Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nasuroi Batara anjo Musa siagang Harun
2 ambilangi tu Lewi battua ri golongang bijanna Kehat situru’ massing kaluargana ke’nanga,
3 nampa nacata’ arenna sikontu tu bura’ne umuru’ tallumpulo taunga sa’genna limampulo taung, ia akkullea anggaukangi jama-jamanga ri KemaNa Batara.
4 Ia jama-jamanna ke’nanga iamintu angngurusuki sikamma barang-barang Kaminang Matangkasaka.
5 Napassareangi Batara mae ri Musa paratorang kammaya anne: Punna narapi’mo wattunna nubongkara’ pakkemaanga, Harun siagang ana’-ana’na musti antamaki ri KemaNa Batara, ampanaungi gordenga ri dallekanna Patti Parjanjianga, nampa narangka’ anjo Pattia siagang anjo kaenga.
6 Le’baki anjo, musti narangkaki pole ke’nanga anjo Pattia siagang silawara’ kaeng kukkulu’ alusu’, nampa nalapara’ silawara’ kaeng gau’ irateanganna, siagang napataba kayu pa’bule’na anjo Pattia.
7 Musti appalaparaki ke’nanga silawara’ kaeng gau’ irateanganna mejang tampa’ roti nipatalaya untu’ Batara, siagang irate ri anjo mejanga musti appadongkoki panne, kappara’ tampa’ dupa, kappara’ tampa’ passare, siagang bongki untu’ passare je’ne’ anggoro’. Musti tuli nia’ roti nipatala irate ri anjo mejanga.
8 Yangasenna anjo musti natongkoki ke’nanga siagang silawara’ kaeng eja, nampa narangka’ siagang silawara’ kaeng kukkulu’ alusu’ irateanganna, siagang napataba kayu pa’bule’na anjo mejanga.
9 Musti angngallei ke’nanga silawara’ kaeng gau’ nampa natongko’ bangkeng lampua siagang sikamma lampunna, pakkakasa’ pannangkassinna sumbuna lampua siagang pa’dongkokanna, kammayatompa sikontu tampa’ minynya’ zaitunga.
10 Bangkeng lampua siagang sikontu pakkakasa’na musti narokoki ke’nanga siagang silawara’ kukkulu’ alusu’ nampa naboli’ irate ri tampa’ pa’bulekanga.
11 Le’baki anjo musti akka’rangi ke’nanga silawara’ kaeng gau’ irate ri anjo tampa’ pakkoro’bangngang bulaenga nipare’, siagang narangkaki silawara’ kaeng kukkulu’ alusu’, nampa napataba anjo kayu pa’bule’ tampa’ pakkoro’bangnganga.
12 Sikontu anjo pakkakasa’ niaka nipake lalang ri Kamara’ Matangkasaka musti naallei ke’nanga nampa naroko’ siagang silawara’ kaeng gau’. Nampa musti natongko’ ke’nanga siagang silawara’ kukkulu’ alusu’, siagang napadongko’ irate ri pa’buleka.
13 Musti natangkasi ke’nanga anjo tampa’ pakkoro’bangnganga battu ri limbu’buka, nampa akka’rang silawara’ kaeng lame butung irateanna.
14 Nampa musti napadongko’ ke’nanga irate ri anjo mejanga sikontu pakkakasa’ nipakea punna nigaukang ibadaya ri anjo tampa’ pakkoro’bangnganga: tampa’ pepe’, garpu, sude’, siagang katoang. Nampa musti narangka’ ke’nanga yangasenna anjo siagang silawara’ kukkulu’ alusu’ siagang napataba kayu pa’bule’na.
15 Nakana Batara mae ri Musa siagang Harun, "Ri wattunna nubongkara’ pakkemaanga, Harun siagang ana’na musti antamaki ri KemaKu na narangka’ ngaseng sikontu barang-baranga siagang pakkakasa’ niaka anjoreng. Nampami punna le’baki anjo, akkullemi tu Kehat battu untu’ ambuleki. Mingka takkulleai ke’nanga anciniki, anreppesi yareka anseroi anjo barang-baranga, lanri le’ba’namo nisa’la’ anjo barang-baranga untu’ iNakke. Punna nagaukangi ke’nanga anjo kammaya, mattantu matei ke’nanga. Jari, sollanna natena nacappu’ anjo tu Kehat battu ri suku Lewi, Harun siagang ana’-ana’na musti ansarei tugasa’ ke’nanga angkanaya apa massing naerang anjo ke’nanga. Iaminjo tugasa’na tu Kehat ri wattunna nipalette’ KemaKu. Eleazar, ana’na Harun tanggong jawa’ mae ri sikontu KemaKu, minynya’ lampua, dupaya, koro’bang gandung tuli nipatalaya, minynya’ upacara siagang sikontu apa niaka ilalang ri anjo KemaKu."
