Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Gedang-gedang berngi tangis bangsa e perban lesekna atena.
2 Ijunguti kalak e si Musa ras Harun nina, "Ulin min mbarenda mate i Mesir ntah i bas taneh mesawang enda!
3 Ngkai maka ibaba TUHAN kami ku negeri e? Nandangi mate me kami i bas peperangen, jenari ndehara kami ras anak-anak kami itaban. Ma ulin kami mulih ku Mesir?"
4 Emaka nina sapih-sapih ia, "Marilah sipilih sekalak peminpin jenari mulih kita ku Mesir!"
5 Kenca bage erjimpuh Musa ras Harun i lebe-lebe bangsa e kerina, ayona seh ku taneh.
6 Janah Josua anak Nun ras Kalep anak Jepune, dua kalak i bas mata-mata e, ncaingken uisna perban cedana atena.
7 Jenari nina man bangsa e, "Negeri si iselidiki kami tuhu-tuhu sada negeri si seh kal ulina.
8 Adi ngena ate TUHAN man banta, la banci la IbabaNa kita ku je, jenari IberekenNa man banta negeri si mehuli ras si mehumur e.
9 Ula lawan TUHAN janah ula mbiar man kalak si ringan i bas negeri e. La banci la sukah siakap naluken ia. TUHAN kap ras kita janah nggo ItalukenNa dibata-dibata si ngkawali ia kerina; emaka ula mbiar."
10 Kerina perpulungen e ngancam Josua ras Kalep. Ibenterina atena alu batu. Tapi rempet idah bangsa e sinalsal terang kerehen TUHAN mbincar i babo Kemah Perjumpan e.
11 Nina TUHAN man Musa, "Asa kai nari dekahna bangsa enda nulak Aku? Asa kai nari dekahna la ia nggit tek man bangKu, aminna gia nggo Kubahan melala tanda kuasa i tengah-tengahna?
12 Erkiteken si e la banci Kutamaken sada penakit gelah kernep ia, tapi Kubahan kam jadi bapa sada bangsa si belinen janah gegehen asa ia!"
13 Tapi nina Musa man TUHAN, "IbabaNdu bangsa enda ndarat i Mesir nari alu GegehNdu. Adi ibegi kalak Mesir pagi kai si nggo IbahanNdu man BangsaNdu,
14 tentu iturikenna e man bangsa si ringan i bas taneh enda. Bangsa-bangsa si i jenda nggo megi maka Kam, o TUHAN, ras kami kap; nggo pe ibegina maka Kam tangkas teridah tupung EmbunNdu ngadi i babo kami, janah Kam erdalan arah lebe kami suari i bas tiang embun janah berngi i bas tiang api.
15 Genduari adi IbunuhNdu kin kerina BangsaNdu, bangsa-bangsa si nggo megi berita kerna KiniulinNdu e tentu ngataken,
16 maka IbunuhNdu BangsaNdu i bas taneh si mesawang, eme erkite-kiteken la ngasup Kam maba ia bengket ku bas taneh si nggo IpadankenNdu man bana.
17 Emaka TUHAN, ertoto aku man BaNdu, cidahkenlah man kami GegehNdu janah bahanlah bagi si nggo IpadankenNdu tupung NiNdu,
18 'Aku, TUHAN, la sukah merawa, mbelin kekelengenKu, setia, ras dem pengalemi dosa ras kesalahen. Tapi la banci la Kuukum anak ras kempu-kempu seh ku bas kesusuren si peteluken ras si peempatken erkite-kiteken salah orang tuana.'
19 Emaka genduari, TUHAN, sue ras KekelengenNdu si mbelin, si tetap, mindo kal aku, gelah IalemiNdu min dosa bangsa enda, bagi nggo IalemiNdu ia mulai kin tupung itadingkenna negeri Mesir."
20 Nina TUHAN erjabap, "Kualemi ia, sue ras pemindonndu.
21 Tapi erpadan Aku maka la banci lang, bagi Aku nggeluh janah kemulianKu la banci la ndemi doni enda,
22 sada pe la lit kalak enda bengket ku bas negeri e. Nggo idahna sinalsalKu ras tanda-tanda kuasa si Kubahan i Mesir ras i bas taneh mesawang, tapi la erngadi-ngadi iujina kesabarenKu janah la ia nggit patuh man bangKu.
23 Emaka la banci ia ngidah negeri si nggo Kupadanken man nini-ninina. La lit sada pe si nggo nulak Aku banci ngidah negeri e.
24 Tapi erkite-kiteken suruh-suruhenKu Kalep la seri ukurna ras kalak si deban janah ia tetap setia man bangKu, Kubaba ia bengket ku bas negeri si nggo iselidikina e, janah kesusurenna la banci la dat taneh e,
25 i ja genduari kalak Amalek ras kalak Kanaan sangana ringan i bas berneh-bernehna. Mulihlah pagi jenari laweslah ku taneh si mesawang kempak arah Teluk Akaba."
26 Nina TUHAN man Musa ras Harun,
27 "Asa kai nari dekahna bangsa si jahat enda jungut-jungut man bangKu? Nggo leja aku megi sorana jungut-jungut!
28 Genduari pesehlah kata enda man bana, 'Ersumpah Aku maka la banci lang, bagi Aku nggeluh, Kusehken man bandu bagi si ikatakenndu. Aku kap si ngerana, eme TUHAN.
29 La banci la kam mate janah mait-maitndu merap i belang-belang taneh mesawang. Sabap nggo kam jungut-jungut man bangKu, la lit sada pe kam si umurna lebih dua puluh tahun banci bengket ku bas negeri e.
30 Tuhu nggo erpadan Aku maka Kubere kam ringan i je, tapi genduari sada pe lanai Kubere, seakatan Kalep ras Josua.
31 Ikatakenndu maka anak-anakndu la banci la itaban musuh, tapi Kubaba ia bengket ku bas negeri si itulakndu e, janah eme pagi jadi inganna erkuta.
32 Kam la banci la mate i bas taneh si mesawang enda.
33 Anak-anakndu mampa-mampa i bas taneh si mesawang empat puluh tahun dekahna, ngenanami kiniseran erkite-kiteken kam la setia man bangKu, seh kerina kam nggo mate pagi.
34 Empat puluh wari dekahna iselidikindu taneh e; tep-tep wari ikira sada tahun, jadi empat puluh tahun; emaka kam pe la banci la ngenanami kiniseran empat puluh tahun dekahna perban dosandu e. Itehndu me kai ertina adi Aku jadi imbangndu!
35 Ersumpah Aku maka enda la banci la Kusehken man bandu, kam kalak jahat si ersada ukur guna ngelawan Aku. I jenda, i bas taneh mesawang enda, sekalak-sekalak kam la banci la mate. Aku kap si ngerana, eme TUHAN.'"
36 Kalak si nggo isuruh Musa nelidiki taneh e ngataken si la tuhu si erbahanca bangsa e jungut-jungut man TUHAN. Janah erkite-kiteken si e ikenai TUHAN ia alu sada penakit, emaka mate ia.
37 (Bil 14:36)
38 I bas mata-mata si sepulu dua kalak e, Josua ras Kalep ngenca tading.
39 Tupung ituriken Musa man bangsa Israel kai si nggo ikataken TUHAN, ceda kal atena kerina.
40 Pepagina lampas berkat ia nerang daerah uruk-uruk e, sabap nina, "Genduari nggo sikap kami lawes ku bas ingan si nggo ituriken TUHAN man kami. Iakui kami maka kami nggo erdosa."
41 Tapi nina Musa, "Dage ngkai maka isimbakndu TUHAN genduari? Labo banci kam menang!
42 La padah kam lawes. TUHAN la ras kam, emaka ugapa pe italuken musuhndu nge kam.
43 Adi ijumpaindu kalak Amalek ras kalak Kanaan, tentu mate kam i bas peperangen e; ugapa pe TUHAN labo ras kam, sabap la kam nggit ngikutken Ia."
44 Bage gia pang denga kang ia lawes nangkeng ku daerah uruk-uruk e, aminna gia Peti Perpadanen TUHAN ras Musa tetap tading i bas ingan erkemah.
45 Kenca bage reh me kalak Amalek ras kalak Kanaan si ngiani daerah e, iserangna ras italukenna kalak ndai, janah iayak-ayakna pe seh ku Horma.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA