Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Si e, erbahanca pusuhku debet-debet, tempa-tempa jantungku nggo naktak.

² O kam kerina! Dengkehkenlah sora Dibata, begikenlah sora lenggur si luar arah BabahNa.

³ IbahanNa kilap ernala arah langit, i bas tepi doni ku tepina si deban;

⁴ kenca bage erlenggur SoraNa si medolat, dingen kilap ersabung siayak-ayaken.

⁵ Arah perentah Dibata, jadi me tanda KuasaNa si mehaga, kejadin-kejadin si mbelin si la terukuri kita.

⁶ Arah PerentahNa, salju ndabuh ku taneh, janah udan meder naktak BekasNa ersuruh.

⁷ Ipengadi Dibata pendahin manusia, gelah banci itandai manusia pendahin Dibata.

⁸ Rubia-rubia kerangen cebuni kerina, medem ia i bas liangna.

⁹ Angin kalisungsung rembus i Selatan nari, angin si mbergeh i Utara nari.

¹⁰ Kesah Dibata mahanca lawit si mbelang jadi beku, si nalihkenca jadi es batu.

¹¹ IdemiNa embun salu lau, janah kilap erndilap i jenari.

¹² Embun kabang bekas pengaturken Dibata, nehken PerentahNa i babo doni enda.

¹³ IsuruhNa embun pesusur udan ku doni enda, guna ngukum tah encidahken KekelengenNa man kerina manusia.

¹⁴ Sinik kam lebe, Jop, jenari dengkehken; ukurilah bekas pendahin Dibata si mbelin.

¹⁵ Itehndu kin uga Dibata merentahkenca, seh maka i bas embun nari, reh kilap ernala?

¹⁶ Iangkandu kin uga maka embun banci bombang? Eme bekas kebeluhen Dibata si la teralang.

¹⁷ La iangkandu; saja ngenca panasen kam ban mokupna, tupung angin Selatan rembus ngkenai taneh enda.

¹⁸ Ngasup kam ngkimbangken langit bali ras bekas Dibata erbahan. Janah erbahanca piher bagi curmin besi tuangen?

¹⁹ Ajari kami uga ningen man Dibata; lanai lit si terbelasken kami, perban ukur kami seh gelapna.

²⁰ Pang kin aku mindo, gelah ngerana ras Dibata? Ma kudarami dalanku bene adi jumpa ras Ia?

²¹ Genduari terang-langit seh kal silona, mesilosa man tatapen mata, perban i bas langit lanai lit embun, nggo mejelis iembusken angin.

²² Sinalsal si bagi emas, teridah i Utara, rejin tuhu dolat Dibata.

²³ Kuasa Dibata seh kal belinna, emaka Ia la terdeheri kita. Bujur ras adil me PerbahanenNa, manusia la pernah IdehkenNa.

²⁴ Em sabapna manusia mbiar man Dibata; kalak si pentar akapna bana, la sitik pe DiateNa."