Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ri se’reang allo akkuta’nangi Daud angkana, "Nia’ ija bijanna Saul attallasa’? Punna nia’ erokka’ a’gau’ baji’ mae ri ia lanri Yonatan."

² Kaluargana Saul nia’ atanna niareng Ziba. Nisuroi andallekang ri Karaeng Daud. Akkuta’nammi karaenga angkana, "Ikauka antu Ziba?" Appialimi angkana, "Iye’ karaeng."

³ Nampa akkuta’nang karaenga angkana, "Nia’ ijaka attallasa’ battu ri kaluargana Saul? Erokka’ a’gau’ baji’ mae ri ia, sangkamma le’baka kupa’janjiang mae ri Allata’ala." Appialimi Ziba angkana, "Nia’ ija sitau ana’ bura’nena Yonatan. Attempangi."

⁴ Akkuta’nammi karaenga angkana, "Kemaei?" Appialimi Ziba angkana, "Ri Lodebar, ri balla’na Makhir ana’na Amiel."

⁵ Nampa nasuro kio’mo Daud anjo ana’ bura’nena Yonatan.

⁶ Anjo ana’ bura’nena Yonatan niarengi Mefiboset. Ri wattunna battu, su’ju’mi ampakalompoi Daud. Nipattaumi ri Daud angkana, "Mefiboset". Nappialimo angkana, "Iye’ karaeng."

⁷ Angkanami Daud, "Teako mallakki. Lalammoro’ pa’maika’ mae ri kau lanri Yonatan manggenu. Sikontu buttana toanu iamintu Saul, lakupoterangi mae ri kau siagang akkulleko angnganre ri balla’ kakaraenganga satunggu-tungguna."

⁸ Su’ju’mi pole Mefiboset siagang nakana, "Apa todong anggaranna anne atanta! Angngapa kibajikkamma mae ri atanta anne karaeng?"

⁹ Nampa nakio’mo karaenga Ziba iamintu atanna Saul, na nakana, "Sikontu apa nabokoia Saul siagang kaluargana kupassareangi mae ri anne cucunna karaennu.

¹⁰ Ikau siagang sikamma ana’nu kammayatompa pambantunu musti najamai anjo buttaya untu’ kaluargana karaennu Saul, siagang sareangi anjo wassele’na ke’nanga untu’ ampa’gannaki kaparalluanna ke’nanga. Mingka Mefiboset akkullei angnganre satunggu-tungguna ri balla’ kakaraenganga." (Ziba nia’ ana’na 15 tau bura’ne siagang 20 jaina atanna.)

¹¹ Appialimi Ziba ri karaenga angkana, "Sikontu parentata karaeng lanagaukangi atanta." Jari sipangnganreammi Mefiboset siagang karaenga, sangkamma ana’ bura’ne kalenna Karaeng Daud.

¹² Nia’ ana’ bura’nena Mefiboset niareng Mikha. Sikontu anggota kaluargana Ziba a’jari kabusuki atanna Mefiboset.

¹³ Kammaminjo nammantammo Mefiboset panra’ rua-ruaya bangkenna ri Yerusalem siagang tuli angnganrena ri balla’ kakaraenganga.

2 Samuel

Video 2 Samuel 9

Ikuti Kami:

KONTAK | PARTISIPASI | DONASI