Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ratu Syeba megi maka Raja Salomo terberita tuhu-tuhu. Erkiteken si e reh ia ku Jerusalem ngujisa alu penungkunen-penungkunen si mesera. Radu ras ratu e ikut pe nterem suruh-suruhenna, bage pe melala unta erbaban rempah-rempah, batu permata ras melala emas. Kenca ia nggo jumpa ras Salomo, isungkunina Salomo kerina penungkunen si turah i bas ukurna.
2 Ijabap Salomo kerina penungkunen e; la lit si metahat iakap Salomo nerangkenca.
3 Ibegi ratu Syeba kepentaren Salomo, dingen idahna bangunen istanana.
4 Idahna pangan si ielaken i das meja Salomo, idahna perumahen pegawai-pegawaina, kiniraturen pegawai istana dingen paken seragam si nipakena, uis pelayan si ngidangi ia i bas kerja man-man, bage pe persembahen-persembahen si ipersembahkenna i bas Rumah Pertoton. Kerina si e erbahanca ratu Syeba jengang dingen labuh ukurna.
5 Nina ratu man raja, "Si kubegi i negeringku kerna kam ras kerna kepentarenndu payo tuhu!
6 La aku tek kai si ituriken kalak man bangku adi langa kudahi ku jenda janah kuidah jine. Kepeken langa setengah pe kerna kepentarenndu si kubegi. Kepentarenndu ngelebihi asang si ituriken kalak man bangku.
7 Sangap kal kalak si jadi suruh-suruhenndu, si katawari pe lit i adep-adepenndu, dingen ndat kesempaten megiken kepentaren si ibelaskenndu!
8 Pujilah TUHAN Dibatandu! Nggo IcidahkenNa ngena AteNa man bandu alu ngangkat kam jadi raja, merentah i bas GelarNa. Erkiteken keleng AteNa BangsaNa Israel, dingen IkeliniNa AteNa bangsa e rasa lalap, IangkatNa kam jadi raja, maka ikapitindu undang-undang ras keadilen."
9 Ipersembahken ratu Syeba pemere si nggo ibabana man Raja Salomo, eme: lebih 4.000 kilo emas, dingen rempah-rempah ras batu permata si lanai lang-lang buena. La lit pernah rempah-rempah si bali ulina ras si nggo ibereken ratu Syeba man Raja Salomo.
10 (Anak buah Raja Hiram ras anak buah Raja Salomo si maba emas i Opir nari e, tole pe maba kayu cendana ras batu permata.
11 Kayu e ipake Salomo guna erbahan tangga Rumah Pertoton dingen tangga istanana, bage pe guna erbahan kulcapi ras gambus man pemain musik. Ope si e la pernah iidah si bagenda i negeri Juda.)
12 Ibereken Raja Salomo man ratu Syeba kai saja si ipindona. Tambah si e kerina pemere si ibaba ratu Syeba man bana, ibereken Raja Salomo ka gantina. Kenca bage mulih ratu e ras rombongenna ku negeri Syeba.
13 Tiap tahun Raja Salomo ngaloken menam dua pulu telu ribu kilo emas.
14 Tambah si e lit ka pajak si galari pedagang-pedagang ras saudagar-saudagar. Raja Arab ras gubernur-gubernur Israel pe maba pirak ras emas man bana.
15 Ibahan Salomo dua ratus ampang-ampang mbelin, janah tiap ampang-ampang ilapisina alu pitu kilo emas si itepa,
16 ras telu ratus ampang-ampang si kitik, janah tiap ampang-ampang ilapisina alu telu kilo emas si itepa. Kerina e isimpanna i bas Gedung Kerangen Libanon.
17 Ibahan raja pe sada kursi kinirajan si mbelin. Sada bagin kursi kinirajan e ilapisi alu gading, janah bagin si debanna ilapisi alu emas murni.
18 Kursi kinirajan e lit enem anak tanggana, janah lit ingan dedehen nahe si ileketken kempak kursi kinirajan e. Ingan dedehen nahe e ilapisi alu emas. Arah kawes ras kemuhen kursi kinirajan e lit ingan tan. Janah i bas tiap tepina tedis sada patung singa.
19 Lit sepulu dua patung singa i bas enemna anak tangga kursi kinirajan e. I bas tiap anak tangga i kawes kemuhenna tedis sada patung singa. La lit pernah kursi kinirajan bagi si e i bas kerajan si deban.
20 Kerina ingan minem Raja Salomo ras kerina perkekas si lit i bas Rumah Kerangen Libanon, ibahan i bas emas murni nari. I bas jaman Salomo pirak la iakep meherga.
21 Melala kapal Raja Salomo erlayar ras suruh-suruhen Raja Hiram. Sekali tiap telu tahun kapalna i Tarsis nari e mulih maba emas, pirak, gading, mawas ras kera.
22 Raja Salomo bayaken ras pentaren asangken raja-raja si deban i bas doni enda.
23 Raja-raja si deban e reh ercakap-cakap ras Salomo, megiken kepentaren si nggo ibereken Dibata man bana.
24 Tep-tep raja maba pemere man Salomo eme: barang-barang pirak ras emas, paken, senjata, rempah-rempah, kuda ras bagal. Bage terus-terusen tiap tahun.
25 Karang gereta kuda ras karang kuda Salomo lit 4.000, janah pasuken si erkuda lit 12.000. Deba itamakenna i Jerusalem dingen si debanna itamakenna i bas kota-kota si deban.
26 Ia erkuasa i babo kerina raja-raja i daerah Lau Eprat nari seh ku negeri Pilisti dingen perbalengen Mesir.
27 I bas paksa pemerentahenna, pirak nggo bali buena i Jerusalem ras batu, kayu aras bali buena ras batang ara.
28 Kuda itukur Salomo i Mesir dingen i negeri-negeri si deban nari.
29 Sejarah si debanna kerna Raja Salomo isuratken i bas Sejarah Nabi Natan, i bas Nubuat Ahia i Silo nari, ras i bas Pengenehenen Nabi Iddo (pemerentahen Jerobeam, raja Israel pe isuratken i bas kitap enda).
30 Salomo jadi raja Israel i Jerusalem empat puluh tahun dekahna.
31 Mate ia jenari ikuburken i Kota Daud. Emaka anakna Rehabeam nggantiken ia jadi raja.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA