Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 "Enda me undang-undang si man ikutenkenndu kidekah geluhndu ibas negeri si ibereken TUHAN Dibata nu nini-ninindu man bandu. Begiken dage:
2 I negeri si nandangi ibuatndu e, kernepken kerina ingan-ingan bangsa e nembah man dibata-dibatana, subuk i datas deleng-deleng si meganjang, i datas uruk-uruk, bage pe i teruh batang kayu mbelin.
3 Runtuhken lah batar-batarna, sontarken lah seh getem tugu-tugu batuna si iakap kalak badia. Ciluk gambar berhala Asera, bulakken gana-ganana, gelah asa ndigan pe lanai ia isembah i bas ingan-ingan e.
4 Ula sembah TUHAN Dibatandu bagi penembah kalak dibata-dibatana.
5 TUHAN milihsa sada ingan i bas daerah suku-sukundu nari man inganndu ersembah muji gelar TUHAN. Ku ingan si sada eme bangsandu arus reh ngadap TUHAN ras ersembah man BaNa.
6 I je me kam mpersembahken persembahen tutungen ras persembahen gelehen si deban, persembahen persepuluhenndu, persembahenndu si khusus, pemere si ipadankenndu man TUHAN, persembahen ukur meriah, anak lembu ntah biri-birindu si pemena.
7 I je me, i adep-adepen TUHAN Dibatandu si nggo masu-masu kam, kam ras keluargandu man ersenang-senang ngenanami kerina si mehuli si nggo idahikenndu.
8 Adi nggo seh paksana e, lanai banci bagi si gelgel perbahanenndu. Seh asa genduari kerina kam biasa nembah bagi ate-atendu,
9 sabap langa kam seh i negeri si nandangi ibereken TUHAN Dibatandu man bandu, i ja kam banci nggeluh alu dem kemalemen ate.
10 Adi nggo ikeparindu Lau Jordan e, TUHAN meresa maka banci kam nggeluh ngingani negeri e. Ia si njagai kam, maka aman kam i bas musuh-musuhndu nari, gelah kam nggeluh alu dame.
11 TUHAN milihsa sada ingan ersembah man BaNa. Emaka arus ibabandu ku bas ingan e kerina si nggo kuperentahken man bandu: persembahen-persembahen tutungen ras persembahen gelehen si deban, persembahen persepuluhenndu, persembahenndu si khusus, pemere khusus si nggo ipadankenndu man TUHAN.
12 Ermeriah ukurlah kam i adep-adepen TUHAN ras anak-anakndu, suruh-suruhenndu, ras kalak Lewi si tading i kotandu. Ingetlah maka kalak Lewi la lit tanehna jine.
13 Ula persembahkenndu persembahenndu i bas ingan-ingan si ipilihndu jine.
14 Tapi arus maka ipersembahkenndu e i bas ingan si sada, si ipilih TUHAN i bas sada daerah suku-sukundu nari. I bas ingan e saja ngenca kam banci mpersembahken persembahen tutungen ras ngelakoken lakon si deban si nggo kuperentahken man bandu.
15 Tapi bebas kam nggeleh ras man asuh-asuhenndu i japa pe kam tading. Banci ipanndu asa buena ibereken TUHAN man bandu. Kerina kam subuk si bersih ras lang rikutken aturen agama, banci man daging ndai, bali ras pemanndu daging belkih ntah bedar.
16 Tapi la banci ipanndu darehna; amburkenlah e ku taneh desken lau.
17 La banci ipanndu i bas inganndu tading persembahen si ipersembahkenndu man TUHAN: persembahen persepuluhen i bas gandumndu, lau anggurndu, minak saitunndu, anak lembu ntah biri-birindu si pemena, pemere si ipadankenndu man TUHAN, persembahen ukurndu meriah, ntah persembahen-persembahen si debanna.
18 I bas adep-adepen TUHAN Dibatandu, i bas sada ingan ersembah si ipilih TUHAN Dibatandu ngenca banci ipanndu persembahen-persembahen e, kam ras anak-anakndu ras suruh-suruhenndu bage pe ras kalak Lewi si tading i bas kotandu. Ermeriah ukur kam i je kerna kasa kai si nggo idahikenndu.
19 Jaga, maka ula ilupakenndu kalak Lewi kidekah kam tading i negerindu.
20 Adi ipebelang TUHAN Dibatandu daerahndu rikutken si IpadankenNa, banci kam man daging i ja kam merincuh.
21 Adi ingan ersembah e ndauhsa, emaka katawari kam merincuh, banci kam nggeleh lembu ntah biri-biri si ibereken TUHAN man bandu, janah banci ipanndu daging e i rumah bagi si nggo kukataken man bandu.
22 Tiap kalak, bersih ntah lang, banci man daging e bali ras pemanna daging belkih ntah balua.
23 Saja ngenca, la banci ipanndu daging si lit denga darehna, sabap kegeluhen lit i bas dareh e. Emaka la banci ipanndu kegeluhen e radu ras dagingna.
24 Ula pan dareh, tapi amburkenlah ku taneh desken lau.
25 Adi ikutkenndu perentah enda, meriah kal ukur TUHAN, janah kerina jadi mehuli man bandu ras man sinursurndu.
26 Babalah persembahen ras pemere si ipadankenndu ku TUHAN, ku bas ingan ersembah si sada e.
27 Persembahkenlah i je persembahen-persembahen si arus itutung i das batar-batar TUHAN. Bage pe, persembahkenlah i je persembahen-persembahen, si man panganndu dagingna, tapi darehna arus iamburken ku babo batar-batar ingan persembahen e.
28 Ikutkenlah alu tutus asa kai si kuperentahken man bandu, maka kerina si mehuli jadi man bandu ras man sinursurndu seh rasa lalap, erkiteken kam ngelakoken si benar dingen si ngena ate TUHAN Dibatandu."
29 "TUHAN Dibatandu ngkernepken bangsa-bangsa negeri e, sanga kam erperang rassa, gelah banci iciati ras iinganindu tanehna.
30 Kenca ikernepken TUHAN bangsa-bangsa e, jaga maka ula iikutkenndu bicara agama kalak e, sabap adi bage kena siding kematen kam. Ula kal icubakenndu mpelajari uga cara kalak e ersembah man dibatana, alu tujun guna ngusih-ngusih ia.
31 Ula sembah TUHAN Dibatandu seri ras penembahna dibata-dibatana, sabap sanga isembahna dibata-dibatana, ilakokenna perkara-perkara si melket si erbahanca nembeh ate TUHAN. Terlebih-lebih pe igelehna anak-anakna jadi persembahen i bas api i babo batar-batarna.
32 Lakokenlah kerina si nggo kuperentahken man bandu, ula kurangi sitik pe, ula tambahi kai-kai pe.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA