Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Humbani Raja Nebukadnesar hubani sagala bangsa, halak parsahap na marbagei-bagei in i sab dunia on. “Lambin tambah ma damei bani nasiam ganupan!
2 Tanda pakon halongangan na binahen ni Naibata Na Timbul in hu bangku, ipindo uhurhu do sihol patugahonku bani nasiam.
3 Banggal ni ai tanda binahen-Ni ai, jombut ni ai halongangan na pinamasa-Ni ai! Harajaon sisadokah ni dokahni do harajaon-Ni, anjaha marsundut-sundut do panrajaion-Ni.
4 Ahu, Nebukadnesar, marsonang-sonang do ibagas rumahku, anjaha mardohar ibagas rumah bolonku.
5 Jadi dong ma nipingku, na mambahen tarsonggot ahu; sanggah na tibal ahu i podomanku, gobir do ahu ibahen pingkiran ampa panonggoran na roh hu bangku.
6 Dob ai huparentahkon ma ase iboan hu lobeihu sagala halak na pentar na adong i nagori Babel, ase ipatugah sidea hu bangku arti ni nipi ai.
7 Jadi roh ma halak na pentar-pentar, sipartondung, halak Kasdim ampa sibotoh parhalaan, hupajojor ma bani sidea nipingku, tapi seng tarpatugah sidea bangku arti ni ai.
8 Parpudi roh ma si Daniel hu bangku ai ma na margoran si Beltsasar mangihutkon goran ni naibatangku, anjaha ibagas dirini do tonduy ni naibata-naibata na pansing in, gabe hupajojor ma nipi ai bani, ningku ma,
9 ʻAle Beltsasar, kopala ni halak na pentar-pentar, hubotoh do, marianan do ibagas ho tonduy ni naibata-naibata na pansing in, anjaha seng ongga jut uhurmu pasal rusia; on do panonggoran na huidah ai ibagas nipingku, sai patugah ma artini ai.
10 Ia panonggoran na huidah sanggah tibal ahu bani podomanku, ai ma: Mangkawah ma ahu, anjaha tonggor ma, sada hayu jongjong i parsitongahan ni tanoh on, anjaha gijang tumang do ai.
11 Lambin banggal ma hayu ai anjaha lambin toguh, ujungni das hu langit, anjaha taridah do ai hun tampakan ni ganup tanoh on.
12 Jenges do bulungni, anjaha buahni ramos, boi mambere sipanganon bani haganup. Dapotan parlinggoman do sagala binatang na i talun i toruhni, anjaha marasar manuk-manuk na i awang-awang bani dangkahni, anjaha sagala na manggoluh mangan hunjai.
13 Huidah do sanggah na marpanonggoran ai ahu i podomanku, sada siparjaga, sada halak na mapansing susur hun nagori atas.
14 Marsora na maling do ia mangkatahon, Roboh ma hayu in anjaha tagili dangkahni, rurus ma bulungni anjaha erap ma sagala buahni! Bahen ma maporus sagala binatang hun toruhni ampa manuk-manuk ai hun dangkah-dangkahni.
15 Tapi anggo tutuho ni uratni ai paturut ma ibagas tanoh, irantei bani bosi pakon tombaga, i tongah-tongah ni poyon-poyon na i sampalan. Paturut ma ai marudan marmilas ni ari, mangan poyon-poyon songon binatang na i sampalan.
16 Buaton do humbani uhur jolma, anjaha bereon bani uhur binatang, paima salpu bani pitu panorang.
17 Ia uhum on humbani riah ni siparjaga ai do, anjaha haputusan on marhitei hata ni na pansing ai, ase ibotoh sagala na manggoluh, paboa Na Tang Sitimbulan ai do sirajai sagala harajaon ni jolma manisia. Ibere do ai bani ise harosuh ni uhur-Ni, anjaha ipabangkit do hujai halak sisombuhan humbani jolma.”
18 Ai ma nipi na huidah, ahu, Raja Nebukadnesar. Ai pe ale Beltsasar, patugah ma arti ni ai bangku, halani haganup halak na pentar, na adong ibagas harajaonku, seng tarpatorang sidea ai hu bangku, tapi anggo ho boi do, ai Tonduy ni naibata-naibata na pansing ai do marianan bam.ʼ”
19 Jadi hundokah do tarsonggot si Daniel, na margoran si Beltsasar ai, pingkiranni do mambahen mabiar ia. Nini raja ai ma, “Ale Beltsasar, ulang ma pala mabiar ho pasal nipi ai pakon artini.” Nini si Beltsasar ma mambalosi, “Ham tuannami, sai mangonai bani munsuhmu ma nipi ai, sonai homa artini ai bani imbangmu!
20 Ia hayu nididahmu ai, na lambin banggal anjaha na lambin toguh ai, na sundol hu langit anjaha taridah ronsi hun ujung ni tanoh on,
21 na jenges mardangkahi, ramos buahni, sibere sipanganon bani haganup, parlinggoman ni binatang na i talun, anjaha dangkahni parsaranan ni manuk-manuk na i awang-awang,
22 ham do hayu ai, ale rajanami. Lambin banggalni do ham anjaha lambin margogoh; lambin ganda do kuasamu, sundol hu langit, anjaha gomgomanmu das ronsi tampakan ni tanoh on.
23 Ia na nididah ni raja in, ai ma siparjaga, halak na mapansing ai, na susur hun nagori atas, na mangkatahon, ʻRoboh ma hayu in anjaha parseda ma ai, tapi anggo tutuhoni paturut ma ibagas tanoh, irantei bani bosi pakon tombaga itongah-tongah ni poyon-poyon ni sampalan in; anjaha paturut ma ai marudan marmilas ni ari, marulah songon binatang na i talun, paima salpu bani pitu panorang.ʼ
24 On do arti ni ai ale rajanami: Haputusan ni Na Tang Sitimbulan ai do na mangonai bani tuannami, raja in.
25 Usiron ma ham hun tongah-tongah ni jolma, anjaha rap marianan ma ham pakon binatang na i talun; mangan poyon ma ham songon lombu, anjaha marudan marmilas ni ari. Pitu panorang do silopusanmu, paima ibotoh ham, paboa Na Tang Sitimbulan ai do sigomgom harajaon ni jolma manisia, anjaha ibere do ai hu bani halak harosuh ni uhur-Ni.
26 Anjaha pasal na hinatahon ni ai, paturuton do tutuho ni urat ni hayu ai, arti ni ai: Maningon totap do use harajaon ai bamu, dob iparhatongon uhurmu, paboa nagori atas do sipanrajai.
27 Halani ai, ale rajanami, sai ra ma ham manjalo sipaingatku; paholang ham ma dirimu humbani dousamu marhitei na mangkorjahon hapintoron, sonai homa humbani hajahatonmu marhitei na maridop ni uhur bani halak na masombuh, andohar boi lambin dokahni mardohar ham.”
28 Haganupan ai mangonai do bani Raja Nebukadnesar.
29 Dob salpu sapuluh dua bulan, mardalan-dalan do raja ai bani tayub ni rumah bolon na i huta Babel,
30 anjaha nini raja ai ma, “Ai lang on do huta Babel na banggal in, na dob hupadear bahen pamatang ni harajaonku marhitei kuasangku na banggal in, bahen hamuliaon ni hasangaponku?”
31 Sanggah na sinahapkon ni raja ai ope hata ai, roh ma sada sora hun nagori atas, “On do tugah-tugah bam, ale Raja Nebukadnesar: Mosor ma harajaon in hun bamu.
32 Iusir ma ho hun tongah-tongah ni jolma, rap saianan ma ho pakon binatang na i talun; mangan poyon-poyon ma ho songon lombu; pitu panorang do lopusanmu, paima iparhatongon uhurmu, paboa Na Tang Sitimbulan ai do sipanggomgom bani harajaon ni jolma manisia, anjaha iberehon do ai bani halak harosuh ni uhur-Ni.”
33 Mintor bani panorang ai do saud hata ai bani si Nebukadnesar. Iusir halak ma ia hun tongah-tongah ni jolma, anjaha mangan poyon-poyon ma ia songon lombu; marudan marmilas ni ari ma ia, ronsi na marganjang jambulanni songon ambulu ni manuk-manuk nanggordaha, anjaha sisilonni gabe songon sisilon ni manuk-manuk ganjangni.
34 Bani ujung ni panorang ai mangkawah ma ahu, Nebukadnesar, dompak babou, gabe mulak ma ahu maruhur. Hupasangap ma Na Tang Sitimbulan ai, hupuji anjaha hupatunggung ma Ia na manggoluh sadokah ni dokahni; ai ronsi sadokah ni dokahni do panggomgomion-Ni anjaha harajaon-Ni marsundut-sundut.
35 Haganup pangisi ni tanoh on doskon na lang do hiraon; domu hubani rosuh-Ni do ibahen bani bala na i nagori atas ampa bani pangisi ni tanoh on; sahalak pe seng dong na mangasup manulak tangan-Ni atap na mangkatahon Bani, “Aha dong na binahen-Mu in?”
36 Bani panorang ai mulak maruhur ma ahu, anjaha mulak ma homa hu bangku hasangapon ni harajaonku, hatunggungonku ampa hamuliaonku. Ipindahi juakjuakku ampa na sangap-sangap ma ahu, ipabangkit ma use ahu i harajaonku, anjaha itambahi ope habanggalonku.
37 Halani ai, ahu Nebukadnesar, mamuji anjaha pasangapkon anjaha patimbulhon Raja na i nagori atas ai; ai sintong do sagala pambahenan-Ni anjaha pintor sagala dalan-Ni, anjaha margogoh do Ia patoruhkon sigijang maruhur.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA