Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Jadi dob ididah si Bileam, rosuh do uhur ni Jahowa mamasu-masu Israel, seng laho be ia, songon bani panorang na i lobei ni on, mangindahi partanda, tapi idompakkon ma bohini hu halimisan.
2 Dob ai mangkawah ma si Bileam, gabe ididah ma Israel marlampolampo mar sasamarga. Jadi sogop ma Tonduy ni Naibata hu bani,
3 anjaha ipungkah ma parsahapanni, nini ma, “On ma pangungkabon humbani si Bileam, anak ni si Beor, pangungkabon ni dalahi na dob tonggor matani,
4 pangungkabon ni jolma na dob somal mambogei hata ni Naibata, na dob mangidah panonggoran humbani Pargogoh Na So Tarimbang, jolma na madabuh tangkob, tapi gabe marbuha matani.
5 Jengesni in lampolampomu in, alo Jakob, sagala iananmu, alo Israel!
6 Songon habungan na daoh mangampar, songon pohon i topi ni bah banggal, songon haloe na sinuan ni Naibata, songon hayu ares i topi ni bah.
7 Sai tong do mambaor bah hun tahu-tahuni, na tinidahkonni marsulei-sulei bani bah; timbulan do rajani humbani si Agag, anjaha marmulia tumang harajaonni.
8 Naibata do na mambobahonsi luar hun Masir, anjaha songon tanduk ni badak do in bani. Bois do panganonni bangsa sipajuh-begu-begu, imbangni ai, anjaha ropukonni holiholi ni sidea, anjaha tolpusonni sidea marhitei panahni.
9 Marrogop anjaha manggompang do ia songon singa tunggal anjaha songon singa boru-boru; ise na pag mamuhoisi? Dapotan pasu-pasu ma barang ise na mamasu-masu ho, anjaha hona papa ma barang ise na mamapai ho.”
10 Jadi nahit ma ringis ni si Balak dompak si Bileam, pala ipatopap-topap tanganni; nini si Balak ma hubani si Bileam, “Laho mamurai munsuhku do ham namin ase hudilo, hape tonggor ma, sai inunut ham do mamasu-masu sidea, domma pala tolu hali.
11 On pe podas ma ham maporus mulak bani iananmu hinan. Domma huhatahon, ʻSai marmulia tumang do bahenonku ham, tapi domma iolat Jahowa hamuliaon hun bamu.ʼ”
12 Jadi nini si Bileam ma hubani si Balak, “Ai lang domma huhatahon hinan age hubani suruhanmu, na sinuruhmu hu bangku:
13 Age pe gok rumahni pirak pakon omas ibere si Balak hu bangku, seng tarlanggar ahu hata ni Jahowa, laho mambahen na madear atap na masambor humbani uhur-uhurhu sandiri; barang aha na hinatahon ni Jahowa, maningon ai do hatahononku.
14 On pe, tonggor ma, na laho ma ahu mulak hubani bangsangku; halani ai, patugahonku ma bamu pasal aha na sihol bahenon ni bangsa on hubani bangsamu bani panorang na sihol roh.”
15 Dob ai ipungkah ma mangkatahon parsahapanni, nini ma, “On ma pangungkabon ni si Bileam, anak ni si Beor, pangungkabon ni na dob tonggor matani,
16 pangungkabon ni jolma na dob somal mambogei hata ni Naibata, anjaha na mambotoh pingkiran ni Sitimbulan, na mangidah panonggoran humbani Pargogoh Na So Tarimbang, jolma na dob dabuh tangkob, tapi gabe marbuha matani.
17 Sai idahonku do Ia, tapi lang ope anggo nuan; sai tataponku do Ia, tapi lang ope anggo dohor. Poltak do sada bintang humbani si Jakob anjaha timbul do sada tungkot harajaon humbani Israel; rosakkonon-Ni do pardompakan ni Moab, anjaha ropukon-Ni do ganup ginompar ni si Set.
18 Solukon-Ni ma Edom, anjaha Seir pe, munsuh-Ni ai, solukon-Ni do, anjaha lambin markuasa ma anggo Israel.
19 Marhitei humbani si Jakob do dalankononkon panrajaion, anjaha siapkononkon na maporus humbani huta-huta.”
20 Jadi dob ikawahkon halak Amalek, ipungkah ma parsahapanni, nini ma, “Parlobei i tongah-tongah ni bangsa sipajuh begu-begu do namin Amalek, tapi dobni magou do ia.”
21 Jadi dob ikawahkon halak Keni, ipungkah ma parsahapanni, nini ma, “Toguh do namin iananmu anjaha ipajonam asarmu i atasni dolog batu,
22 tapi maningon siapkonon do Keni. Sadiha dokah nari ase boanon ni Assur ho hu habuangan?”
23 Dob ai ipungkah ma parsahapanni, nini ma, “Aih, ise ma na tarbahen manggoluh, anggo ipamasa Naibata na sonai?”
24 Tapi na roh ma kapal hun pasir ni Kittim, anjaha patundukon-Ni ma Assur pakon Heber; tapi ai pe maningon magou do.
25 Dob ai bingkat ma si Bileam, mulak hubani iananni hinan; si Balak pe idalani ma dalanni.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA