Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Le’baki nabangung Karaeng Salomo anjo Balla’Na Batara, naboli’ kabusu’mi lalang ri gudang-gudanna anjo Ballaka sikamma pera’, bulaeng, na barang-barang le’baka napassareang Daud manggena mae ri Batara.
2 Le’baki anjo nasuromi Karaeng Salomo sikontu pamimping sukua siagang lokoang bija-bijanna bansa Israel a’rappung ri Yerusalem untu’ ampaletteki Patti ParjanjianNa Batara battu ri Sion, Kota Daud, mange ri Balla’Na Batara.
3 Jari battu ngasemmi ke’nanga ri wattu Allo Lompo Pa’ballakang Leko’-Lekoka.
4 Ri wattunna asse’re kabusu’mo anjo pamimpinga, naangka’mi tu Lewi anjo Patti Parjanjianga,
5 nampa naerang mange ri Balla’Na Batara. KemaNa Batara siagang sikontu pakkakasa’na nipalette’ tommi ri sikamma imanga siagang tu Lewi mange ri Balla’Na Batara.
6 Karaeng Salomo siagang sikontu ra’ya’ Israel asse’rei ri dallekanna anjo Patti Parjanjianga nampa assare gimbala’ siagang sapi mae ri Batara teai sipato’ jaina.
7 Le’baki anjo nipantama’mi anjo Patti Parjanjianga ri sikamma imanga ri Balla’Na Batara nampa nipadongko’ irawanganna patung malaeka’ akka’nyika lalang ri Kamara’ Kaminang Matangkasaka.
8 Takka’rangi ka’nyi’na anjo patung-patunga antongkoki anjo Pattia siagang kayu-kayu pa’bule’na.
9 Anjo kayu pa’buleka sanna’ la’buna, sa’genna kacinikangi cappa’na ngaseng battu ri dallekanna anjo Kamara’ Kaminang Matangkasaka, mingka tena nakacinikang battu pantarang. (Sa’genna anne alloa tuli nia’na anjo kayu-kayua anjoreng.)
10 Tena sikali apa-apa lalang ri anjo Patti Parjanjianga pantaranganna ruang la’ba’ batu. Anjo batu-batua napantamaki Musa ri Moncong Sinai, ri wattunna appare’ parjanjiang Batara siagang bansa Israel ri wattunna lalang pa’jappang ke’nanga battu ri Mesir mange ri pa’rasangang Kanaan.
11 Sikontu imang niaka anjoreng, battu ri sikontu kalompoka, le’ba’ kabusu’mi napasadia kalenna untu’ anggaukangi anjo upacaraya. Sikontu pakelonga siagang pakarena musika lalang ri suku Lewi, iamintu Asaf, Heman, Yedutun siagang sikontu anggota lokoang bijanna ke’nanga, ammakei pakeang kaeng lenang. Anjo tu Lewia ammentengi ri rayanganna tampa’ pakkoro’bangnganga anna’gala’ gambusu’ siagang kacaping. Nia’ naagang ke’nanga 120 tau imang patui’ tarompe’. Kelonna pakelonga nipasiallei siagang sa’ra musi’ tarompe’, gambusu’ siagang pakkakasa’ musi’ maraengannaya. Kammaminne kana-kana pammuji nakelonganga ke’nanga untu’ Batara: "Pujimi Batara, lanri baji’Na, Mangngamaseangi satunggu-tungguna." Ri wattunna assulu’ sikamma imanga battu ri anjo Balla’Na Batara, ti’ring rassimi anjo Ballaka siagang caya kahaderanNa Batara, sa’genna takkulleamo ke’nanga ampannarrusuki upacara panynyombanga.
12 (5:11)
13 (5:11)
14 (5:11)
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA