Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Raja Josapat i Juda nari mulih alu mejuah-juah ku istanana i Jerusalem.
2 Sekalak nabi, eme Jehu anak Hanani reh njumpai ia jenari nina man raja e, "Iakapndu kin payo nampati kalak si jahat dingen ngkapiti kalak si ernembeh ate man TUHAN? Kai si nggo ibahanndu e erbahanca nembeh ate TUHAN man bandu.
3 Tapi aminna pe bage, lit nge si mehuli i bas kam. Nggo iaguindu kerina gana-gana Dewi Asera si isembah jelma si nterem. Janah nggo ipala-palaindu ngikutken kai si ngena ate Dibata."
4 Aminna pe Josapat ringan i Jerusalem, tetap nge isiar-siarna jelma si nterem, mulai i Berseba nari i Selatan ku deleng-deleng Eperaim i Utara, guna ngenehen man bangsa e gelah mulihken ku TUHAN, Dibata nini-ninina.
5 Itugaskenna hakim-hakim i bas tep-tep kota Juda, si erbenteng,
6 janah ipedahkenna man hakim-hakim e, "Metengetlah kam erbahan keputusen. Kam labo erdahin erpalasken kuasa manusia, tapi erpalasken kuasa TUHAN, janah IperdiatekenNa kap kam tupung kam mutusken ukumen.
7 Mbiarlah man TUHAN janah metengetlah ndahiken dahinndu, sabap TUHAN Dibatanta la AteNa ngena kalak nipu ntah pe kalak si erbahan keputusen rayo-ayo ntah pe si ngaloken sogok."
8 I Jerusalem itugasken Josapat kalak Lewi, imam-imam dingen piga-piga kalak kota e si terkemuka jadi hakim-hakim guna mutusken perkara-perkara pelanggaren Undang-undang TUHAN ntah perkara-perkara si debanna.
9 Man kalak ndai iperentahkenna bagenda, "Arus kam ndahiken dahinndu alu erkemalangen man TUHAN, dingen alu patuh ngikutken Ia i bas kasa kai si idahikenndu.
10 Adi reh seninandu si sada bangsa i bas kota-kota nari nehken perkara pembunuhen, ntah perkara pelanggaren undang-undang ntah perentah TUHAN, arus maka alu metenget iajarkenndu man bana uga lagu langkah si arus kidekah erperkara e, gelah ula ia erdosa man TUHAN. Adi la iajarkenndu ia, kam ras temanndu e la banci lang ngenanami uga serana pernembeh ate TUHAN. Tapi adi iajarkenndu lah ia, kam la ersalah.
11 Imam si Mbelin Amaria, kuasana me si meganjangna i bas perkara-perkara agama janah Sebadia anak Ismail, gubernur Juda, kuasana me si meganjangna i bas perkara-perkara si deban. Kalak Lewi ertanggung jawab ngawasi pelaksanan keputusen pengadilen. Tetapkenlah ukurndu janah dahikenlah perentah-perentah enda. TUHAN kap si ngkapiti si benar!"
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA