Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Dage genduari Jop, begikenlah rananku, dengkehkenlah kerina katang-katangku.

² Aku nggo sikap ngerana bandu, melasken kai si lit i bas ukurku.

³ Alu pusuh melikas aku ngerana, janah si kubelasken tuhu kerina.

⁴ Kesah Dibata kap si nepa aku. Ia nge si mereken kepentaren bangku.

⁵ Adi ngasup kam, aloi dage aku; pekena dage jabapndu.

⁶ I adep-adepen Dibata duana kita bali; aku ras kam itepa i bas taneh dah nari.

⁷ Dage labo kam mbiar ngenehen aku, kata-katangku labo kari mberatca iakapndu.

⁸ Ndai nggo kubegi rananndu tuhu, janah kudengkehken si ibelaskenndu.

⁹ Nindu ndai, 'Aku melikas, la lit salah perbahanenku. Aku bujur, la lit sitik pe dosangku.

¹⁰ Tapi idaram-darami Dibata alasen ngelawan aku, janah bagi MusuhNa IbahanNa aku.

¹¹ IrantekenNa nahengku, IperdiatekenNa perdalanenku.'

¹² O Jop, salah kal kam i bas si e, sabap Dibata belinen asa ise pe.

¹³ Ngkai maka isalahkenndu Dibata, adi la gia IjabapNa pengadun sekalak jelma?

¹⁴ Si tuhuna labo erngadi-ngadi Dibata ngerana, aminna gia la iperdiateken manusia.

¹⁵ Tupung manusia tunduh berngi, Dibata ngerana arah pengenehenen ras nipi.

¹⁶ IpedengkehkenNa katana man manusia, janah IsingetiNa manusia e alu pertenget si IberekenNa.

¹⁷ Sura-SuraNa gelah manusia jera, janah ulanai meganjang ukurna.

¹⁸ La IpelepasNa manusia bene; IselamatkenNa, gelah ula ia mate.

¹⁹ Iajarken Dibata manusia arah penakitna, alu namaken si mesui ku bas dagingna.

²⁰ Manusia la pet man erkiteken penakitna, janah pangan si ntabehna pe ciga atena.

²¹ Dagingna kesip seh kertangna, janah nggo terbeligai kerina tulanna.

²² Nandangi berkat me ia ku pendawanen, doni kematen, man bana nggo ndeher.

²³ Banci jadi sekalak i bas malekat Dibata si meribu-ribu buena, si dahinna ngingetken manusia kerna dahinna, reh nampati manusia.

²⁴ Perban mekuah ate malekat man manusia, ikatakenna man Dibata nina, 'Pulahilah ia i bas pendawanen nari; enda tebusna, maka ia pulah ka mulihi.'

²⁵ Kenca bage, jadi pesing ka mulihi dagingna, janah megegeh bagi sekalak anak perana.

²⁶ Adi ertoto ia, ialoi Dibata pertotonna; alu dem keriahen isembahna Dibata; janah ipekena Dibata ka mulihi sikerajangenna.

²⁷ I lebe-lebe jelma si nterem ikatakenna, 'Aku nggo erdosa. Si bujur la kulakoken, tapi aku la iukum Dibata.'

²⁸ La sahun aku berkat ku doni kematen perban aku IpulahiNa, emaka genduari aku mejuah-juah denga.

²⁹ Perbahanen si bage nandangi manusia, piga-piga kali ilakoken Dibata,

³⁰ gelah arah e manusia banci IselamatkenNa, maka kegeluhen si dem keriahen ialoken manusia.

³¹ O Jop, begiken katangku enda, sinik kam, maka kuterusken ngerana.

³² Tapi adi lit si man belasenkenndu katakenlah; janah adi benar kam, tentu kuakui alu ukur meriah.

³³ Tapi adi la lit, sinik kam janah begiken, maka kuajarken bandu kepentaren.