16 (4:15)
17 (4:15)
18 (4:15)
19 (4:15)
20 (4:15)
21 Nasuroi Batara anjo Musa
22 ambilangi tu Lewi battua ri golongang bijanna Gerson situru’ massing kaluargana ke’nanga.
23 Musti nacataki Musa arenna sikontu tu bura’ne umuru’ tallumpulo taunga sa’genna limampulo taung, ia akkullea anggaukangi jama-jamanga ri KemaNa Batara.
24 Nisarei tugasa’ ke’nanga untu’ allalingi anne barang-barang kammaya:
25 Kaeng tendana anjo Kemaya siagang pa’rangka’na bageang lalanga kammayatompa bageang pantara’na kukkulu’ alusuka, kaeng ri pakke’bu’ Kemaya,
26 sikamma layaraka siagang sikamma otereka untu’ paranglakkenga ri tammulilina Kemaya siagang tampa’ pakkoro’bangnganga, kaeng niaka ri pakke’bu’ lompona paranglakkenga, kammayatompa sikontu pakkakasa’ nipakea untu’ ampatabai sikamma anjo barang-baranga. Iami ke’nanga tanggong jawa’ mae ri sikamma jama-jamanga mae ri anjo barang-baranga.
27 Musa siagang Harun musti najagai sollanna nigaukang anjo jama-jamang napassareanga Harun siagang ana’-ana’na mae ri tu Gerson, kammayatompa sikamma barang-barang eroka nierang, sollanna nierangi.
28 Iaminjo tugasa’na tu Gerson lalang ri Kemaya; anjo sikammaya tugasaka musti nigaukangi na nipimpingi ri Itamar, ana’na Imang Harun.
29 Nasuroi Batara anjo Musa ambilangi tu Lewi battua ri golongang bijanna Merari situru’ massing kaluargana ke’nanga.
30 Musa musti nacataki arenna sikontu tu bura’ne umuru’ tallumpulo taunga sa’genna limampulo taung, ia akkullea anggaukangi jama-jamanga ri KemaNa Batara.
31 Nisarei ke’nanga tugasa’ untu’ angngangkaki barang-baranga ri anjo Kemaya, balo’-balo’na, benteng-bentenna, siagang pa’lapa’na.
32 Kammayatompa benteng-benteng niaka ri paranglakkeng ri tammulilina Kemaya siagang pa’lapa’na, patto’-patto’na siagang sikamma otere’na kammayatompa sikontu pakkakasa’ niparalluanga untu’ ampaentengi. Tunggala’ taua nisarei tugasa’ angngerang barang-barang attantu.
33 Iaminjo tugasa’na golongang bijanna Merari; Itamar ana’na Imang Harun musti ampimpingi ke’nanga anggaukangi sikontu jama-jamanna ke’nanga ri KemaNa Batara.
34 Situru’ parentaNa Batara, Musa, Harun siagang sikamma pamimpinna ummaka, nabilammi tallua golongang bija niaka lalang ri suku Lewi, iamintu Kehat, Gerson siagang Merari. Nagaukammi anjo pammilangnganga tasse’re-se’re kaluarga. Nacataki ke’nanga sikontu tu bura’ne umuru’ tallumpulo taunga sa’genna limampulo taung, ia akkullea anggaukangi jama-jamanga ri KemaNa Batara. Iaminne wassele’na: Golongang Bija ~~ Jaina Tau; Kehat ~~2.750; Gerson ~~2.630; Merari ~~3.200; ~~ Yangasenna: ~~8.580;
35 (4:34)
36 (4:34)
37 (4:34)
38 (4:34)
39 (4:34)
40 (4:34)
41 (4:34)
42 (4:34)
43 (4:34)
44 (4:34)
45 (4:34)
46 (4:34)
47 (4:34)
48 (4:34)
49 Lanri parentaNa Batara tete ri Musa, tunggala’ taua nidattaraki siagang nisarei tanggong jawa’ untu’ massing apa lanalayani yareka apa musti nagaukang ke’nanga.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA