Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 TUHAN nuruh Musa
2 ngajari bangsa Israel nehken persembahenna man Dibata i bas paksa-paksa si nggo itentuken, eme kap persembahen pangan si ngena ate Dibata.
3 Enda me persembahen-persembahen pangan si arus ipersembahken man TUHAN: guna persembahen tutungen si tep-tep wari, dua anak biri-biri bajarna umur sada tahun, si la erpandangen.
4 Sada ipersembahken pagi-pagi, janah sada nari karaben.
5 Radu ras tep-tep anak biri-biri e ikut ipersembahken persembahen buah gandum, eme sada kilo tepung icampur ras sada liter minak saitun si mejilena.
6 Enda me persembahen tep-tep wari si arus keri itutung. Persembahen enda mulai ibahan i Deleng Sinai jadi sada persembahen pangan si merim bauna iakap TUHAN.
7 Guna persembahen anggur ras anak biri-biri si pemena, curcurkenlah i bas batar-batar sada liter anggur.
8 Karaben persembahken ka anak biri-biri si peduaken; carana seri ras persembahen si erpagi-pagi, radu ras persembahen anggur. Enda pe sada persembahen pangan, si merim bauna iakap TUHAN.
9 I bas wari Sabat persembahken dua anak biri-biri bajarna umur sada tahun si la erpandangen, dua kilo tepung icampur ras minak saitun jadi persembahen buah gandum, bage pe persembahen anggur.
10 Persembahen tutungen enda arus ipersembahken tep-tep wari Sabat jadi tambahen persembahen si tep-tep wari ras persembahen anggurna.
11 Bahan persembahen tutungen man TUHAN i bas wari si pemena tep-tep bulan: dua jenggi lembu si nguda denga, sada bajar biri-biri, pitu anak biri-biri bajarna umur sada tahun, kerina si la lit man pandangen.
12 Guna persembahen buah gandum, persembahen tepung si icampur ras minak saitun: ras tep-tep jenggi lembu, telu kilo tepung; ras bajar biri-biri dua kilo tepung;
13 janah ras tep-tep anak biri-biri sada kilo tepung. Persembahen tutungen enda, eme persembahen pangan, si merim bauna iakap TUHAN.
14 Persembahen anggur si payo eme kap dua liter ras tep-tep jenggi lembu, sada setengah liter ras bajar biri-biri, janah sada liter ras tep-tep anak biri-biri. Enda me peraturenna guna persembahen tutungen i bas wari si pemena tep-tep bulan i bas gedang-gedang tahun.
15 Tambah-tambah persembahen tutungen si tep-tep wari bage pe ras persembahen anggurna, persembahken ka pe sada bajar kambing jadi persembahen pengalemi dosa.
16 Perayan Paskah pehaga TUHAN arus ibahan i bas wari pesepuluempatken bulan si pemena.
17 I bas wari si pesepululimaken ibenaken sada perayan agama, dekahna pitu wari. Kidekah perayan e, roti si la itama ragi ngenca banci ipan.
18 I bas wari si pemena e kam arus pulung erbahan kebaktin, janah la banci erdahin.
19 Bahan sada persembahen tutungen jadi persembahen pangan man TUHAN: dua jenggi lembu si nguda denga, sada bajar biri-biri, ras pitu anak biri-biri umur sada tahun, kerina si la lit man pandangen.
20 Bahan persembahen buah gandum si payo i bas tepung nari, si icampur ras minak saitun: telu kilo ras tep-tep jenggi lembu, dua kilo ras bajar biri-biri,
21 janah sada kilo ras tep-tep anak biri-biri.
22 Tole persembahken pe sada bajar kambing jadi persembahen pengalemi dosa, janah alu bagenda bahan acara pembersihen dosa man bangsa e.
23 Persembahen enda ibahan jadi tambahen persembahen tutungen biasa si erpagi-pagi.
24 Alu cara si seri, persembahken man TUHAN persembahen pangan pitu wari dekahna, si merim IakapNa bauna. Bahanlah persembahen enda jadi tambahen persembahen tutungen si tep-tep wari dingen persembahen anggur.
25 I bas wari si pepituken arus kam pulung erbahan kebaktin, janah ula kam erdahin.
26 I bas wari si pemena asum Kerja Rani e, asum iendeskenndu persembahen gandum si mbaru iperani man TUHAN, arus kam pulung erbahan kebaktin, janah la banci erdahin.
27 Bahan sada persembahen tutungen jadi sada bau si merim iakap TUHAN: dua jenggi lembu si nguda denga, sada bajar biri-biri, ras pitu anak biri-biri bajarna umur sada tahun, kerina si la lit man pandangen.
28 Bahan persembahen buah gandum si payo i bas tepung nari icampur ras minak saitun: telu kilo ras tep-tep jenggi lembu, dua kilo ras bajar biri-biri.
29 Janah sada kilo ras tep-tep anak biri-biri.
30 Tole persembahken pe sada bajar kambing jadi persembahen pengalemi dosa, janah alu bagenda bahan acara pembersihen dosa man bangsa e.
31 Bahanlah persembahen enda ras persembahen anggur jadi tambahen persembahen tutungen ras persembahen buah gandum si tep-tep wari.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA