Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Amaziya jumenneng rato e bakto yuswana sagame’ taon, ban marenta e Yerusalim sanga lekor taon abidda. Ebuna iya areya Yowadan dhari Yerusalim.
2 Amaziya alampa’agi pa-apa se masenneng panggaliyanna PANGERAN, tape satengnga ate.
3 Saellana kakobasa’anna koko, laju ngokom mate ba-ponggabana se mate’e ramana.
4 Tape na’-ana’na ba-ponggaba jareya ta’ epate’e, polana atoro’ ka dhabuna PANGERAN se badha e dhalem Ketab Mosa, se monyena kantha reya, "Ja’ ngokom mate oreng towa lantaran kajahadanna na’-ana’na, ban ja’ ngokom mate na’-ana’na oreng lantaran kajahadanna oreng towana. Saneyap oreng pera’ olle eokom mate lantaran kajahadanna dibi’."
5 Rato Amaziya makompol sakabbinna oreng dhari suku Yehuda ban Benyamin. Reng-oreng jareya epakon manjeng menorot kaomma bang-sebang, epimpin bi’ komandan pasukan saebu ban komandan pasukan saratos. Saellana jareya rato laju mele reng-oreng se aomor dhu polo taon ka attas, se bisa aperrang ban penter aguna’agi tombak ban tameng. Bannya’na oreng jareya tello ratos ebu.
6 Laen dhari jareya Amaziya gi’ nyewa parjurit saratos ebu oreng dhari Isra’il, se ebajari ra-kera tello ebu pa’ ratos kilo salaka.
7 Tape badha nabbi nyabis ka rato, laju mator, "Ampon ja’ ngagem rit-parjurit Isra’il ka’dhinto, sabab PANGERAN ta’ nolonge ommat Isra’il se dhari Karaja’an Dhaja ka’dhissa’.
8 Namong manabi junandalem paggun aguna’agi rit-parjurit Isra’il gapaneka sareng Allah junandalem badhi edinggala epakala moso, sanare tantarana junandalem kowat sareng bangalan. Sabab namong Allah se kobasa apareng kamennangan otaba kakala’an."
9 "Tape kadi ponapa sadajana salaka se bi’ kaula ampon ebagi ka reng-oreng Isra’il gapaneka?" dhabuna Amaziya. Dhabuna nabbi jareya, "Junandalem badhi narema’a gante dhari PANGERAN, alangkongan dhari gapaneka!"
10 Daddi rit-parjurit sewa’an jareya bi’ Amaziya epabebas ban epamole ka nagarana. Reng-oreng Isra’il jareya mole, tape atena ce’ peggella.
11 Amaziya mabangal abakta tantarana ka Cora Accen. E jadhiya tantara jareya aperrang ban mate’e parjurit Edom sapolo ebu oreng.
12 Sapolo ebu laenna etawan, laju egiba ka konco’na gunong bato e kottha Sela, terros eontallagi ka baba sampe’ padha mate.
13 Sabatara jareya, rit-parjurit Isra’il se epakon mole bi’ Amaziya gella’, sarta ta’ eedine noro’ aperrang, laju alorok tha-kottha Yehuda e antarana Samaria ban Bet-Horon. Reng-oreng Isra’il jareya mate’e oreng Yehuda tello ebu ban arampas barang sabannya’na.
14 Saellana makala tantara Edom, Amaziya gubar abakta ca-arca brahalana oreng Edom, laju esaba’ e Yehuda. Saellana jareya Amaziya laju ngobbar dupa nyemba ca-arca jareya.
15 Jareya andaddiyagi PANGERAN duka. Salerana laju ngotos nabbi ka Amaziya. Nabbi jareya mator, "Aponapa junandalem me’ nyemba dibana bangsa laen se ta’ kengeng masalamet bangsana dibi’ dhari kakobasa’annepon junandalem?"
16 "Ambu!" dhabuna Amaziya, "Mon ba’na gi’ acaca terros, bi’ sengko’ epateyana. Ba’na ta’ tao eangkat epadaddi panasehadda rato!" Daddi nabbi jareya laju mendel, tape sabellunna gi’ sempat adhabu, "Samangken abdidalem oneng ja’ Guste Allah ampon motossagi badhi matebasa junandalem lantaran se elampa’agi junandalem, sarengngan pole lantaran junandalem ta’ kasokan meyarsa’agi babala’an abdidalem."
17 Amaziya, rato Yehuda ban para panasehadda asakongkel aperranga ban Isra’il. Amaziya ngerem otosan ka Yowas, rato Isra’il, pottrana Yowahas, bajana Yehu, etangtang perrang.
18 Tape Rato Yowas ngerem jawaban kantha reya, "E settong bakto ombut se adhuri e Pagunongan Libanon ngerem pessen ka bungkana comara, monyena sapaneka, ‘E, bungkana comara, mara ana’na ba’na se paraban bagi ka tang ana’ me’ olle ekabine.’ Tape saamponna gapaneka badha burun alas lebat e ka’dhissa’; ombut se adhuri gella’ laju enyek-enyek.
19 Sampeyan Amaziya, ngedirragi polana makala oreng Edom, tape langkong sae sampeyan alenggi e compo’na saos. Aponapa’a sampeyan me’ re-nyare marga se pera’ macalaka’a badanna dibi’ sareng ra’yadda?"
20 Tape Amaziya ta’ marduli ka dhabuna Yowas rato Isra’il gella’. Allah pajat makala’a Amaziya polana nyemba arca brahalana oreng Edom.
21 Daddi Yowas ban tantarana mangkat ka Bet-Semes, laju aperrang ban Amaziya e jadhiya.
22 Tantara Yehuda epakala ban rit-parjuridda padha buru mole ka bengkona bang-sebang.
23 Yowas nangkep Amaziya, laju ebakta ka Yerusalim; saellana jareya laju magujur pagar batona kottha jareya sampe’ lebbi korang dhu ratos meter lanjangnga, molae dhari Labang Saketheng Efraim sampe’ ka Labang Saketheng Paddu.
24 Emmas ban salaka sarta kas-pakakas se etemmo e Padalemman Socce ban se ejaga bi’ la-balana Obed-Edom, sarta rang-barang se badha e karaton, sarta reng-oreng se ekagabay sandera, bi’ Yowas eangko’ kabbi ka Samaria.
25 Saellana Yowas, rato Isra’il jareya seda, Amaziya rato Yehuda gi’ odhi’ lema bellas taon aggi’.
26 Sajjegga Amaziya mongkore PANGERAN, oreng padha asakongkel e Yerusalim ngamoso salerana. Daddi Amaziya laju buru ka kottha Lakhis, tape eserser bi’ so-mosona, laju epate’e e jadhiya. Jinazana eangko’ ban jaran ka Yerusalim, laju esareyagi e pasareyanna to-rato e Kottha Daud. Careta laenna parkara Rato Amaziya dhari parmola’anna sampe’ ka aherra pamarenta’anna ecathet e dhalem ketab Sajarana To-Rato Yehuda ban Isra’il.
27 (25:26)
28 (25:26)
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA