Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Yowas jumenneng rato Yehuda e bakto yuswana pettong taon, ban marenta e Yerusalim pa’ polo taon abidda. Ebuna iya areya Zibya dhari kottha Bersyeba.
2 Saabidda imam Yoyada gi’ odhi’, Yowas alampa’agi sabarang se masenneng panggaliyanna Pangeran.
3 Yoyada mele babine’ kadhuwa epadaddi rajina Yowas, ban dhari babine’ se kadhuwa jareya Yowas kaagungan tra-pottra lalake’ ban babine’.
4 Saellana abak abit se marenta, Yowas motossagi mateppa’a Padalemman Socce.
5 Para imam ban oreng Lewi padha epakon manggi’i oreng e tha-kottha e Yehuda, epakon makompol pesse dhari saneyap ra’yat se epamateppa’a Padalemman Socce sabban taonna. Mam-imam ban reng-oreng Lewi jareya bi’ Yowas epakon duli alampa’agi tugas jareya, tape reng-oreng Lewi re-malere.
6 Daddi Yowas laju nembali imam Yoyada pamimpinna mam-imam ban reng-oreng Lewi jareya, laju adhabu, "Mosa abdina PANGERAN ka’issa’ gu ta’ makon ra’yat majar pajek se ebadhiya ongkossa Kemah Socce, ta’ enggi? Samangken, aponapa reng-oreng Lewi sareng sampeyan me’ ta’ epaksa makompol pajek dhari ra’yat Yehuda sareng Yerusalim?"
7 (Reng-oreng se noro’ Ataliya, babine’ se jahat rowa, padhamarosak Padalemman Socce, bannya’ rang-barang se la esocceyagi ka Allah ekala’, eangguy mon nyemba’a Ba’al.)
8 Daddi rato makon reng-oreng Lewi agabay petthena pesse se esaba’ e adha’anna labang sakethengnga Padalemman Socce.
9 E saantero Yerusalim ban e Yehuda eberri’i pangomoman epabalattra ja’ sakabbinna oreng kodu padha majar pajek ka PANGERAN, akantha se la ewajibbagi bi’ Mosa.
10 Ra’yat ban pin-pamimpinna perak narema pangomoman jareya. Kabbi padha areng-bareng mamaso’ pesse pajek ka dhalem petthe jareya.
11 Sabban are petthe jareya bi’ reng-oreng Lewi egiba ka ponggabana rato, esoro pareksa. Mon petthena la possa’, pessena epakalowar bi’ sekettaris nagara sarta bakkella Imam Agung, dineng petthena laju epabali ka kennengnganna se asal. Kantha jareya se sabban arena, sampe’ pesse se akompol ce’ bannya’na ollena.
12 Saellana jareya rato ban Yoyada massra’agi pesse jareya ka reng-oreng se ngapalae orosan mateppa’ Padalemman Socce gella’. Reng-oreng jareya laju malako tokang bato, tokang kaju ban pandhi se ekaparlo mateppa’a Padalemman Socce jareya.
13 Kang-tokang jareya laju molae alako mateppa’ Padalemman Socce buru. Kabbi padha alako tadha’ ambuna sampe’ dhi-budhina Padalemman jareya laju koko ban bagus akantha asalla.
14 Saellana lalakon jareya mare, karena emmas ban salakana epassra’agi ka rato ban ka Yoyada. Emmas ban salaka jareya laju ekagabay kas-pakakassa Padalemman Socce, e antarana: pakakassa opacarana kabakteyan, pakakassa kurban obbaran, reng-perengnga dupa, ban bung-tobung. Saabidda Imam Yoyada gi’ odhi’, e Padalemman Socce teptep eatorragi kurban obbaran.
15 Yoyada sampe’ ce’ seppona; e bakto yuswana saratos tello polo taon laju seda.
16 Jinazana esareyagi e pasareyanna to-rato e Kottha Daud menangka pangarga’an ka sa-jasana ka Allah, ka Padalemman Socce, ban ka ommat Isra’il.
17 Saellana Yoyada seda, Yowas ecacae ban epangarowe bi’ pin-pamimpin Yehuda sampe’ Yowas ta’ ngejabi baburuganna Yoyada pole.
18 Daddi ra’yat pas ta’ ngalakone kabakteyan e Padalemman Socce, Allahna bangatowana; menangka gantena ra’yat jareya laju nyemba ka brahala ban ka ca-arcana Dewi Asyera. Lantaranna sa-dusana reng-oreng jareya, PANGERAN laju duka ka Yehuda ban Yerusalim.
19 PANGERAN ngotos bi-nabbi se epakon maenga’ reng-oreng jareya sopaja padha’a abali ngabdi ka PANGERAN, tape bi’ ra’yat ta’ eedhingngagi.
20 Erroh Allah laju ngobasane Zakhariya pottrana Imam Yoyada. Zakhariya kalowar ka adha’na ra’yat, laju aera’, "GUSTE Allah adhabu, ‘Arapa ba’na me’ ta’ atoro’ ka Tang parenta ban macalaka’ aba’na dibi’? Ba’na ta’ parduli ka Sengko’, daddi bi’ Sengko’ ba’na ta’ eparduliya keya!’"
21 Tape ra’yat sakongkel nangtang Zakhariya, ban Rato Yowas noro’ e dhalem komplodan jareya. Yowas ta’ emot pole ka kabecce’anna ban ka kaestowanna Yoyada, ramana Zakhariya. Kalaban dhabuna rato, Zakhariya egarujuk sampe’ seda e taneyanna Padalemman Socce. E bakto seda’a, Zakhariya adhabu epakaja, "Moga-moga PANGERAN ngoladana ka lalakonna ba’na reya ban aparenga babales!"
22 (24:21)
23 E taon jareya keya, e bakto mosem agante, tantara Siria alorok Yehuda ban Yerusalim. Pin-pamimpinna Yehuda ban Yerusalim epate’e kabbi, ban bannya’ barangnga se erampas, egiba ka Damsyik.
24 Tantara Siria sanyatana pera’ sakone’, tape bi’ PANGERAN epamennang ka tantara Yehuda se talebat bannya’na sabab oreng Yehuda ta’ marduli ka PANGERAN, Allahna bangatowana. Kalaban cara se kantha jareya PANGERAN ngokom Rato Yowas.
25 Yowas loka berra’. Saellana mosona ondur, parwirana kadhuwa asakongkel, laju mate’e Yowas e pasareyanna menangka babales se mate’e pottrana Imam Yoyada. Rato Yowas esareyagi e Kottha Daud, tape banne e pasareyanna to-rato.
26 (Reng-oreng se sakongkel mate’e salerana iya areya Zabadana’na Simeyat babine’ Amon, ban Yozabad ana’na Simrit babine’ Mo’ab.)
27 Caretana tra-pottrana Yowas, parkara sakabbinna ramalan se ta’ bagus parkara salerana, ban parkara baramma salerana se mateppa’ Padalemman Socce, ecareta’agi kabbi e dhalem ketab Katerrangan Se Jarna’ Parkara Ketab To-rato. Amaziya, pottrana Yowas, jumenneng rato agante ramana.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA