Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Josia umur waluh tahun tupung ia jadi raja Juda. Jenari merentah ia i Jerusalem telu pulu sada tahun dekahna.
2 Ilakokenna kai si ngena ate TUHAN. Iusihna perbahanen nini-ninina Raja Daud, janah alu tutus iikutkenna kerina Undang-undang Dibata.
3 I bas tahun pewaluhken kenca Josia jadi raja, tupung ia nguda denga kal, ia mulai nembah man Dibata nini-ninina Raja Daud. Empat tahun kenca si e ia mulai ngeruntuhken ingan-ingan ersembah man berhala-berhala, gana-gana Dewi Asera bage pe kerina gana-gana si deban.
4 Arah perentahna iruntuhken anak buahna batar-batar ingan ersembah man Baal, janah batar-batar ingan nutung si merim-merim si ndeher i je pe irontaskenna. Iripukkenna jadi abu gana-gana Dewi Asera bage pe gana-gana si deban jenari icaburkenna abu e ku babo kuburen kalak si nggo mereken persembahen man gana-gana e.
5 Itutungna tulan-tulan imam-imam perbegu i babo batar-batar inganna ersembah. Alu ngelakoken kerina si e, ibahanna Juda ras Jerusalem mulihken bersih rikutken aturen agama.
6 Bage ka nge perbahanenna i bas kota-kota si nggo radas i daerah-daerah Manase, Eperaim bage pe Simeon seh ku Naptali i Utara.
7 I belang-belang daerah Kerajan Utara iruntuhkenna batar-batar ras gana-gana Asera, iripukkenna gana-gana e jadi abu, janah iperperkenna kerina batar-batar ingan mpersembahken si merim-merim. Kenca bage mulihken ia ku Jerusalem.
8 I bas pesepuluh waluh tahunken pemerentahen Josia kenca nggo ibersihkenna negeri ras Rumah Pertoton alu pengadi persembahen man berhala, isuruh Raja Josia telu kalak lako pehuli Rumah Pertoton TUHAN Dibata. Kalak si telu e, eme: Sapan anak Asalia, Maaseia, gubernur Jerusalem, ras Joah anak Joahas, sekalak pegawai tinggi.
9 Duit si nggo ipepulung kalak Lewi, eme pengawal-pengawal Rumah Pertoton, nggo ibereken kempak Imam si Mbelin. (Duit e ipepulung i bas kalak Eperaim, Manase ras kalak si deban i Kerajan Utara bage pe i bas kalak Juda, Benyamin ras Jerusalem nari.)
10 Duit e ibereken man kalak si telu si ertanggung jawab pekena Rumah Pertoton e, jenari si telu kalak e mereken duit e man
11 tukang-tukang kayu ras pemborong-pemborong guna nukur batu dingen kayu-kayu si ipergunaken guna pekena bangunen-bangunen si nggo ipelepas raja-raja Juda ceda.
12 Kalak si ndahiken dahin e tuhu-tuhu bujur. Si ngawasi dahin kalak enda eme empat kalak Lewi eme: Jahat ras Obaja i bas terpuk Merari nari, Sakaria ras Mesulam i bas terpuk Kohat nari. (Kalak Lewi enda kerina kalak si beluh main musik.)
13 Kalak Lewi si deban ertanggung jawab i bas ngangkat bahan-bahan bangunen e, dingen jadi pengawas kalak si erdahin i bas dahin si melala erbagena. Kalak Lewi si debanna jadi juru tulis ntah pe jadi pengawal.
14 Tupung duit e ipedarat i bas ingan penimpanenna nari, Hilkia ndat kitap Undang-undang TUHAN, Undang-undang si nggo ibereken Dibata man Musa.
15 Nina Hilkia man Sapan, "Nggo kudat kitap Undang-undang e i bas Rumah Pertoton enda." Ibereken Hilkia kitap e kempak Sapan,
16 jenari iendesken Sapan man raja. Nina Sapan kempak raja, "Nggo ilakoken kami kerina si iperentahkenndu.
17 Nggo ibuat kami duit isimpan i bas Rumah Pertoton, dingen nggo ibereken kami kempak si erdahin ras pengawas."
18 Kenca bage nina tole, "Enda lit sada kitap ibereken Hilkia man bangku." Jenari iogekenna isi kitap e kempak raja.
19 Megi isi kitap e, icaingken raja uisna perban ceda atena.
20 Kenca bage iperentahkenna man Hilkia, Ahikam anak Sapan, Abdon anak Mikaya, Sapan sekretaris kerajan, ras man Asaya pelayan raja nina,
21 "To sungkun TUHAN kerna aku dingen kerna bangsa si tading denga i Israel ras Juda. Oratilah kerna pengajaren-pengajaren si lit i bas kitap enda. Nembeh TUHAN kempak kita erkiteken nini-nininta la ngikutken kata TUHAN dingen la ngelakoken kai si ikataken i bas kitap enda."
22 Sue ras perentah raja, Hilkia ras kalak si deban lawes nungkun Hulda, sekalak nabi diberu si ringan i bas bagin kuta si mbaru i Jerusalem. (Perbulangenna, Salum gelarna, eme anak Tikwa kempu Harhas; ia me si ngurus paken-paken i bas Rumah Pertoton.) Ituriken kalak enda man bana kai si nggo jadi,
23 jenari isuruh Hulda ia kerina mulihken ndahi raja guna nehken
24 berita enda i bas TUHAN nari nina, "Kuukum ateKu Jerusalem ras kerina pendudukna alu sumpah si tersurat i bas kitap si nggo iogeken kempak raja e.
25 Nggo itulakna Aku dingen nggo ipersembahkenna persembahen-persembahen man dibata-dibata si deban. Emaka keke rawangKu erkiteken kerina si nggo ibahanna e. Nembeh Aku man Jerusalem janah rawangKu e la terpepalem.
26 Kerna raja e jine, enda me katangKu, Aku TUHAN Dibata Israel: Ibegikenndu kai si tersurat i bas kitap e,
27 jenari erkadiola kam janah ipeterukndu bandu i adep-adepenKu. Icaingkenndu uisndu jenari tangis kam tupung ibegindu uga ancamenKu guna ngukum Jerusalem ras rayatna. Nggo Kubegi pertotondu.
28 Emaka ukumen si ateKu Kubereken man Jerusalem langa Kusehken ngayak kam mate. Kupelepas kam mate i bas dame." Mulih persuruhen e ndahi Raja Josia maba berita enda.
29 Kenca bage ipepulung Raja Josia kerina peminpin-peminpin Juda ras Jerusalem,
30 jenari ras ia bengket ku bas Rumah Pertoton, itemani kerina imam-imam ras kalak Lewi bage pe kerina rayat subuk bayak bage pe musil. I lebe-lebe kalak enda kerina, iogeken raja kerina isi kitap perpadanen si idat i bas Rumah Pertoton e.
31 Tedis ia i bas ingan raja jenari ibahanna sada perpadanen ras TUHAN guna patuh man BaNa, tetap ngikutken undang-UndangNa ras perentah-PerentahNa alu bulat ukur dingen ilakokenna atena tuntunten-tuntuten si nggo iikutken ku bas perpadanen e, rikutken si nggo isuratken i bas kitap e.
32 Kalak Benyamin ras kerina kalak si deban si reh ku Jerusalem isuruhna erpadan ngikutken tuntuten perpadanen si nggo ibahanna ras Dibata nini-ninina.
33 Raja Josia ngeradasken kerina gana-gana si mbau si lit i bas daerah sikerajangen kalak Israel, emaka kidekah geluhna isuruhna kalak Israel nembah man TUHAN, Dibata nini-ninina.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA