou, bedar, badak,
6 ganup binatang na martambirik anjaha bolah dua tambirikni ai, pakon na marbituha ulak-ulak i tongah-tongah ni pinahan, bulih do panganonmu.
7 Tapi seng bulih panganon nasiam humbani pinahan na marbituha ulak-ulak tumang pakon humbani na marbolah tambirikni tumang, songon: Unta, ampodi pakon sorigala, ai marbituha ulak-ulak do ai namin, tapi lang marbolah anggo tambirikni, halani ai maningon butak do ai bani nasiam.
8 Sonai ma homa babuy, ai marbolah do namin tambirikni, tapi lang marbituha ulak-ulak, halani ai maningon butak do ai bani nasiam. Juhutni pe seng bulih panganon nasiam, anjaha bangkeini pe seng bulih jamahon nasiam.
9 On do na bulih panganon nasiam humbani ganup na ibagas bah: Sagala na maripis anjaha marsisik, ai ma na bulih panganon nasiam.
10 Tapi sagala na so maripis anjaha marsisik, seng bulih panganon nasiam; maningon butak do ai bani nasiam.
11 Sagala manuk-manuk na panti bulih do panganon nasiam.
12 Tapi seng bulih panganon nasiam anggo on: Manuk-manuk nanggordaha, haluhuy bolon pakon lali,
13 haluhuy silopak, haluhuy sibirong, haluhuy borngin ronsi masam-masam ni,
14 kawak ronsi masam-masamni,
15 manuk-manuk unta, langkupa, undan, haluhuy sipiuan ronsi masam-masamni,
16 sipauk, bongkik, pakon boluk,
17 onggang, silogou-logou, pakon kiung laut,
18 tapi garo-garo, sitanda ulog ronsi masam-masamni, sonai lingkaboh pakon anrip-anrip.
19 Sonai homa sagala na manjulur humbani na marhabong maningon butak do ai bani nasiam, seng bulih panganon nasiam ai.
20 Sagala manuk-manuk na panti bulih do panganon nasiam.
21 Seng bulih panganon nasiam sagala na matei sandiri, hubani halak dagang na marianan ibagas hutamu, bulih do bereonmu, ase boi panganonni ai barang jualonni hubani halak na legan ai bangsa na pansing do ham bani Jahowa Naibatamu. Seng bulih lompahonmu anak ni hambing ibagas dadih ni inangni.
22 Maningon parsapuluhonmu do gogoh ni bonih na sinaburhonmu, sagala na dong tubuh i tanohmu ganup tahun.
23 Anjaha i lobei ni Jahowa Naibatamu, bani ianan na pinilih-Ni bahen ianan ni goran-Ni ijai, maningon ijai do panganonmu parsapuluhan ni gandummu, anggurmu, minakmu pakon bunga tubuh ni lombumu pakon bunga tubuh ni biribirimu, ase marlajar ham tongtong marhabiaran bani Jahowa Naibatamu.
24 Tapi anggo madaohtu dalan ai bamu, pala seng tarboban ham sibobanonmu halani madaohtu ianan ai, na dob pinilih ni Jahowa Naibatamu bahen onjolan ni goran-Ni ijai, anggo ipasu-pasu Jahowa Naibatamu ham,
25 jadi boi do duitkononmu ai, anjaha balutanmu duit ai ibagas tanganmu, anjaha laho ham hu ianan, na dob pinilih ni Jahowa ai,
26 anjaha pakeionmu duit ai bani atap aha sir ni uhurmu, lombu, barang biribiri barang anggur atap siinumon na koras, atap aha tene sir ni uhurmu; maningon mangan ham ijai, i lobei ni Jahowa Naibatamu, anjaha marmalas ni uhur ham rap pakon hasomanmu sarumah.
27 Anjaha ulang ma lang isarihon uhurmu halak Levi, na marianan ibagas hutamu, ai seng dapotan parbagianan barang tean-teanan ia rap pakon ham.
28 Dob salpu tolu-tolu tahun maningon padaratonmu sagala parsapuluhan ni gogoh ni tanohmu bani na satahun ai, anjaha patumpu ham ma ai ibagas hutamu.
29 Jadi roh ma halak Levi, halani lang dapotan parbagianan barang tean-teanan ia, halak dagang, dakdanak na tading maetek, pakon puang-puang na mabalu, ibagas hutamu, ase mangan anjaha bosuran sidea; ase ipasu-pasu Jahowa Naibatamu ham ibagas sagala horja ni tanganmu na binahenmu.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA