Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nakana Batara mae ri Musa,
2 "Apparekko rua tarompe’ battu ri pera’ nide’de’ untu’ angkioki ra’yaka asse’re yareka untu’ assuroi ke’nanga a’lampa.
3 Punna nitui’ la’bu anjo ruaya tarompe’, battuanna musti asse’re ngasengi sikontu ummaka ri tammulilinu ri dallekanna pakke’bu’ KemaKu.
4 Mingka punna se’reja bawang nitui’, battuanna sikamma pamimpinga bawang musti asse’re ri tammulilinu.
5 Punna nitui’ bodo-bodoi tarompeka, anjo battuanna suku-suku akkemaya ri bageang iraya musti a’lampai.
6 Punna makapinruanna nitui’ bodo-bodo, suku-suku niaka ri bageang timboro’ musti a’lampa. Jari anjo sa’ra bodo-bodoa battuanna musti a’lampai ummaka,
7 nampa anjo sa’ra la’bua battuanna musti asse’rei ummaka.
8 Anjo tarompeka musti nituiki ri sikamma imanga, ana’-ana’na Harun. Iaminjo paratorang mustia nuturuki sa’genna satunggu-tungguna.
9 Na punna a’bundukko ri pa’rasangannu untu’ ampartahangkangi kalennu mae ri musu battua ambundukiko, tuiki anjo tarompe’-tarompeka. Na iNakke, Karaeng Allata’alanu, labattu antulungko siagang ampasalamakko battu ri musu-musunnu.
10 Kammayatompa ri allo-allo karannuannu, iamintu ri allo passua’-suarrang Bulang Beru siagang passua’-suarrannu maraengannaya, anjo tarompeka musti nituiki ri wattunnu assare koro’bang nitunu siagang koro’bang passiamakkang mae ri Nakke. Jari iNakke lantulung ngasengko. INakkemi Karaeng Allata’alanu."
11 Lalang ri taung makarua ri le’ba’namo nabokoi bansa Israel butta Mesir, ri tanggala’ ruampulo bulang rua, nai’mi rammanga battu ri KemaNa Batara.
12 Nampa a’le’basa’mo tu Israel a’lampa ambokoi parang lompona Sinai, nampa ammantang anjo rammanga ri wattunna battu ke’nanga ri parang lompona Paran.
13 Iaminjo uru a’lampana ke’nanga lanri parentaNa Batara tete ri Musa.
14 Ia riolo dudua a’lampa iamintu pasukang a’la’langa rawa bandera pasukanna Yehuda, pasukang se’rea mae ri pasukang maraenga: Nahason, ana’na Aminadab ampimpingi barisanna suku Yehuda,
15 Netaneel ana’na Zuar ampimpingi barisang sukuna Isakhar,
16 siagang Eliab ana’na Helon ampimpingi barisang sukuna Zebulon.
17 Nampa nibongkara’ KemaNa Batara, siagang a’lampami golonganna Gerson siagang Merari ampisangi anjo Kemaya.
18 Nampa a’lampamo pasukang a’la’langa rawa bandera kasatuanna Ruben, pasukang se’rea mae ri pasukang maraenga: Elizur ana’na Syedeur ampimpingi barisanna suku Ruben,
19 Selumiel ana’na Zurisyadai ampimpingi barisanna suku Simeon,
20 siagang Elyasaf ana’na Rehuel ampimpingi barisanna suku Gad.
21 Le’baki anjo a’lampami suku Kehat ampisangi barang-barang matangkasaka. Punna battu ke’nanga mange ri tampa’ pakkemaang berua, le’ba’mi nipaenteng poleang KemaNa Batara.
22 Nampa amminawang pasukang a’la’langa rawa bandera kasatuanna suku Efraim, tasse’re pasukang mae ri pasukang maraengannaya: Elisama ana’na Amihud ampimpingi barisanna suku Efraim,
23 Gamaliel ana’na Pedazur ampimpingi barisanna suku Manasye,
24 siagang Abidan ana’na Gideoni ampimpingi barisanna suku Benyamin.
25 Kala’busanna a’lampa tommi pasukang a’la’langa rawa bandera kasatuanna suku Dan. Iami ke’nanga pangawala’ bageang ribokona sikontu kasatuanga. A’jappami ke’nanga tasse’re-se’re pasukang: Ahiezer ana’na Amisyadai ampimpingi barisanna suku Dan.
26 Pagiel ana’na Okhran ampimpingi barisanna suku Asyer,
27 siagang Ahira ana’na Enan ampimpingi barisanna suku Naftali.
28 Iaminjo susunanna barisanna tu Israel, tasse’re pasukang mae ri pasukang maraengannaya, punna a’lampa ke’nanga untu’ a’lette’.
29 Nakanamo Musa mae ri ipara’na, iamintu Hobab ana’na Rehuel tu Midian, "La’lampai ikambe mange ri tampa’ nakanaya laNapassareangi Batara mae ri kambe. Le’ba’mi Napa’janjiang Batara apa bajika mae ri tu Israel. Jari amminawang mako, tena tanigau’ baji’nu ri kambe."
30 Appialimi Hobab angkana, "Tarima kasi, mingka kaerokka’ ammotere’ mange ri kampongku."
31 Nakanamo Musa, "Teako bokoi ikambe, nasaba’ ikau akkulle angngului ikambe ri oloang lanijappaia; nasaba’ ikau angngassengi angkana kemaeki’ akkulle akkema ri parang lompoa.
32 Punna amminawangko, sikontu apa bajika, iamintu Nagaukanga Batara mae ri kambe, lanagaukang tongi ikambe mae ri kau."
33 Le’ba’namo nabokoi bansa Israel Moncong Sinai, iamintu moncong pammantangnganNa Batara, a’jappami ke’nanga tallungallo. Patti ParjanjianNa Batara tuli nierangi ri dallekanna ke’nanga untu’ a’boya tampa’ pakkemaanna ke’nanga.
34 Punna a’lampa ke’nanga battu ri pakkemaanga, tuli nia’na rammanNa Batara irateanna ke’nanga punna allo.
35 Sampang niangka’ anjo Patti Parjanjianga, angkanami Musa, "Ammenteng maKi’ o Batara, Kipasimbung-simbungi musunTa sa’genna lari tau angkabirisiaKi’."
36 Siagang punna battu anjo Patti Parjanjianga mange ri tampa’ pammantangnganga, angkanami Musa, "Ammotere’ maKi’ o Batara, mange ri assa’bua Kaluarga Israel."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA