Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 (6-2) Darius nabagei kakaraenganna a’jari 120 propinsi, massing-massing niparenta ri sitau guburnur.
2 (6-3) Daniel siagang rua tau maraengannaya niangkaki untu’ angngawasi anjo sikamma guburnurka sollanna tena nanirugikangi karaenga.
3 (6-4) Kabateammi linta’ angkanaya jama-jamanna Daniel la’bi bajikangngangi najama-jamanna sikamma guburnurka siagang pangawasa’ maraengannaya. Lanri kammana anjo, ero’mi karaenga angngangkaki a’jari pamarenta mae ri sikontu kakaraenganga.
4 (6-5) Mingka sikamma guburnurka siagang anjo pangawasaka napa’boyammi kasalang Daniel lalang ri pamarentahanga; mingka takkulleai ke’nanga, lanri majarre’na siagang lambusu’na Daniel, kammayatompa tena kasalang nagaukang siagang tena nabawang-bawangngangi jama-jamanna.
5 (6-6) Nampa nakanamo ke’nanga, "Iapa nakkulle nigappa kasalanna Daniel punna passala’ agamana."
6 (6-7) Appada-padami ke’nanga a’lampa mange andallekang ri karaenga na nakana ke’nanga, "O Karaengku Darius, la’bui umurutta satunggu-tungguna!
7 (6-8) Ikambe ngaseng anne angngurusukai kakaraenganta, baji’ sikamma pangawasa’, sikamma guburnur, wakkele’-wakkele’ guburnur kammayatompa pagawe-pagawe maraengannaya, assituju kabusu’ maki’ untu’ angngussuluki mae ri katte karaeng, sollanta appasulu’ sura’ parenta, mustia nituruki tojeng-tojeng. Kiparentakang laloi sollanna lalang tallumpulo allo tena manna sitau nipa’biang appala’ doang mae ri kalase’renna rewataya yareka rupataua, pantaranganna mae ri kalenta bawang. Inai-nai andakkai anjo parentaya lanipasambilai antama’ ri leang singaya.
8 (6-9) Napalaki ikambe sollanna kitekengi anjo sura’ parentaya, sollanna a’jari undang-undang mae ri Media siagang Persia, tenaya nakkulle nibeso’ ammotere’."
9 (6-10) Jari natekemmi Karaeng Darius anjo sura’ parentaya.
10 (6-11) Nalangngere’na Daniel anjo passalaka, ammotere’mi ri balla’na. Kamara’na niaka ri tingka’ iratea nia’ jandela-jandelana a’dalle’ mangea ri Yerusalem. Na sangkamma biasana, akkulantuki appala’ doang mae ri Allata’alana siagang mammuji ri Ia, tappintallu siallo ri dallekanna anjo jandela-jandela tassungkea.
11 (6-12) Ri wattunna nicini’ Daniel ri musu-musunna appala’ doang ri Allata’alana,
12 (6-13) a’lampa ngasemmi ke’nanga mange andallekang ri karaenga untu’ antuntuki Daniel. Nakana ke’nanga, "Sai le’ba’ maki’ karaeng annekeng sura’ parenta, ampisangkai sikontu taua lalang anne tallumpulo alloa untu’ appala’ doang mae ri kalase’renna rewataya yareka rupataua pantaranganna mae ri katte bawang? Kammayatompa angkanaya inai-nai andakkai anjo parentaya lanipasambilai antama’ ri leang singaya?" Appialimi karaenga angkana, "Memang, siagang anjo parentaya a’jari undang-undangi mae ri Media siagang Persia, tenaya nakkulle nibeso’ ammotere’!"
13 (6-14) Nampa nakanamo ke’nanga ri karaenga, "Daniel, kalase’renna tunipelaka battu ri Yehuda, tena najampangiki’ karaeng, siagang nabawang-bawangngangi parentata. Ta’atoroki appala’ doang tappintallu siallo."
14 (6-15) Nalangngere’na karaenga anjo kammaya, a’jari si’nami siagang ranggaselami pa’mai’na, sa’genna a’boyami akkala’ untu’ ampasalamaki Daniel. Sa’genna pole karuenga tuli appikkiri’ iji karaenga.
15 (6-16) Nampa ammotere’mi pole anjo taua ngaseng andallekang ri karaenga, siagang angkana, "O karaengku, parallui kiu’rangi angkanaya situru’ undang-undang Media siagang Persia, parenta napasuluka karaenga takkulleai nipinra-pinra."
16 (6-17) Jari kale’bakkanna naparentakammi karaenga sollanna nijakkala’ Daniel nampa nipasambila antama’ ri leang singaya. Nakana karaenga ri Daniel, "Dasi-dasi naanjo Allata’alanu nusombaya siagang pa’mai’ tamamminra ampasalamakko."
17 (6-18) Le’baki anjo nisareimi se’re batu lompo bawana anjo leanga; nasitempele’mi karaenga anjo batua siagang sitempele’ karaeng kammayatompa sitempele’na sikamma tumalompoa, sa’genna tena manna sitau akkulle allappassangi Daniel battu ri anjo singa-singaya.
18 (6-19) Nampa ammotere’mo karaenga ri balla’ karaenga. Taerokai angnganre yareka nisaleori. Siagang sila’busu’ bangngi takkullea attinro.
19 (6-20) Ri wattu subua ambangummi nai’ karaenga nampa karo-karo a’lampa mange ri leang singaya.
20 (6-21) Battuna mange anjoreng, akkio’ lussa’mi angkana, "O Daniel, atanNa Allata’ala mattallasaka! Apaka anjo Allata’alanu nusombaya siagang pa’mai’ tamamminra akkulle mako napasalama’ battu ri anjo singa-singaya?"
21 (6-22) Nampa kalangngerammo sa’ranna Daniel appiali angkana, "La’bui umuru’na karaengku satunggu-tungguna!
22 (6-23) Allata’alana atanta Nasuroi battu malaeka’Na untu’ antongkoki bawana anjo singa-singaya sa’genna tena naapa-apai atanta. Allata’ala ampasalamaki atanta nasaba’ Naassengi angkanaya tena kasalang nagaukang atanta mae ri Ia siagang mae ri katte karaeng."
23 (6-24) Teai sipato’ sannanna nyawana karaenga siagang naparentakammi sollanna nipasulu’ Daniel battu ri anjo leanga. Le’baki anjo parentaya nigaukang, a’nassami angkanaya tena manna sike’de’ loko’ nigappa ri kalenna Daniel, lanri tappa’na mae ri Allata’ala.
24 (6-25) Nampa naparentakang karaenga sollanna nijakkala’ kabusu’ anjo sikamma tau antuduai Daniel. Nampa ke’nanga siagang ana’-ana’na, bainenna, kabusu’na nipasambila ngasengi antama’ ri leanna singaya. Tenapa nabattu ke’nanga naung ri dapara’ anjo leanga, na nibakkaimo nikokko’ ke’nanga ri singa-singaya siagang nilica’ sa’genna buku-bukunna ke’nanga.
25 (6-26) Le’baki anjo akkirimmi sura’ Karaeng Darius mange ri tau battua ri sikontu bansaya, suku bansaya siagang bahasaya ri sikontu linoa, angkana, "Salama’ battu ri nakke!
26 (6-27) Kuparentakangi mae ri sikontu tau niaka ri daera kakaraengangku sollanna malla’ siagang napakalompo Allata’ala nasombaya Daniel! Iami Allata’ala mattallasaka satunggu-tungguna, sa’genna kala’busang jammang ammarenta. Tena olona lapanra’ kakaraenganNa. Tena la’busu’na kakoasanNa.
27 (6-28) Ia mappasalama’ siagang appakabebasa’, anggaukangi gau’ malompoa siagang appakalannasaka ri langika kammayatompa ri buttaya. Le’baki Napasalama’ Daniel, battu ri bawa angngokko’na singa-singaya."
28 (6-29) Kammami anjo Daniel tulusu’ tinggina empoanna lalang pamarentahanna Darius siagang pamarentahanna Koresy, anjo tu Persia.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA