Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ri se’reang allo Karaeng Belsyazar angngundangi sisa’bu tumalompo untu’ anghaderi passua’-suarrang lompona, siagang angnginung-nginung anggoro’.
2 Lalang angnginung-nginunna ke’nanga, naparentakammi Belsyazar untu’ angngallei mangko’-mangko’ bulaenga siagang peraka, iamintu le’baka narampasa’ Nebukadnezar, manggena, battu ri Balla’Na Batara ri Yerusalem. Pattujunna Karaeng Belsyazar iamintu sollanna sikamma tumalompoa, sikamma bainenna, baine piarana, kammayatompa pole kalenna, angnginungi battu ri anjo mangko’-mangkoka.
3 Nierammi linta’ anjo mangko’-mangkoka mae ri ia, nampa angnginung kabusu’mo ke’nanga anggoro’ battu ri anjo sikamma mangkoka.
4 Lalang angnginunna ke’nanga, mammuji-mujimi ke’nanga ri rewata-rewata nipareka battu ri bulaeng, pera’, tambaga, kayu siagang batu.
5 Ti’ring nia’mo kacinikang lima tau annulisi’ apa-apa ri rinring balla’ karaenga, ri tampa’ kaminang singaraka nataba singara’ lampu, sa’genna karaenga akkullei nacini’ baji’.
6 A’jari pi’lasa’mi rupanna siagang lanri malla’na nannekkere’mo kulantu’na.
7 Ammarrammi ansuro kioki sikamma pacinika, sanro cara’deka siagang tau cara’deka accini’ bintoeng. Ri wattunna battu ke’nanga, nakanamo karaenga, "Inai-nai akkulle ambacai anjo tulisanga siagang ampauanga’ battuanna, lakusarei pakeang kakaraengang iamintu juba cura’ lame butung siagang rante bulaeng pannanrai kalompoang mae ri ia. Pantaranganna anjo lakuangka’ tongi a’jari tukoasa makatallu lalang ri kakaraengangku."
8 Massing maju ngasemmi sikamma tau cara’deka, mingka manna sitau ri ke’nanga tania’ akkulle ambacai anjo tulisanga siagang ampaui battuanna mae ri karaenga.
9 A’jari pila’ lussa’mi siagang pila’ pi’lasa’mi Karaeng Belsyazar; kammayatompa sikamma tumalompona sanna’ ngasemmi linguna.
10 Nalangngere’na karaenga siagang sikamma tumalompona ammarrang-marrang, antama’mi amma’na karaenga ri kamara’ passua’-suarranga. Nampa nakana, "La’bui umuru’na karaengku satunggu-tungguna! Pakasannangi pa’mai’na karaengku siagang teaki’ pi’lasaki.
11 Nasaba’ lalang ri kakaraenganna karaengku nia’ sitau bura’ne nikoasai ri roh rewata-rewata matangkasaka. Ri wattu pamarentahanna manggena karaengku, anjo taua a’buttimi angkanaya nia’ kacara’dekanna, pammahanna siagang pangngassenganna, sangkamma pangngassenganna sikamma rewataya. Manggena karaengku, iamintu Karaeng Nebukadnezar, le’baki naangka’ anjo taua a’jari pamimping mae ri pacinika siagang tau cara’deka accini’ bintoeng.
12 Teai sipato’ cara’de’na siagang porena kammayatompa panritana anjo taua ampakasingaraki so’naya, siagang ansungkei rahasiaya kammayatompa anreppeki sikamma apa sukkaraka. Arenna anjo taua iamintu Daniel, mingka niarengi Beltsazar ri karaenga. Suro kio’mi anjo taua. Iami lampauangi karaengku angkana apa battuanna anjo tulisanga."
13 Nierammi linta’ Daniel mange andallekang ri karaenga. Nampa akkuta’nammo karaenga ri ia angkana, "Ikauka Daniel, tu Yahudi nipelaka, iamintu le’baka niengka’ ri manggeku battu ri butta Yehuda?
14 Kulangngereki angkanaya nikoasaiko ri roh-roh matangkasa’na rewata-rewataya, siagang angkanaya nia’ kacara’dekannu, pammahannu, siagang pangngassengang lomponu.
15 Sikamma tau cara’deka siagang pacinika le’ba’mi nacoba ambacai anne tulisanga siagang ampauanga’ battuanna. Mingka takkulleai ke’nanga.
16 Silalonna kulangngere’ angkanaya ikau akkulleko assungkei sikontu rahasiaya siagang anreppeki apa-apa sukkaraka. Punna akkulleko ambacai anne tulisanga siagang ampauanga’ battuanna, lakusareko pakeang kakaraengang iamintu juba cura’ lame butung siagang rante bulaeng pannanrai kalompoang. Pantaranganna anjo lakuangkakko a’jari tukoasa makatallu lalang ri kakaraengangku."
17 Appialimi Daniel angkana, "Tena naparallu karaengku assarea’ hadia, mingka kipassareang mami mae ri tau maraenga. Lakubacai anjo tulisanga untu’ karaengku siagang lakupauangki’ angkana apa battuanna.
18 Allata’ala Kaminang Tinggia, iamintu le’baka ampa’jari Nebukadnezar, manggena karaengku, a’jari karaeng mala’biri’ siagang assarei kalompoang na masahoro’.
19 Antekamma malompona, sa’genna sikamma tau battua ri sikontu bansaya, suku bansaya siagang bahasaya, annekkereki siagang mallaki ri ia. Punna eroki ammuno tau, nabuno mami anjo taua. Punna eroki napasalama’ se’rea tau, napasalamaki anjo taua. Napakatinggi siagang napakatunai taua situru’ ero’na.
20 Mingka ri wattunna a’jari tampo, kapala batu siagang palla’, nigulummi battu ri kakaraenganna sa’genna tappela’mo kala’biranna.
21 Nibongkai battu ri pa’rappunganna rupataua siagang akkala’na a’jari sangkammai akkala’ olo’-olo’. Attallasaki siagang keledai romanga, angnganrei ruku’ sangkamma sapi siagang attinroi ri parang tassungkea sa’genna nibasai ri allung. Kala’busanna namangakuimi angkanaya Allata’ala Kaminang Tinggia makoasa mae ri kakaraenganna rupataua siagang anjo kakaraenganga Napassareangi mae ri inai-nai Napilea.
22 Mingka ana’na, iamintu kalenna karaengku, taerokai ampakatunai kalenna, manna pole nakiasseng ngasenja anjo sikammaya.
23 Kipakatinggi kalenta mae ri Batara niaka ri suruga siagang baraniki’ ansuro erangi antama’ mangko’-mangko’ le’baka nirampasa’ battu ri Balla’Na Batara. Nampa ikatte siagang sikamma tumalompota, sikamma bainenta siagang baine piarata angnginungi battu ri anjo mangko’-mangkoka. Ammuji-mujiki’ mae ri rewata-rewata nipareka battu ri bulaeng, pera’, tambaga, bassi, kayu siagang batu, iamintu rewata-rewata tenaya nakkulle accini’ yareka allangngere’ yareka ammahang apa-apa. Tena kipakalompoi Allata’ala ampattantuai tallasatta siagang mateta siagang ampattantuai oloang katallassanta.
24 Iaminjo saba’na naNapabattu Allata’ala anjo limaya untu’ antulisiki pasanNa mae ri katte.
25 Iaminne bacana anjo tulisanga, ‘Nibilang, nibilang, nitimbang, nibage.’
26 Nampa kammami anne battuanna: Nibilang, iamintu wattu pamarentahanna karaengku le’ba’mi Nibilang ri Allata’ala nampa Napa’le’ba’;
27 nitimbang, iamintu le’ba’ maki’ nitimbang nampa niassemmo angkanaya tena matu-matunta;
28 nibage, iamintu angkanaya nibagei kakaraenganta nampa nipassareang mae ri tu Media siagang Persia."
29 Naparentakammi linta’ Belsyazar pagawena sollanna napipakei Daniel juba cura’ lame butung siagang nipatabai rante bulaeng kallonna. Nampa naangka’ a’jari tukoasa makatallu lalang ri kakaraenganna.
30 Anjo memang bangngia nibuno memammi anjo Belsyazar karaeng Babel.
31 (6-1) Le’baki nibuno Belsyazar, Darius tu Media angngallei empoang kakaraenganga. Anjo wattua umuru’na annampulo anrua taung.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA