Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Marumur dua puluh lima tahun do si Hiskia, sanggah na bangkit raja ia, anjaha dua puluh siah tahun do dokahni manrajai i Jerusalem. Goran ni inangni si Abia do, boru ni si Sakarya.
2 Ihorjahon do rosuh ni Jahowa, romban hubani haganup na binahen ni ompungni si Daud.
3 Mintor ihatahon do ungkabon labah ni Rumah ni Jahowa, anjaha ipabayu ma ai bani bulan sada, bani tahun parlobei dob gabe raja ia.
4 Ihatahon ma roh malim ampa halak Levi, anjaha ipatumpu ma sidea i alaman hampit hapoltakan,
5 anjaha nini ma dompak sidea, “Tangihon nasiam ma ahu, nasiam halak Levi. Uras nasiam ma diri nasiam, anjaha uras nasiam ma Rumah ni Jahowa, Naibata ni ompung nasiam, anjaha padarat nasiam ma sagala na butak hun rumah na mapansing in.
6 Ai banggal do dousa ni ompungta, anjaha ihorjahon sidea do sogam ni uhur ni Jahowa, Naibatanta; itadingkon sidea do Ia, anjaha ipadaoh sidea do bohi ni sidea humbani ianan ni Jahowa, itundali do ai.
7 Ambahni ai ikunsi sidea do labah ni surambih ai, iintopi sidea do suluh, seng be itutung sidea dahupa, anjaha seng be igalangkon sidea galangan na mapansing hubani Naibata ni Israel.
8 Halani ai, do ase roh ringis ni Jahowa hubani Juda ampa Jerusalem, gabe ibahen ma sidea hirjat-hirjaton, marhabiaran ampa gabe siapas-apason, songon na boi idahon nasiam marhitei panonggor nasiam.
9 Ai tonggor nasiam ma, rasei do ompungta ibahen podang anjaha anakta pakon borunta ampa parinangonta tarbuang do halani ai.
10 Isurahon uhurhu do sonari sihol mambahen padan bani Jahowa, Naibata ni Israel, ase andohar surut humbanta pargajag ni ringis-Ni.
11 Halani ai, nasiam anakku, ulang ma nasiam lansei, ai nasiam do na pinilih ni Jahowa jongjong i lobei-Ni, laho marugas Bani, anjaha nasiam do siparugas Bani ampa situtung dahupa Bani.”
12 Dob ai jongjong ma halak Levi: Si Mahat, anak ni si Amasi pakon si Joel, anak ni si Asarya humbani ginompar ni si Kahat; humbani ginompar ni si Merari: Si Kis, anak ni si Jehallelel; humbani ginompar ni si Gersom: Si Joah, anak ni si Sima pakon si Eden, anak ni si Joah.
13 Humbani ginompar ni si Elisapan: Si Simri pakon si Jehiel; humbani ginompar ni si Asap: Si Sakarya pakon si Matanya.
14 Humbani ginompar ni si Heman: Si Jehiel pakon si Simei; humbani ginompar ni si Jedutun: Si Semaya pakon si Usiel.
15 Ipatumpu sidea ma sanina ni sidea ai, anjaha iuras sidea ma diri ni sidea; dob ai masuk ma sidea romban hubani tonah ni raja ai, sihol manguras Rumah ni Jahowa romban hubani hata ni Jahowa.
16 Masuk ma malim ai hubagas Rumah ni Jahowa laho manguras ai, anjaha ipadarat sidea ma sagala na mabutak, na jumpah sidea ibagas Rumah ni Jahowa, hu alaman ni Rumah ni Jahowa; ibuat halak Levi ma ai, anjaha iboan sidea ma ai hu Bah Kidron.
17 Bani ari sada bulan sada do ipungkah sidea na manguras ai, anjaha paualuharihon bani bulan ai masuk ma sidea hu surambih ni Jahowa, laho manguras surambih ni Jahowa, anjaha iuras sidea ma Rumah ni Jahowa ibagas na ualuh ari ai; bani ari sapuluh onom bulan sada salosei ma horja ni sidea.
18 Dob ai masuk ma sidea marayak Raja Hiskia, nini ma, “Domma iuras hanami ganup Rumah ni Jahowa, anjapanjap panggalangan ni galangan situtungon ampa ganup parugasni, meja hatibalan ni ruti sigalangkonon ampa ganup parugasni.
19 Ambahni ai sagala parugas, na dob niambukkon ni Raja Ahas sadokah manrajai ia, sanggah na mardousa ai ia, domma ipasirsir anjaha iuras hanami, anjaha tonggor ham ma, ganupan ai domma i lobei ni anjapanjap ni Jahowa.”
20 Dob ai ipagirah Raja Hiskia ma puho, anjaha ipatumpu ma kopala-kopala ni huta ai, laho tangkog hu Rumah ni Jahowa.
21 Anjaha iboan sidea do pitu lombu jonggi, pitu biribiri tunggal, pitu anak ni biribiri pakon pitu hambing tunggal bahen galangan pardousaon bani parrumah ni raja ai, bani ianan na mapansing ai ampa bani Juda. Dob ai ihatahon raja ai ma dompak ginompar ni si Aron, ai ma malim-malim ai, ase igalangkon sidea ai iatas anjapanjap ni Jahowa.
22 Isayat sidea ma lombu ai, ibuat malim ai ma darohni, anjaha ipispiskon ma ai bani anjapanjap; biribiri tunggal ai pe isayat ma, anjaha darohni ai ipispiskon bani anjapanjap; anak ni biribiri tunggal ai pe isayat ma, anjaha darohni ai pe ipispiskon ma bani anjapanjap.
23 Dob ai iboan ma use hambing tunggal bahen galangan pardousaon hu lobei ni raja ai ampa hu lobei ni tumpuan ai, anjaha itampeihon sidea ma tanganni hu atasni.
24 Isayat malim ai ma ai, anjaha ibahen ma darohni ai gabe galangan pardousaon i atas ni anjapanjap ai, laho mambahen pardearan bani haganup Israel; ai ihatahon raja ai do manggalangkon galangan situtungon pakon galangan pardousaon ai bani ganup halak Israel.
25 Ipajongjong raja ai ma homa halak Levi ibagas Rumah ni Jahowa marhasoman arbap, sordam pakon husapi mangihutkon tonah ni si Daud, pakon si Gad, halak na marpanonggoran bani raja ai, ampa Nabi Natan; ai tonah ni Jahowa do ai marhitei pamangan ni nabi.
26 Jongjong ma tongon halak Levi pajolom-jolom parugas musik ni si Daud, anjaha malim-malim manjolom tarompit.
27 Dob ai ihatahon si Hiskia ma na manggalangkon galangan situtungon i atas ni anjapanjap. Jadi sanggah ipungkah na manggalangkon galangan situtungon ai, ipungkah homa ma mandodingkon doding puji-pujian bani Jahowa rap pakon tarompit ihasomani parugas musik ni si Daud, raja ni Israel.
28 Manrogop ma ganup tumpuan ai, anjaha pandoding mandoding, partarompitni martarompit; sai inunuti sidea ma mambahen sonai haganup, paima dob galangan situtungon ai.
29 Jadi saloseihonsi na manggalang ai, manrogop ma raja ai ampa haganup halak na rap pakonsi, lanjar martonggo ma sidea.
30 Dob ai ihatahon Raja Hiskia ampa kopala-kopala ai ma halak Levi mandodingkon puji-pujian bani Jahowa, domu hubani na hinatahon ni si Daud ampa si Asap, halak na marpanonggoran ai. Jadi marmalas ni uhur ma sidea mandodingkon puji-pujian, manrogop ma sidea anjaha martonggo.
31 Dob ai nini si Hiskia ma, “Domma iuras nasiam use diri nasiam bani Jahowa, padohor nasiam ma, boan nasiam ma galangan sisayaton ampa galangan puji-pujian hu Rumah ni Jahowa.” Jadi iboan tumpuan ai ma galangan sisayaton ampa galangan puji-pujian; anjaha sagala na tarojur uhurni mamboan galangan situtungon.
32 Ia buei ni galangan situtungon, na binoan ni tumpuan ai, ai ma pitu puluh lombu, saratus biribiri tunggal, pakon dua ratus anak ni biribiri. Ganupan ai bahen galangan situtungon bani Jahowa;
33 ambahni ai sibere-bere na mapansing, onom ratus lombu ampa tolu ribu biribiri.
34 Tapi maotiktu do malim, gabe seng tarbobaki sidea ganup galangan situtungon ai, gabe halak Levi, anggi ni sidea ai ma na mangurupi sidea paima dob horja ai, paima iuras malim na legan ai homa dirini; ai bujuran do halak Levi manguras humbani buei malim.
35 Ambahni ai buei tumang do homa ijai galangan situtungon ampa taboh-taboh ni galangan pardameian ampa galangan siinumon hasoman ni galangan situtungon. Sonai ma gabe mulak dear use horja ai i Rumah ni Jahowa.
36 Jadi marmalas ni uhur ma si Hiskia ampa haganup bangsa ai, halani haganup na dob binahen ni Naibata bani bangsa ai; ai podas do masa ganupan ai.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA