Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Manossa reya akantha se epaksa akeket, odhi’na berra’ akantha koli ren-aren;
2 akantha dunor se ngarep pangaoban; akantha koli se anante’ bajaran.
3 Dhari bulan ka bulan tang odhi’ ta’ andhi’ tojjuwan; sabban malem tang ate possa’ ban kasossa’an.
4 Mon sengko’ tedhunga, malem ekarassa ce’ lanjangnga; pekkeran posang anante’ bila pajjar se moncara.
5 Tang badan possa’ cacengnga ban bannya’ gerrangnga; tang kole’ loka kalowar nana.
6 Tang odhi’ se tadha’ pangarebbanna reya ceppet jalanna nojju ka aherra, aceppeddan dhari tokang tennon se majalan sakocina.
7 Kaemodi, Guste, odhi’ abdidalem namong anyaba; kasennengngan abdidalem ampon lobar, tadha’ lampadda.
8 Samangken Junandalem ngoladi abdidalem, namong ta’ kera abit pole. Manabi Junandalem nyare’e, tanto abdidalem ampon tadha’ e bume.
9 Akadi ondhem se sajan tepes pas terros mosna, sapaneka jugan manossa mate ta’ abali pole ka dunnya. Sadajana oreng se kennal ka aba’epon padha loppa tadha’ se emot.
10 (7:9)
11 Daddi abdidalem ta’ kengeng neng-enneng malolo! Ta’ kengeng nyempen kasossa’an ka’dhinto. Abdidalem kodu acareta notorragi essena ate se loka.
12 Aponapa abdidalem ka’dhinto sareng Junandalem me’ ejaga terros? Ponapa abdidalem ka’dhinto naga tase’ se ambabajane?
13 Abdidalem dhung-tedhungan maelanga lesso; macellebba ate se sossa nyare panglepor.
14 Namong Junandalem ko’-nako’e abdidalem sareng mempe; Junandalem madhateng mempe juba’ sareng ngen-angen e dhalem ate.
15 Kantos abdidalem arassa aperagan manabi ecekkel saos kantos napa’ ka ajal etembang nyandhang sangsara e dhalem badan.
16 Abdidalem lesso sareng busen odhi’ e bume, diggal abdidalem me’ olle mate! Sabab odhi’ abdidalem ta’ agandhu’ arte.
17 Sanyatana manossa ka’dhinto ponapa me’ sareng Junandalem eanggep ce’ ajina? Me’ terros eoladi sadaja tengka polana?
18 Sabban are sareng Junandalem etalektegi, saneyap sa’at terros eoji
19 Bila Junandalem se atoleya, ta’ ajaga abdidalem saterrossa, sopaja abdidalem kengenga ngalodhu’ copa?
20 Adhu, Guste, se ajaga abdidalem, ponapa rogina ka Junandalem, manabi abdidalem agabay dusa? Me’ kantos abdidalem ebadhi sasaranna panana? Ponapa abdidalem talebat maberra’ ka Junandalem?
21 Aponapa Junandalem me’ ta’ kasokan nyapora sadajana dusa se etanggung abdidalem paneka? Ponapa Junandalem ta’ kasokan malebbar sadajana kasala’an abdina? Sabab sakejja’ aggi’ abdidalem bakal tedhunga e dhalem koburan, manabi sareng Junandalem esare’e tanto ta’ epanggi."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA